ទីក្រុងប៉េកាំង៖ បុគ្គលិកបម្រើការនៅបណ្តាញភោជនីយដ្ឋានបែបអាមេរិកាំង នៅទីក្រុងប៉េកាំង បាននិយាយនៅដើមសប្តាហ៍នេះថា កាលពីពេលថ្មីៗនេះ ភោជនីយដ្ឋានបានចាប់ផ្តើមប្រើសាច់អូស្ត្រាលី ដែលមានតម្លៃថោកជាងសាច់គោអាម៉េរិក ដែលលែងមានអ្នកនាំចូលប្រទេសចិន ព្រោះតម្លៃពន្ធលើការនាំចូលមានអត្រាខ្ពស់ពេក។
សារព័ត៌មាន គ្លូបល ថែមស៍ របស់ចិន បានធ្វើសេចក្តីរាយការណ៍ថា អវត្តមានសាច់គោអាម៉េរិកនៅលើបញ្ជីមុខ គឺជាសញ្ញាបង្ហាញឱ្យឃើញផលប៉ះពាល់យូរអង្វែងរបស់សង្រ្គាមពាណិជ្ជកម្ម ដែលបង្កឡើងដោយសហរដ្ឋអាមេរិក ចំពោះការប្រកួតប្រជែងនៃផលិតផលអាមេរិកនៅក្នុងទីផ្សារប្រទេសចិន។
បុគ្គលិកនៅសាខាភោជនីយដ្ឋានដ៏ល្បីល្បាញមួយកន្លែងផ្នែកសាច់អាំងបែបអាមេរិក នៅទីក្រុងប៉េកាំង បាននិយាយថា ភោជនីយដ្ឋានបានឈប់ប្រើសាច់គោនាំចូលពីសហរដ្ឋអាមេរិក ប្រហែលមួយខែកន្លងមកហើយ ដោយសារពន្ធនាំចូលថ្លៃពេក។
បុគ្គលិករូបនេះបាននិយាយទៀតថា ក្រៅពីថ្លៃចេញចូលខ្ពស់ពេក ភោជនីយដ្ឋានក៏មិនអាចរកអ្នកផ្គត់ផ្គង់សាច់គោអាម៉េរិកបានដែរ ដោយសារអ្នកផ្គត់ផ្គង់សាច់គោនាំចូលពីសហរដ្ឋអាមេរិក បានប្តូរទៅលក់សាច់គោនាំចូលពីប្រទេសអូស្ត្រាលីវិញ។
សាច់គោអាម៉េរិកត្រូវបានគេចាត់ទុកថា មានគុណភាពល្អជាងគេបន្តិច ប៉ុន្តែសាច់គោនេះមិនអាចប្រកួតប្រជែងជាមួយសាច់គោអូស្ត្រាលី ដែលមានតម្លៃសមរម្យ និងមានគុណភាពល្អប្រហាក់ប្រហែលគ្នាដែរ។
យោងទូរទស្សន៍ CNBC របស់អាម៉េរិក បានឱ្យដឹងថា ក្រៅពីសាច់គោ សូម្បីតែជើងមាន់អាម៉េរិក ក៏ត្រូវមាន់នាំមកពីប្រទេសប្រេស៊ីល ឬប្រទេសរុស្ស៊ី ដណ្តើមទីផ្សារអស់ដែរ។ ផលិតផលកសិកម្មរបស់អាម៉េរិកបាននិងកំពុងបាត់ឈ្មោះពីក្នុងហាងទំនិញ និងលែងមានឈ្មោះលើបញ្ជីមុខម្ហូបតាមភោជនីយដ្ឋានរបស់ចិនតែម្តង។
ចំណែកទីភ្នាក់ងារព័ត៌មាន ស៊ីនហួរ របស់ចិនបានរាយការណ៍ថា រដ្ឋាភិបាលអាម៉េរិកបានប្រកាសដាក់ពន្ធបន្ថែម១០ភាគរយទៀតលើផលិតផលនាំចូលពីប្រទេសចិន។
