សិង្ហបុរី៖ កាលពីថ្ងៃទី២៦ ខែឧសភា ឆ្នាំ២០២៥ ភ្ញៀវទេសចរជនជាតិចិនម្នាក់ ដែលដើរលេងនៅប្រទេសសិង្ហបុរី បានបង្កឱ្យមានការភ្ញាក់ផ្អើលពេញប្រទេសចិន បន្ទាប់ពីត្រូវផាកពិន័យអស់ប្រាក់២០០ដុល្លារសិង្ហបុរី ឬស្មើនឹង១៥៥ដុល្លារអាមេរិក ពីបទយកផ្លែរទុរេនបរិភោគក្នុងបន្ទប់សណ្ឋាគារផ្កាយបួន។
សារព័ត៌មាននៅក្នុងប្រទេសសិង្ហបុរី បានធ្វើសេចក្តីរាយការណ៍ថា ស្ត្រីភ្ញៀវទេសចរជនជាតិចិនម្នាក់នេះ បានយកសាច់ផ្លែទុរេនមួយផ្លែទិញតាមចិញ្ចើមថ្នល់ចូលក្នុងបន្ទប់សម្រាន្តរបស់នាង ដោយមិនដឹងថា វាខុសនឹងច្បាប់សិង្ហបុរីនោះទេ។
អ្នកទេសចររូបនេះ បាននិយាយរំឭថា នាង និងមិត្តភ័ក្តិម្នាក់ បានដើរលេងក្នុងទីក្រុងសិង្ហបុរី ហើយបានទិញផ្លែទុរេនពីតូបលក់នៅតាមដងផ្លូវ។ ដោយគ្មានកន្លែងអង្គុយបិរភោគ អ្នកទាំងពីរក៏បានសម្រេចចិត្តខ្ចប់ផ្លែទុរេនយកទៅសណ្ឋាគារ ដើម្បីបរិភោគជុំគ្នានៅបន្ទប់។
ភ្ញៀវទេសចរណ៍រូបនេះ បានចែករំលែកបទពិសោធន៍របស់នាងនៅលើបណ្តាញទំនាក់ទំនងសង្គម កាលពីថ្ងៃទី២៦ ខែឧសភា ដោយនិយាយរំឭកថា នាងមិនបានដឹងពីបម្រាមរបស់សណ្ឋាគារ នៅក្នុងប្រទេសសិង្ហបុរី ដែលហាមភ្ញៀវមិនឲ្យយកទុរេនចូលបន្ទប់នោះឡើយ។
បុគ្គលិកសណ្ឋាគារបានប្រាប់នាងថា ផាកពិន័យត្រឹម២០០ដុល្លារសិង្ហបុរី គឺតិចតួចទេ កាលមុនធ្លាប់ពិន័យរហូតដល់៥០០ដុល្លារសិង្ហបុរី សម្រាប់អ្នកយកផ្លែទុរេនមកបរិភោគក្នុងបន្ទប់សម្រាន្ត។
ស្ត្រីជនជាតិចិន បាននិយាយថា នាងបានមកដល់ប្រទេសសិង្ហបុរី កាលពីថ្ងៃទី២៤ ខែឧសភា ឆ្នាំ២០២៥ ហើយនៅថ្ងៃបន្ទាប់ នាងបានទិញផ្លែទុរេន និងផ្លែឈើផ្សេងៗទៀត វេចយកទៅបរិភោគក្នុងបន្ទប់សណ្ឋាគារ ដោយសារនៅតូបលក់គ្មានកន្លែងសម្រាប់អង្គុយបរិភោគឡើយ។
នៅថ្ងៃបន្ទាប់ នាងបានទទួលលិខិតមួយសន្លឹកពីសណ្ឋាគារ ដោយប្រាប់នាងថា អ្នកសម្អាតបន្ទប់បានធំក្លិនទុរេននៅក្នុងបន្ទប់របស់នាង ហើយសណ្ឋាគារនឹងកំណត់តម្លៃសម្រាប់សម្អាតក្លិន ចំនួន២០០ដុល្លារសិង្ហបុរី ដើម្បីបំបាត់ក្លិនទុរេនពីក្នុងបន្ទប់។
ក្រោយបង់ប្រាក់ព័យរួចហើយ នាងបានបង្ហោះសារនៅលើបណ្តាញទំនាក់ទំនងសង្គម ដោយរៀបរាប់ថា ពេលជិះតាក់ស៊ីត្រឡប់មកសណ្ឋាគារវិញ មិត្តភក្តិរបស់នាងបានប្រាប់ថា ខ្ចប់ហើយនៅតែធំក្លិនចេញពីប្រអប់ទៀត។ ខ្លាចតែអ្នកបើកបរតាក់ស៊ីធំក្លិនទុរេននេះដែរទេ។
ពេលចូលបន្ទប់ភ្លាម អ្នកទាំងពីរចាប់ផ្តើមនាំគ្នាបរិភោគផ្លែទុរេនយ៉ាងឆ្ងាញ់ ដោយមិនបានគិតច្រើនឡើយ។ ប៉ុន្តែបន្ទាប់ពីត្រឡប់មកពីដើរលេងវិញ នាល្ងាចនោះ នាងបានទទួលសេចក្តីជូនដំណឹងមួយសន្លឹកដាក់នៅលើគ្រែរបស់នាង ដោយសរសេរយ៉ាងច្បាស់ថា “សូមជូនដំណឹងថា អ្នកសម្អាតបន្ទប់របស់យើង បានធំក្លិនទុរេននៅក្នុងបន្ទប់របស់លោកស្រី ដូច្នេះត្រូវពិន័យចំនួន២០០ដុល្លារសិង្ហបុរី ដើម្បីបង់ថ្លៃសម្អាតក្លិន”។
ដោយមិនអស់ចិត្ត នាងប្រឹងរកមើលសារបង្ហោះនៅលើបណ្តាញសង្គម ទើបដឹងថា ភ្ញៀវទេសចរផ្សេងទៀតក៏បានជួបប្រទះបញ្ហាពិន័យស្រដៀងគ្នានេះដែរ ករណីយកផ្លែទុរេនចូលបន្ទប់សម្រាន្ត នៅក្នុងប្រទេសិង្ហបុរី។
ក្រោយពីទទួលបានលិខិតពិន័យភ្លាម នាងបានទាក់ទងទៅផ្នែកគ្រប់គ្រងសណ្ឋាគារ ដើម្បីតវ៉ាចំពោះការផាកពិន័យនេះ ប៉ុន្តែខាងសណ្ឋាគារមិនអនុគ្រោះឱ្យឡើយ ដោយលើកហេតុផលថា ដោយសារតែក្លិនដ៏ខ្លាំងរបស់ទុរេន នៅជាប់ក្នុងបន្ទប់យូរពេក ខាងសណ្ឋាគារត្រូវសម្អាតប្រកបដោយវិជ្ជាជីវៈ ហើយត្រូវបិទបន្ទប់ចោលអស់ជាច្រើនថ្ងៃ ទើបបាត់ក្លិន។
តាមរយៈរៀនមេរៀននេះ អ្នកទេសចរជាច្រើន បានបញ្ចេញមតិយោបល់នៅលើគណនីរបស់នាង ដោយប្រាប់ដល់អ្នកដទៃទៀតថា នៅក្នុងប្រទេសសិង្ហបុរី កុំយកទុរេនចូលក្នុងបន្ទប់សណ្ឋាគារឱ្យសោះ៕
