ម៉ានីល៖ ប្រទេសហ្វីលីពីន និងកូរ៉េខាងត្បូង កំពុងសហការគ្នាក្នុងការអនុវត្តជំនួយឥតសំណងមានទឹកប្រាក់ចំនួន១៦លានដុល្លារសម្រាប់គម្រោងចំនួនពីរ ក្នុងគោលបំណងលើកកម្ពស់ការអភិវឌ្ឍវារីវប្បកម្ម និងពង្រឹងសមត្ថភាពផ្នែកអាជីវកម្មកសិឧស្សាហកម្ម តាមសហគមន៍អ្នកនេសាទនៅមូលដ្ឋាន។
នៅក្នុងសេចក្តីថ្លែងការណ៍មួយកាលពីដើមសប្តាហ៍នេះ ក្រសួងកសិកម្មហ្វីលីពីន បានប្រកាសថា ជំនួយដែលបានចុះហត្ថលេខាជាមួយទីភ្នាក់ងារសហប្រតិបត្តិការអន្តរជាតិកូរ៉េ ហៅកាត់ថា Koicaនឹងជួយសម្រួលដល់ការអនុវត្តគម្រោងច្រើនឆ្នាំសម្រាប់កសិករ និងអ្នកនេសាទហ្វីលីពីន។
បណ្តាញសារព័ត៌មានហ្វីលីពីន បានធ្វើសេចក្តីរាយការណ៍ថា ការងារគម្រោងទីមួយ គឺការកសាងសមត្ថភាពសម្រាប់អភិវឌ្ឍវិស័យវារីវប្បកម្ម ដើម្បីបង្កើនប្រាក់ចំណូលដល់ប្រជាជនហ្វីលីពីន ដែលរស់នៅក្នុងកោះ ឃ្វីម៉ារ៉ាស (Guimaras) ស្ថិតនៅភាគខាងត្បូងទីក្រុងម៉ានិល។ ចំណែកគម្រោងទាំងពីរ មានគោលបំណងជួយប្រជានេសាទអាចបង្កើនប្រាក់ចំណូលតាមរយៈការជំរុញផលិតកម្មវារីវប្បកម្ម និងពង្រីកខ្សែសង្វាក់តម្លៃសម្រាប់រយៈពេលប្រាំពីរឆ្នាំ។
គំនិតផ្តួចផ្តើមនេះ ដែលបានទទួលជំនួយឥតសំណងចំនួន១០លានដុល្លារ ពាក់ព័ន្ធនឹងការអភិវឌ្ឍន៍ហេដ្ឋារចនាសម្ព័ន្ធវារីវប្បកម្ម ដូចជាប្រព័ន្ធភ្ញាស់ពូជត្រី និងស្រះសាកល្បងសម្រាប់ចិញ្ចឹមប្រភេទសត្រី ដែលមានតម្លៃខ្ពស់នៅលើទីផ្សារ។
គម្រោងនេះក៏រួមបញ្ចូលផងដែរនូវការផ្ទេរបច្ចេកវិទ្យាវារីវប្បកម្មកម្រិតខ្ពស់ តាមរយៈកម្មវិធីពង្រឹងសមត្ថភាព និងការអភិវឌ្ឍរចនាសម្ព័ន្ធប្រតិបត្តិការអាជីវកម្មសម្រាប់សហគមន៍អ្នកនេសាទត្រី។
ចំណែកគម្រោងទីពីរ គឺជាគម្រោងអភិវឌ្ឍន៍កសិពាណិជ្ជកម្មសម្រាប់សហគមន៍ ដែលមានទឹកប្រាក់ចំនួនប្រាំមួយលានដុល្លារ ដើម្បីលើកកម្ពស់ជីវភាព និងបង្កើនប្រាក់ចំណូលដល់កសិករក្នុងកោះ លូហ្សូន (Luzon) ស្ថិតនៅខាងជើងទីក្រុងម៉ានីល ប្រទេសហ្វីលីពីន។ គម្រោងនេះនឹងផ្តោតសំខាន់លើការងារធ្វើពិពិធកម្មប្រភពចំណូលរបស់កសិករ និងជំរុញសកម្មភាពដាំដុះរបស់ពួកគាត់។
គម្រោងនេះនឹងកសាងមជ្ឈមណ្ឌលបណ្ដុះបណ្ដាលអាជីវកម្មកសិឧស្សាហកម្មមួយកន្លែងផងដែរ ដើម្បីជួយពង្រឹងសមត្ថភាពផ្នែកបច្ចេកវិទ្យាកសិកម្មហ្វីលីពីន។
ភាគីទាំងពីរនឹងបើកវគ្គបណ្តុះបណ្តាល និងផ្តួចផ្តើមគំនិតសម្រាប់កសាងសមត្ថភាពផ្សេងទៀត ដូចជាណែនាំឱ្យចេះធ្វើអន្តរាគមន៍កសិកម្ម និងជំរុញសកម្មភាពកសិឧស្សាហកម្ម ដើម្បីគាំទ្រកសិករឱ្យក្លាយជាអ្នកទទួលបានផលប្រយោជន៍ពិតប្រាកដពីគម្រោងទាំងពីរនេះ។
ក្រសួងកសិកម្មហ្វីលីពីន បានឱ្យដឹងទៀតថា គម្រោងទាំងពីរនេះបង្ហាញពីការខិតខំប្រឹងប្រែងឥតឈប់ឈរក្នុងការអភិវឌ្ឍ និងធ្វើទំនើបកម្មកសិកម្ម តាមរយៈការសហការគ្នាជាមួយស្ថាប័នក្នុងស្រុក និងស្ថាប័នអន្តរជាតិ ដើម្បីសម្រេចបាននូវកសិឧស្សាហកម្មដ៏ល្អមួយ ដែលអាចរកប្រាក់ចំណូលបាន និងធានានូវសន្តិសុខស្បៀងទូទាំងប្រទេស។
សេចក្តីប្រកាសព័ត៌មានរបស់ក្រសួងកសិកម្មហ្វីលីពីន បានអះអាងថា តាមគម្រោងទាំងពីរនេះ បង្ហាញឱ្យឃើញពីការគាំទ្រឥតងាករេរបស់ទីភ្នាក់ងារសហប្រតិបត្តិការអន្តរជាតិកូរ៉េ សម្រាប់លើកកម្ពស់វិស័យកសិកម្មហ្វីលីពីន និងលើកកម្ពស់ជីវភាពរស់នៅរបស់កសិករ និងប្រជានេសាទហ្វីលីពីន។
សូមរំឭកថា នាពេលកន្លងមក ទីភ្នាក់ងារសហប្រតិបត្តិការអន្តរជាតិកូរ៉េ ធ្លាប់បានផ្តល់ជំនួយឥតសំណងជាទឹកប្រាក់ចំនួន២០,៧៨លានដុល្លារដល់រដ្ឋាភិបាលហ្វីលីពីន សម្រាប់គម្រោងចំនួនបី ដែលកំពុងអនុវត្តដោយក្រសួងកសិកម្មហ្វីលីពីន សម្រាប់អភិវឌ្ឍន៍យន្តការកសិកម្ម កសិកម្មឆ្លាតវៃ និងកែលម្អរបៀបចិញ្ចឹមគោយកទឹកដោះ នៅក្នុងប្រទេសហ្វីលីពីន៕