ជាការឆ្លើយតប គណៈកម្មការពន្ធគយនៃក្រុមប្រឹក្សារដ្ឋរបស់ប្រទេសចិន ធ្លាប់បាននិយាយថា ខ្លួននឹងដាក់ពន្ធបន្ថែមលើផលិតផលមួយចំនួន ដែលនាំចូលពីសហរដ្ឋអាមេរិក រួមទាំងពន្ធបន្ថែម១០ភាគរយលើសាច់គោនាំចូលពីអាម៉េរិកផងដែរ។
គណៈកម្មាការបាននិយាយនៅក្នុងសេចក្តីថ្លែងការណ៍មួយនៅពេលនោះថា ការដាក់ពន្ធឯកតោភាគីដោយសហរដ្ឋអាមេរិកធ្វើឱ្យខូចដល់ប្រព័ន្ធពាណិជ្ជកម្មពហុភាគី បង្កើនបន្ទុកលើធុរកិច្ច និងអ្នកប្រើប្រាស់ជនជាតិអាមេរិក និងបំផ្លាញមូលដ្ឋានគ្រឹះនៃកិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន-អាម៉េរិក។
ទោះបីជាចិន និងអាមេរិកបានចេញសេចក្តីថ្លែងការណ៍រួមមួយ បន្ទាប់ពីកិច្ចចរចាសេដ្ឋកិច្ច និងពាណិជ្ជកម្មនៅទីក្រុងហ្សឺណែវ ហើយបានផ្លាស់ប្តូរ ឬលុបចោលពន្ធបន្ថែមមួយចំនួនលើផលិតផលរបស់គ្នាទៅវិញទៅមក។
សាច់គោអាម៉េរិក បានរងគ្រោះមុនគេនៅប្រទេសចិន ក្នុងសង្គ្រាមពាណិជ្ជកម្មរវាងដៃគូពាណិជ្ជកម្មដ៏ធំបំផុតរបស់ពិភពលោក។ មុនពេលសង្គ្រាមចាប់ផ្ដើម សាច់គោអាម៉េរិក ដូចជាសាច់ស្មា សាច់ជាប់ឆ្អឹងជំនី និងសាច់ចំឡកជាដើម មានតម្លៃថ្លៃណាស់រួចទៅហើយ លុះពន្ធបដិការបស់ទីក្រុងប៉េកាំង ឡើងដល់១២៥ភាគរយ ដើម្បីតបទៅនឹងពន្ធ១៤៥ភាគរយរបស់អាម៉េរិក ធ្វើឱ្យសាច់គោលែងមានអ្នកទិញហូប ព្រោះវាថ្លៃខ្លាំងពេក។
សាច់គោអាម៉េរិក ត្រូវបាននាំចូលទីផ្សារប្រទេសចិនក្នុងតម្លៃទឹកប្រាក់១២៥លានដុល្លារក្នុងមួយខែ ឥឡូវការធ្វើពាណិជ្ជកម្មមុខទំនិញនេះ ការលុបឈ្មោះសាច់គោចេញពីម៉ឺបញ្ជីមុខម្ហូប នៅតាមហាងក្នុងទីក្រុងប៉េកាំង គឺជាការបង្ហាញឱ្យឃើញពីជោគវាសនាអាក្រក់នៃទំនិញរាប់ពាន់មុខរបស់ប្រទេសទាំងពីរ គឺចិន និងអាម៉េរិក។
អ្នកផ្គត់ផ្គង់សាច់គោបាននិយាយទៀតថា «គេត្រូវប្តូរទៅប្រើសាច់គោអូស្ត្រាលីវិញ – សូម្បីតែភោជនីយដ្ឋានសាច់អាំងអាម៉េរិក ក៏ត្រូវប្រើសាច់គោអូស្ត្រាលីដែរ»៕
