ទីក្រុងហ្សាកាតា៖ ប្រទេសឥណ្ឌូណេស៊ីក៏ស្ថិតក្នុងចំណោមប្រទេស ទិញអង្ករចូលដើម្បីបង្រ្គប់តម្រូវការក្នុងស្រុក ដែលស្របពេលជាមួយគ្នានេះដែរ ចាំបាច់ត្រូវការផ្គត់ផ្គត់អង្ករពីដៃគូមួយចំនួន ជាពិសេសពីដៃគូពាណិជ្ជកម្មក្នុងចំណោមសមាជិកអាស៊ាន ដូចជា កម្ពុជា វៀតណាម និងថៃ ជាដើម។
កន្លងមកប្រទេសឥណ្ឌូណេស៊ី ក៏មានការនាំចូលអង្ករពីប្រទេសកម្ពុជា តាមរយៈកិច្ចព្រមព្រៀងមួយដើម្បីផ្គត់ផ្គង់អង្ករចំនួន២៥ម៉ឺនតោនក្នុងមួយឆ្នាំ ដោយចាប់ផ្តើមពីឆ្នាំ២០២៤។
តាមរយៈកិច្ចព្រមព្រៀងនេះ ត្រូវបានគេមើលឃើញថា ជាជំហានដ៏សំខាន់មួយក្នុងការពង្រឹងទំនាក់ទំនងពាណិជ្ជកម្មរវាងប្រទេសទាំងពីរ។
ឯកឧត្តម សាន់តូ ដារម៉ូស៊ូម៉ារតូ (Santo Darmosumarto) ឯកអគ្គរដ្ឋទូតឥណ្ឌូនេស៊ី ប្រចាំកម្ពុជា បានថ្លែងក្នុងសន្និសារព័ត៌មាន ស្តីពីកិច្ចសហប្រតិបត្តិការកម្ពុជា-ឥណ្ឌូណេស៊ី នាដើមសប្តាហ៍នេះ ពីការកើនឡើងលើវិស័យពាណិជ្ជកម្មអង្កររវាងប្រទេសឥណ្ឌូណេស៊ី និងកម្ពុជា។ ទោះបីយ៉ាងណាឯកអគ្គរដ្ឋទូតឥណ្ឌូណេស៊ី ក៏បានបង្ហាញពីបញ្ហាប្រឈមមួយជុំវិញតម្លៃប្រកួតប្រជែង និងថ្លៃដឹកជញ្ជូន ដែលចាំបាច់ណាស់ជាជម្រើសរបស់អ្នកពាណិជ្ជករ។
ឯកឧត្តម សាន់តូ ដារម៉ូស៊ូម៉ារតូ បានថ្លែងថា «យើងឃើញថា ការនាំអង្ករចូលពីប្រទេសកម្ពុជាមិនសូវទាន់មានការប្រកួតប្រជែងជាមួយប្រទេសដទៃក្នុងតំបន់នោះទេ។ ទោះបីយ៉ាងណាឥណ្ឌូណេស៊ី ថ្លឹងថ្លែងអំពីគុណភាព និងតម្លៃ ប្រសិនបើយើងមានតម្រូវការណាមួយនោះ»។
ឯកឧត្តមឯកអគ្គរដ្ឋទូត បានលើកឡើងថា«យើងក៏ត្រូវការទំនិញមានគុណភាពល្អដូចទំនិញរបស់ប្រទេសដទៃទៀតដែរ។ អង្ករ គឺប្រទេសឥណ្ឌូណេស៊ីត្រូវការនាំចូលពីបណ្តាប្រទេសជាដៃគូពាណិជ្ជកម្ម។ សម្រាប់តម្លៃឃើញថា អង្ករកម្ពុជានៅមានចន្លោះខ្វះខាតបន្តិច ដូចជាថ្លៃខ្ពស់ជាង ឬទាបជាង ពោលគឺនៅខ្វះត្រង់ចំណុចនេះបន្តិច។ ទាំងអស់នេះយើងអាចចោទសួរថា តើប្រទេសទាំងពីរអាចចរចារឿងតម្លៃនេះបាន ឬក៏អត់? បើយើងដោះស្រាយបញ្ហានេះបាន បន្ទាប់មកយើងនឹងក្រឡេកទៅមើលគុណភាពវិញ ថាតើថ អាចប្រកួតប្រជែងជាមួយបណ្តាប្រទេសផ្សេងទៀតបាន ឬទេ។ នេះបានសេចក្តីថា យើងនឹងពិនិត្យទៅលើតម្លៃ និងគុណភាព។ ក្រៅពីនេះយើងក៏ត្រូវដោះស្រាយបញ្ហាមធ្យោបាយដឹកជញ្ជូនថា តើអំណោយផល ឬមានភាពងាយស្រួលដែរឬក៏អត់ រួមទាំងតម្លៃចាំបាច់ក្នុងនេះផង។
