សៀមរាប៖ ក្នុងរយៈពេលប៉ុន្មានឆ្នាំចុងក្រោយនេះ ពោលគឺមានរយៈពេលបីទៅបួនឆ្នាំហើយ ដែលប្រទេសកម្ពុជា បានបញ្ចប់ការនាំជ្រូករស់មកលក់ក្នុងប្រទេសកម្ពុជាដូចមុនទៀតហើយ។ ជ្រូកចិញ្ចឹមនៅក្នុងប្រទេសកម្ពុជា ដែលក្នុងនេះមានទាំងការចិញ្ចឹមលក្ខណៈក្រុមហ៊ុន កសិដ្ឋានតូច-ធំ ការចិញ្ចឹមតាមលក្ខណៈឯកជន និងពិសេសពលរដ្ឋចិញ្ចឹមតាមផ្ទះសម្បែងក៏មានសន្ទុះផុលផុសជាងមុន។
ការផ្គត់ផ្គង់ជ្រូករស់ ដែលជាផលិតកម្មចិញ្ចឹមជ្រូកនៅកម្ពុជា អាចឆ្លើយតបតាមតម្រូវការទីផ្សារបានគ្រប់គ្រាន់។ ចំណែកគុណភាពក៏ផ្តល់ទំនុកចិត្តដល់អ្នកបរិភោគដែលជាពលរដ្ឋខ្មែរជាងមុន ខណៈការការនាំចូលជ្រូកពីប្រទេសជិតខាងកាលពីមុនមកនេះអ្នកបរិភោគតែងព្រួយបារម្ភពីបញ្ហាសារជាតិគីមី ឬជំងឺឆ្លងបង្កការប៉ះពាល់ដល់សុខភាពរបស់ពួកគាត់។
លោក ស្រ៊ុន ពៅ ប្រធានសមាគមន៍ អ្នកចិញ្ចឹមសត្វនៅកម្ពុជាបានបញ្ជាក់ប្រាប់ ARDB TV ថា ប្រទេសកម្ពុជាបានបញ្ចប់ការនាំសត្វជ្រូករស់ទាំងស្រុងពីប្រទេសជិតខាង។ មកដល់ពេលនេះការចិញ្ចឹមក្នុងស្រុកផ្គត់ផ្គង់គ្រប់គ្រាន់ ហើយតម្លៃទៀតសោតសមរម្យ ដែលហេតុនេះ គេមើលឃើញថា ពលរដ្ឋកម្ពុជាចាប់ផ្តើមចិញ្ចឹមជ្រូកកាន់តែច្រើនបន្តបន្ទាប់។ ចំពោះតម្លៃជ្រូករស់លក់ក្នុងមួយគីឡូក្រាម១០ ០០០រៀល ទៅ១០ ៥០០រៀល។ ដោយឡែកតម្លៃសាច់ជ្រូកលក់តាមទីផ្សារវិញក្នុងមួយគីឡូក្រាមមានតម្លៃក្រោម២០ ០០០រៀល។
បើតាមការបញ្ជាក់ពីសំណាក់ប្រធានសមហគមន៍ចិញ្ចឹមសត្វកម្ពុជារូបនេះ បានឱ្យដឹងដែរថា តម្រូវការសាច់ជ្រូកនៅក្នុងប្រទេសកម្ពុជា មួយថ្ងៃចាប់ពី៨ ០០០ទៅ៩ ០០០ក្បាល ក្នុងមួយថ្ងៃ ហើយចំនួននេះយើងអាចផ្តត់ផ្គង់គ្រប់គ្រាន់សម្រាប់អ្នកបរិភោគ។ យើងមិនចាំបាច់នាំចូលពីខាងក្រៅប្រទេសឡើយ ហើយការចិញ្ចឹមទៀតសោតក៏ពលរដ្ឋកម្ពុជាអាចរកប្រាក់ចំណេញសម្រាប់ពួកគាត់ល្អប្រសើរជាងមុនដែរ។
លោក ស្រ៊ុន ពៅ បានប្រាប់ឱ្យដឹងដែរថា ក្នុងមួយឆ្នាំ ជ្រូកចិញ្ចឹមទូទាំងប្រទេសកម្ពុជានាពេលបច្ចុប្បន្នមានប្រមាណជាងបីលានក្បាល ចិញ្ចឹមនៅតាមកសិដ្ឋាន និងពលរដ្ឋចិញ្ចឹមនៅតាមផ្ទះ ហើយសាច់ក៏មានគុណភាពល្អជាងមុនដែរ។
