រាជធានីភ្នំពេញ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប. នៃក្រសួងពាណិជ្ជកម្ម កាលពីថ្ងៃសុក្រ ថ្ងៃទី៦ ខែមិថុនា ឆ្នាំ២០២៥នេះ បានរៀបចំសិក្ខាសាលាផ្សព្វផ្សាយចំណេះដឺងអំពីផលប៉ះពាល់សុខភាពនៃសារធាតុ អូរ៉ាមីនអូ ក្នុងផ្លែទុរេន ខណៈពេលកន្លងមកមានការជន់ជោរ៍ផ្លែទុរេនៅក្នុងទីផ្សារប្រទេសជិតខាង។
កម្មវិធីផ្សព្វផ្សាយនេះ រៀបចំឡើងក្រោមអធិបតីភាពឯកឧត្តម គឹម មាសសុខសីហា អគ្គនាយកនៃអគ្គនាយកដ្ឋាន ក.ប.ប. និងមានសមាសភាពចូលរួមពីលោក លោកស្រី អគ្គនាយករង នៃអគ្គនាយកដ្ឋាន ក.ប.ប. ប្រធាននាយកដ្ឋាន ប្រធាន-អនុប្រធានសាខា ក.ប.ប. រាជធានី ខេត្ត និងមន្ត្រីរាជការនៃអគ្គនាយកដ្ឋាន ក.ប.ប. ជាច្រើនរូប។
សិក្ខាសាលានេះ រៀបចំឡើងនៅទីស្តីការអគ្គនាយកដ្ឋាន ក.ប.ប. ក្នុងគោលបំណងបណ្តុះបណ្តាលមន្ត្រីជំនាញនៃអគ្គនាយកដ្ឋាន ក.ប.ប. ដើម្បីបន្តចុះទៅអប់រំ ផ្សព្វផ្សាយ ដល់អាជីវករលក់ផ្លែទុរេន ម្ចាស់ចម្ការ និងអ្នកប្រើប្រាស់នៅតាមរាជធានី-ខេត្ត ក្នុងការបញ្ជ្រាបការយល់ដឹង និងចូលរួមសហការ ដោយមិនយកសារធាតុ អូរ៉ាមីនអូ នេះទៅប្រើប្រាស់ទើបជាវិធានការបង្ការមួយដ៏មានប្រសិទ្ធភាព។
អ្នកនាំពាក្យក្រសួងពាណិជ្ជកម្ម ឯកឧត្តម ប៉ែន សុវិជាតិ មានប្រសាសន៍ថា “ពាក់ព័ន្ធនិងការទប់ស្កាត់ការនាំចូលផ្លែទុរេនមកពីខាងក្រៅនេះ ក្រសួងបានប្រុងប្រយ័ត្នតាំងពីឆ្នាំ២០២៤ ហើយនៅក្នុងឆ្នាំនោះដែរក្រសួងបានរៀបចំ និងបានរាយការណ៍ម្តងរួចហើយ បន្ទាប់មកនៅឆ្នាំ២០២៥មានសារចរណែនាំមួយពីទីស្តីការគណៈរដ្ឋមន្ត្រីដើម្បីឱ្យក្រសួងពាណិជ្ជកម្មមានការប្រុងប្រយ័ត្នជាមួយនិងទុរេននាំចូល”។
នៅក្នុងបញ្ហានេះ ដោយសារតែកន្លងមកមានការជន់ជោផ្លែទុរេនៅក្នុងទីផ្សារប្រទេសជិតខាង ដែលទុរេនទាំងនោះមិនមែនជាទុរេនមានផ្ទុកសារធាតុគីមីទេ។ ប៉ុន្តែដោយសារមានការភ័យខ្លាចអាចនឹងកើតឡើងក៏ធ្វើឱ្យផ្លែទុរេនមួយចំនួនធំ ដែលមានប្រភពមកពីកន្លែងបាននាំចេញទៅមានផ្ទុកសារធាតុជាតិគីមីនោះ ទាំងទុរេនល្អ និងទុរេនមានផ្ទុកជាតិគីមី ប្រែជាជន់ជោនៅលើទីផ្សារ។ ការជន់ជោទុរេននេះក៏បានលេចឮថាមានធ្លាយមកតាមច្រកផ្សេងៗចូលមកកម្ពុជា។
អគ្គនាយកដ្ឋាន ក.ប.ប ក៏បានយកចិត្តទុកដាក់ ហើយបានសហការជាមួយស្ថាប័នពាក់ព័ន្ធ បានធ្វើការឃាត់នៅតាមច្រកចូលសំខាន់ៗ និងធ្វើការឃាត់តាមច្រករបៀង។ ជំហ៊ានបន្ទាប់មកទៀតមន្ត្រីជំនាញក៏បានដើរទៅតាមទីផ្សារដើម្បីប្រមូលសំណាកមួយចំនួន ដែលសង្ស័យថា អាចជាទុរេននាំចូល ដើម្បីពិនិត្យថា តើមានផ្ទុកសារធាតុគីមីឬទេ៕
