រាជធានីភ្នំពេញ៖ កាលពីថ្ងៃទី១៦ ខែមិថុនា ឆ្នាំ២០២៥ សហព័ន្ធស្រូវអង្ករកម្ពុជា បានប្រារព្ធខួប១០ឆ្នាំរបស់ខ្លួនពីឆ្នាំ២០១៤ ដល់២០២៤ នៅមជ្ឈមណ្ឌល ឌឹ ព្រីមៀ សែនសុខ ក្នុងរាជធានីភ្នំពេញ។
ពិធីនេះមានការអញ្ចើញចូលរួមជាអធិបតីភាពដ៏ខ្ពង់ខ្ពស់ដោយឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា, ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) ,ឯកឧត្តម ចាន់ សីហា អគ្គនាយករងធនាគារ ARDB រួមនិងថ្នាំដឹកនាំនិងតំណាងស្ថាប័នពាក់ព័ន្ធជាច្រើនផ្សេងទៀត បានអញ្ចើញចូលរួមជាកិត្តិយសផងដែរ។
ឧកញ៉ា ចាន់ សុឃាំង ប្រធានសហព័ន្ធស្រូវអង្ករកម្ពុជាមានប្រសាសន៍ថា នៅក្នុងរយៈពេល១០ឆ្នាំនេះ សហព័ន្ធស្រូវអង្ករកម្ពុជា មានសមាជិកសកម្មចំនួន៣០១ ក្នុងនោះរោងម៉ាស៊ីនកិនស្រូវ និងក្រុមហ៊ុននាំចេញអង្ករចំនួន៨៧, រោងម៉ាស៊ីនកិនស្រូវចំនួន១២៥, សហគមន៍ចំនួន៥៦ និងសហគ្រាសផ្សេងៗ ដែលទ្រទ្រង់ដល់វិស័យស្រូវអង្ករចំនួន៣៣។
តាមរយៈ សហគ្រាសទាំងនេះ ក្នុងរយៈពេល១០ឆ្នាំចុងក្រោយនេះ ពីឆ្នាំ២០១៤ ដល់ឆ្នាំ២០២៤ កម្ពុជាសម្រេចបានការនាំចេញអង្ករចំនួន៦.៥៩ លានតោន ទៅកាន់១២៣គោលដៅ។ ក្នុងរយៈពេលនេះដែរ ក្រៅពីការចេញអង្ករ កម្ពុជាក៏បាននាំចេញស្រូវប្រមាណជាង២១.៤៥ លានតោន ដែលនេះជាសមិទ្ធផលរបស់វិស័យស្រូវអង្ករកម្ពុជាស្ថិតក្នុងយុគ្គសម័យសន្តិភាព ដែលបានដឹកនាំដោយសម្តេចអគ្គមហាសេនាធបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា នៃព្រះរាជាណាចក្រកម្ពុជា ហើយបានបន្តដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
ឧកញ៉ា ចាន់ សុឃាំង បានសង្កត់ធ្ងន់ថា “ក្នុងរយៈពេល ១០ឆ្នាំចុងក្រោយនេះ រោងម៉ាស៊ីនកិនស្រូវរបស់កម្ពុជាទទួលបានការយកចិត្តទុកដាក់ពីរាជរដ្ឋាភិបាល លើការបង្កើនភាពប្រកួតប្រជែងតាមរយៈយន្តការលើកលែងពន្ធគ្រប់ប្រភេទ សម្រួលសេវាគ្រប់ប្រភេទសម្រាប់ការនាំចេញ និងប្រតិបត្តិការរបស់រោងម៉ាស៊ីនកិនស្រូវ ការអន្តរាគមន៍ហិរញ្ញវត្ថុតាមរយៈធនាគារអភិវឌ្ឍន៍ជនបទ និងកសិកម្ម ការពង្រីកហេដ្ឋារចនាសម្ព័ន្ធប្រព័ន្ធធារាសាស្ត្ររបស់រាជរដ្ឋាភិបាល ការយកចិត្តទុកដាក់លើការដាំដុះ និងការពង្រឹងប្រព័ន្ធបន្សុទ្ធពូជរបស់ក្រសួងកសិកម្ម រុក្ខាប្រមាញ់ និងនេសាទ ដែលជាមូលដ្ឋានសំខាន់សម្រាប់ធ្វើឱ្យដំណាំស្រូវបានរីកចម្រើនកើនឡើងពីជាងប្រាំបីលានតោនកើនដល់ជាង១៤លានតោននៅឆ្នាំ២០២៤ កន្លងមកនេះ ដែលផ្តល់លទ្ធភាពរក្សាបាននូវសន្តិសុខស្បៀង និងមានអតិរេកនាំចេញអង្ករជាង ៦៥ម៉ឺនតោន និងនាំចេញ ស្រូវចំនួនជាង ៥លាននៅឆ្នាំ២០២៤ ផងដែរ”។