ទាក់ទិនក្នុងរឿងនេះដែរ លោក ផាន់ ផុន ប្រធានសហមាគមន៍ព្រៃធំអន្លង់ធំ ស្ថិតនៅក្នុងភូមិអន្លង់ធំ ឃុំខ្នងភ្នំ ស្រុកស្វាយលើ ខេត្តសៀមរាប បានប្រាប់ថា ការចិញ្ចឹមជ្រូកនៅសហគមន៍របស់លោកភាគច្រើន គឺពូជជ្រូកកណ្តុរ ចំណែកអ្នកខ្លះក៏មានចិញ្ចឹមជ្រូកសាច់ធម្មតាដែរ។ សម្រាប់អ្នកចិញ្ចឹមជ្រូកនៅសហគមន៍របស់លោកវិញមានចំនួន១៩គ្រួសារ ហើយការចិញ្ចឹមជ្រូកតាមលក្ខណៈគ្រួសារក៏អាចរកចំណូលបានល្អប្រសើរដែរ ពោលគឺជ្រូករបស់ពួកគាត់អាចលក់ក្នុងមួយខែៗ គ្រួសារខ្លះអាចរកចំណូល៤០ម៉ឺនទៅជិតមួយលានរៀលទៀតផង។ សម្រាប់តម្លៃជ្រូកកណ្តុរវិញ មួយក្បាលទម្ងន់ជិត១០គីឡូក្រាម ឬលើសពីនេះបន្តិចបន្តួច គេលក់ចាប់ពី ៤៥ទៅ៥០ម៉ឺនរៀល ហើយរយៈពេលចិញ្ចឹមតែ២ទៅ៣ខែប៉ុណ្ណោះ។
ប្រធានសហគមន៍រូបនេះបានប្រាប់ឱ្យដឹងដែរថា ការចិញ្ចឹមជ្រូក គឺងាយស្រួលជាងការចិញ្ចឹមសត្វផ្សេងៗទៀត ពីព្រោះថា មានទីផ្សារល្អ ហើយឆាប់បានលក់។ សម្រាប់ជ្រូកកណ្តុរវិញ គេអាចយកទៅធ្វើជ្រូកកណ្តុរអាំងលក់ឱ្យភ្ញៀវទេសចរ និងខ្លះលក់ទៅឱ្យតាមបណ្តាខេត្តផ្សេងៗទៀត ដោយផ្តល់ប្រាក់ចំណូលខ្ពស់។
ទោះបីយ៉ាងណា លោក ផាន់ ផុន បានប្រាប់ដែរថា បញ្ហាប្រឈមចំពោះការចិញ្ចឹមជ្រូក គឺរឿងរោគជំងឺ ដែលគ្រួសារខ្លះចិញ្ចឹមពុំសូវបានផលដោយសារជ្រូកឈឺមិនងាយធំ ខ្លះក៏ងាប់ តែទោះជាយ៉ាងណាបញ្ហានេះ ក៏គេពុំសូវជួបប្រទះច្រើនដែរទេ។
ចំណែកលោក ឈឿម តាំង មេឃុំខ្នងភ្នំ ស្រុកស្វាយលើ ខេត្តសៀមរាប បានបញ្ជាក់ប្រាប់ឱ្យដឹងនាពេលកន្លងមកថា ពលរដ្ឋជាច្រើនស្ទើរសឹងទាំងអស់ ឬប្រមាណជិត៩០ភាគរយហើយ នៅក្នុងឃុំរបស់លោក ដែលរស់នៅលើខ្នងភ្នំគូលែន បាននាំគ្នាចិញ្ចឹមជ្រូកលក់ ជាពិសេសជ្រូកកណ្តុរតែម្តង ដើម្បីបន្ថែមប្រាក់ចំណូលគ្រួសាររបស់ពួកគាត់។
លោកបាននិយាយថា ការចិញ្ចឹមជ្រូកបានផ្តល់ប្រាក់ចំណូលខ្ពស់គួរសម ហើយមុខរបរនេះបន្ទាប់ពីកសិករប្រកបមុខរបរបន្ទាប់បន្សំដទៃទៀត ដូចជាចិញ្ចឹមមាន់ទា ដំាដំណាំ ហូបផ្លែ និងដំណាំស្វាយចន្ទីរ ដែលជាដំណាំមួយក៏ផ្តល់ប្រាក់ចំណូលខ្ពស់ដូចគ្នា។
គួរបញ្ជាក់ថា ការចិញ្ចឹមជ្រូកជាមុខរបរមួយសម្រាប់ទ្រទ្រង់ជីវភាពរបស់ប្រជាពលរដ្ឋកម្ពុជានៅតាមបណ្តាខេត្ត ក្រៅអំពីការធ្វើស្រែចម្ការ។ ហើយបើយោងតាមរបាយការណ៍ក្រសួងកសិកម្ម រុក្ខាប្រមាញ់ និងនេសាទ បានឱ្យដឹងនាកន្លងមកដែរថា ការចិញ្ចឹមជ្រូកនៅទូទាំងប្រទេសកម្ពុជា ស្ថិតនៅក្នុងចន្លោះប្រមាណជិតបីលានក្បាល ទៅជាងបីលានក្បាលក្នុងមួយឆ្នាំៗ ហើយក្នុងចំណោមនេះក្រៅពីបំពេញតម្រូវការសាច់ក្នុងស្រុកហើយ ជ្រូកមួយចំនួនក៏បានបញ្ជូនទៅលក់ក្រៅប្រទេសទៀតផង៕
