ម៉ានីល៖ ធនាគាររដ្ឋរបស់ប្រទេសហ្វីលីពីន បានបញ្ចេញប្រាក់កម្ចីចំនួន១,២ពាន់លានប៉េសូហ្វីលីពីន ឬប្រហែល២១,៨២លានដុល្លារ តាមរយៈកម្មវិធីផ្តល់ប្រាក់កម្ចី ដើម្បីគាំទ្រដល់ខ្សែសង្វាក់តម្លៃកសិកម្មទាំងមូល។
នៅក្នុងសេចក្តីថ្លែងការណ៍ រដ្ឋមន្ត្រីក្រសួងហិរញ្ញវត្ថុ និងជាប្រធានធនាគារ ឡែនដ៍ (Land Bank) ដែលគ្រប់គ្រង លោក រ៉ាល រ៉េកតូ (Ralph Recto) បានមានប្រសាសន៍ថា កំណើនកសិកម្ម និងសមាហរណកម្មធនធាន តាមរយៈកម្មវិធីផ្តល់ជាយុទ្ធសាស្រ្ត និងពង្រឹងការផ្តល់ជំនួយ និងឱកាសបន្ថែម បានបញ្ចេញប្រាក់កម្ចីចំនួន១,១៦ពាន់លានប៉េសូហ្វីលីពីន ឬប្រហែលជាង២១លានដុល្លារ ក្នុងរយៈពេលប្រាំមួយខែ។
គិតត្រឹមចុងខែឧសភា ឆ្នាំ២០២៥ កម្មវិធីនេះបានផ្តល់អត្ថប្រយោជន៍ដល់អ្នកខ្ចីប្រាក់ចំនួនជិត៧០ ០០នាក់ និងបានផ្តល់ហិរញ្ញប្បទានលើផ្ទៃដីស្រែចម្ការជាងពីរម៉ឺនហិកតា។
សេចក្តីថ្លែងការរបស់ធនាគារ បានឱ្យដឹងទៀតថា ធនាគារមានគោលបំណងនាំយកកម្មវិធីនេះទៅដល់អ្នកទទួលផលថ្មីយ៉ាងហោចណាស់មួយម៉ឺននាក់ នៅត្រឹមចុងឆ្នាំ២០២៥ ដើម្បីអនុវត្តផែនការជំរុញរបស់រដ្ឋាភិបាលក្នុងការធ្វើទំនើបកម្ម និងលើកកម្ពស់ជីវភាពរស់នៅតាមជនបទ។
កម្មវិធីផ្តល់ជាយុទ្ធសាស្រ្ត និងពង្រឹងការផ្តល់ជំនួយ និងឱកាសបន្ថែម បានបើកដំណើរការក្នុងខែវិច្ឆិកា ឆ្នាំ២០២៤ ដើម្បីពង្រីកសិទ្ធិទទួលបានប្រាក់កម្ចីមានអត្រាការប្រាក់ទាប និងយល់ដឹងពីភាពងាយស្រួលទទួលបានប្រាក់កម្ចី។ អ្នកទទួលផលថ្មីៗរបស់កម្មវិធីនេះរួមមានកសិករប្រមាណ១ ០០០នាក់នៅ។
កម្មវិធីផ្តល់ជាយុទ្ធសាស្រ្ត និងពង្រឹងការផ្តល់ជំនួយ និងឱកាសបន្ថែម ផ្តល់ហិរញ្ញប្បទានដល់តម្រូវការកសិផលជាច្រើន ចាប់ពីផលិតកម្មដំណាំ និងជលផល រហូតដល់ការទិញគ្រឿងយន្តកសិកម្ម។ មុននិងក្រោយការប្រមូលផល និងការអភិវឌ្ឍស្រះចិញ្ចឹមជាដើម ដែលក៏រួមបញ្ចូលការផ្តល់ហិរញ្ញប្បទានសម្រាប់ការបណ្តុះបណ្តាលជំនាញ ការទទួលបានទីផ្សារ និងចេះកែច្នៃផលិតផលរបស់ខ្លួន។
ដូចគ្នានេះដែរ កម្មវិធីនេះគ្របដណ្តប់លើអ្នកទទួលផលយ៉ាងទូលំទូលាយ រួមទាំងអ្នកនេសាទខ្នាតតូច និងសហគ្រាសខ្នាតតូច និងមធ្យម ដែលពាក់ព័ន្ធនឹងខ្សែសង្វាក់តម្លៃកសិកម្ម ក៏ដូចជានិស្សិតបញ្ចប់ការសិក្សាផ្នែកកសិកម្មផងដែរ។
កម្មវិធីផ្តល់ឱ្យអ្នកខ្ចីនូវការធានារ៉ាប់រងអាយុជីវិត និងឥណទានដោយឥតគិតថ្លៃ។ កម្មវិធីនេះផ្តល់អត្រាការប្រាក់ថេរបួនភាគរយក្នុងមួយឆ្នាំ សម្រាប់កសិករខ្នាតតូច អ្នកនេសាទ និងអ្នកចូលរួមធ្វើកំណែទម្រង់កសិកម្ម ខណៈអ្នកខ្ចីផ្សេងទៀតត្រូវគិតប្រាក់ពី៦,៥ ទៅ៧,៥ភាគរយក្នុងមួយឆ្នាំ៕