នៅក្នុងឱកាសនេះផងដែរ, ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជាមានប្រសាសន៍ថា កាលពីជាង១០ឆ្នាំមុន វិស័យស្រូវអង្ករកម្ពុជាទើបងើបចេញពីដំណាក់កាលមួយ ដែលប្រទេសខ្វះខាតស្បៀង ធ្លាប់ពឹងពាក់ទៅលើការនាំចូលដើម្បីបំពេញតម្រូវការក្នុងស្រុក រហូតចាប់ផ្តើមមានអតិរេក ដែលផ្តល់លទ្ធភាពឱ្យមានការនាំចេញស្រូវ និងអង្ករទៅកាន់ទីផ្សារអន្តរជាតិ។
ប៉ុន្តែចំណុចដែលពិបាកនៅពេលនោះ គឺវិស័យឯកជននូវទន់ខ្សោយ ហើយនៅក្នុងគ្រានោះផងដែរ, លោកបានសង្កេតឃើញថា វិស័យស្រូវអង្ករកម្ពុជា ជាពិសេសវិស័យឯកជនមិនមានភាពសាមគ្គីផ្ទៃក្នុង, សហគមន៍សហព័ន្ធលើវិស័យស្រូវអង្ករនេះជាច្រើនបានបង្កើតឡើង ហើយបានធ្វើការៀងៗខ្លួន ប្រកួតប្រជែងគ្នាឯង ដែលផ្តល់ការលំបាកដល់រាជរដ្ឋាភិបាល និងវិស័យឯកជនខ្លួនឯង ជាពិសេសរោងម៉ាស៊ីនកិនស្រូវ និងអ្នកនាំចេញ និងការធ្វើទីផ្សារ ការជំរុញការដាំដុះ ការនាំចេញ។
ឯកឧត្តម ស៊ុន ចាន់ថុល មានប្រសាសន៍ទៀតថា សមិទ្ធផលដ៏ល្អរបស់សហព័ន្ធស្រូវអង្ករកម្ពុជានៅក្នុងរយៈពេល១០ឆ្នាំំមកនេះ គឺកើតឡើងពីកិច្ចខិតខំប្រឹងប្រែងយ៉ាងសស្រាក់សស្រាំក្រោមការដឹកនាំប្រកបដោយចក្ខុវិស័យវែងឆ្ងាយចាប់តាំងពីសម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ដែលបច្ចុប្បន្នជាប្រធានព្រឹទ្ធសភានៃព្រះរាជាណាចក្រកម្ពុជា រហូតដល់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ ជាពិសេសការចូលរួសហការយ៉ាងជិតស្និទ្ធរវាងក្រសួងស្ថាប័នពាក់ព័ន្ធ ដូចជាក្រសួងកសិកម្ម រុក្ខាប្រមាញ់ និងនេសាទ គណៈកម្មការគោលនយោបាយសេដ្ឋកិច្ច និងហិរញ្ញវត្ថុ ដែលបានផ្តល់កញ្ចប់ថវិកាពិសេសជូនវិស័យស្រូវអង្ករ តាមរយៈធនាគារអភិវឌ្ឍន៍ជនបទ និងកសិកម្ម។ ចំណែកក្រសួងពាណិជ្ជកម្មបានខិតខំប្រឹងប្រែងបើកទីផ្សារថ្មីៗសម្រាប់នាំចេញអង្ករទៅទីផ្សារអន្តរជាតិ។
កិច្ចខិតខំប្រឹងប្រែងទាំងអស់នេះ នឹងជំរុញឱ្យកម្ពុជាក្លាយទៅជាប្រទេសដើរតួនាទីយ៉ាងសំខាន់លើឆាកអន្តរជាតិក្នុងការនាំចេញអង្ករ ដែលថ្នាក់ដឹកនាំកម្ពុជាប្រសិទ្ធនាមថា ជាមាសស៕