ឯកអគ្គរដ្ឋទូតឥណ្ឌូណេស៊ី បានលើកឡើងដែរថា សម្រាប់តម្លៃដើមអាចជាដើមហេតុ ដែលធ្វើឱ្យផលិតផលប្រទេសកម្ពុជាមានតម្លៃខ្ពស់ជាង ម្ល៉ោះហើយបើសិនជាអាចកាត់បន្ថយតម្លៃដើម រួមជាមួយគុណភាពល្អ និងតម្លៃប្រកបដោយការប្រកួតប្រជែងនោះ ជាជម្រើសមួយដ៏សំខាន់។
គួរបញ្ជាក់ថា ប្រទេសឥណ្ឌូណេស៊ី ដែលជាប្រទេសផលិតស្រូវអង្ករធំបំផុតទី៤ របស់ពិភពលោក និងជាប្រទេសមានតម្រូវការអង្ករធំបំផុតទី៣ របស់ពិភពលោក កាលពីឆ្នាំ២០២៤ បាននាំចូលអង្ករប្រមាណ៣,៦លានតោន ដើម្បីរក្សាស្ថិរភាពតម្លៃអង្ករនៅក្នុងប្រទេស។
យោងតាមការិយាល័យជាតិ ស្ថិតិឥណ្ឌូណេស៊ី បានឱ្យដឹងនាពេលកន្លងមកថា នៅក្នុងឆ្នាំ២០២៣ ប្រទេសឥណ្ឌូណេស៊ី ផលិតស្រូវអង្ករបានចំនួនជាង៣១លានតោន ដោយកើនឡើង១,៤ភាគរយ បើធៀបនឹងឆ្នាំ២០២២។
ដោយឡែកបើយោងតាមសហព័ន្ធស្រូវអង្ករកម្ពុជា ក្នុងរយៈពេលប្រាំខែ ដើមឆ្នាំ២០២៥នេះ កម្ពុជាបាននាំចេញស្រូវ និងអង្ករចំនួនជាង៤៤៧ពាន់តោន ទៅកាន់ទីផ្សារអន្តរជាតិចំនួន៦៣ប្រទេស នៅទូទាំងពិភពលោក ដោយរកប្រាកចំណូលបានជិតមួយពាន់លានដុល្លារ។
បើយោងតាមប្រភពដដែលនេះបានបញ្ជាក់ដែរថា ក្នុងចំណោមអង្ករ ដែលនាំចេញនេះ រួមមានអង្ករក្រអូបគ្រប់ប្រភេទចំនួនជាង៧៥ភាគរយ, ប្រភេទអង្ករសគ្រាប់វែងជាង១៩ភាគរយ, អង្ករសរីរាង្គចំនួន២.០៣ភាគរយ, អង្ករចំហុយ២.៤៣ភាគរយ និងអង្ករផ្សេងៗទៀតចំនួន០.៦៥ភាគរយ។
ដោយឡែកក្រុមហ៊ុននាំចេញស្រូវអង្ករវិញ មានចំនួន៤៨ក្រុមហ៊ុន ដែលបាននាំចេញស្រូវអង្ករទៅកាន់គោលដៅចំនួន៦៣ ក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន២៦ និងអាស៊ីមានប្រទេសចិន និងកោះហុងកុង ។ ក្រៅពីនេះក៏មានប្រទេសសមាជិកអាស៊ានចំនួនប្រាំ និងគោលដៅ៣០ប្រទេសផ្សេងទៀត មានអាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី និងប្រទេសណូវែលហ្សេឡង់ ផងដែរ៕
