ខារ៉ូឡាយណាខាងជើង៖ បន្ទាប់ពីការដំឡើងពន្ធរបស់អាម៉េរិក ប្រទេសចិនបានព្យាករណ៍ថា ខ្លួននឹងកាត់បន្ថយការនាំចេញផលិតផលកសិកម្មរបស់សហរដ្ឋអាមេរិក ដូចជាសាច់ជ្រូក និងសណ្តែកសៀង រួមទាំងទំនិញកសិឧស្សាហកម្មសំខាន់ៗជាច្រើនទៀត ដែលមានប្រភពពីក្នុងរដ្ឋ ខារ៉ូឡាយណាខាងជើង របស់សហរដ្ឋអាម៉េរិក។
យោងតាមប្រព័ន្ធផ្សព្វផ្សាយរបស់អាម៉េរិក បានឱ្យដឹងថា នាយកដ្ឋានកសិកម្ម និងសេវាកម្មអតិថិជន ប្រចាំរដ្ឋខារ៉ូឡាយណាខាងជើង បាននិយាយថា ទីផ្សារនាំចេញដ៏ធំសម្រាប់កសិករ និងអាជីវកម្មកសិឧស្សាហកម្ម នៅរដ្ឋខារ៉ូឡាយណាខាងជើង គឺនៅក្រៅសហរដ្ឋអាម៉េរិក ព្រោះប្រហែល៩៦ភាគរយនៃចំនួនប្រជាជនលើពិភពលោក តែងតែទិញកសិផលរបស់ខ្លួន។ ដូច្នេះ សហរដ្ឋអាម៉េរិក គួរតែយកចិត្តទុកដាក់បើកទីផ្សារបន្ថែមទៀត នៅជុំវិញពិភពលោកសម្រាប់លក់ទំនិញកសិកម្ម និងចំណីអាហារ ផលិតនៅក្នុងរដ្ឋខារ៉ូឡាយណាខាងជើង ហើយគួរតែបន្តបង្កើតទំនាក់ទំនងផ្នែកពាណិជ្ជកម្ម អន្តរជាតិ នៅទូទាំងពិភពលោក។
របាយការណ៍ប្រចាំសប្តាហ៍របស់ក្រសួងកសិកម្មសហរដ្ឋអាមេរិក បានបង្ហាញពីការធ្លាក់ចុះគួរឱ្យកត់សម្គាល់ ទាំងការនាំចេញសណ្តែកសៀង និងសាច់ជ្រូក ទៅកាន់ប្រទេសចិន។ ការលក់សាច់ជ្រូករបស់សហរដ្ឋអាមេរិក គិតត្រឹមថ្ងៃទី១៧ ខែមេសា ឆ្នាំ២០២៥ បានធ្លាក់ពីជាង១២ ០០០តោន ក្នុងមួយសប្តាហ៍ មកនៅត្រឹមតែ ៥ ៨០០តោន ដែលបរិមាណនេះ គឺជាការថយចុះចំនួន៧២ភាគរយក្នុងរយៈពេលត្រឹមតែមួយសប្តាហ៍ ហើយវាក៏ជាចំនួនទាបបំផុត សម្រាប់រយៈពេលដូចគ្នា ក្នុងឆ្នាំ២០២៥នេះ។
អ្នកវិភាគគោលនយោបាយ សម្រាប់មជ្ឈមណ្ឌលស្បៀងអាហារ ថាមពល និងជីវិត បាននិយាយថា «នេះគឺជាថ្ងៃអកុសលសម្រាប់កសិករ នៅក្នុងរដ្ឋខារ៉ូឡាយណាខាងជើង ប៉ុន្តែវាងាយស្រួលទាយទុកមុន។ ប្រទេសចិន គឺជាអ្នកទិញសណ្តែកសៀងដ៏ធំបំផុតរបស់សហរដ្ឋអាមេរិក ដើម្បីយកទៅផលិតជាចំណីសត្វ។ ចិនក៏ជាទីផ្សារ ដែលកំពុងតែរីកចម្រើនយ៉ាងឆាប់រហ័សសម្រាប់ផលិតផលសាច់ជ្រូករបស់អាមេរិក»។
បើយោងតាមទិន្នន័យអំពីអាជីវកម្មសាច់ជ្រូក បានឱ្យដឹងថា ប្រទេសចិន បានលុបចោលការនាំចូលសាច់ជ្រូកពីអាម៉េរិកចំនួន១២ ៣០០តោន ដែលជាការលុបចោលដ៏ធំបំផុត ចាប់តាំងពីខែឧសភា ឆ្នាំ២០២០ ដែលពេលជំងឺកូវីដ-១៩ កំពុងតែឆ្លងរាតត្បាតនៅទូទាំងពិភពលោក។
ចំណែកទិន្នន័យរបស់គយចិនវិញ បានបង្ហាញថា ក្នុងឆ្នាំ២០២៤ ប្រទេសចិន បាននាំចូលសាច់ជ្រូកក្នុងតម្លៃ៤,៦ពាន់លានដុល្លារ ដោយភាគច្រើននាំចូលពីប្រទេសផ្សេងៗ ក្រៅពីសហរដ្ឋអាមេរិក។ រីឯការនាំចេញសាច់ជ្រូករបស់អាមេរិកទៅកាន់ប្រទេសចិនវិញ មានទឹកប្រាក់ចំនួន៨៥៩លានដុល្លារ។
អ្នកវិភាគដដែលនេះ បាននិយាយទៀតថា «សម្រាប់សាច់ជ្រូករបស់កសិករក្នុងរដ្ឋ ខារ៉ូឡាយណា អ្នកទិញធំជាងគេទាំងបួន នៅក្នុងឆ្នាំ២០២៤ គឺកូរ៉េ ជប៉ុន អូស្ត្រាលី និងចិន សរុបទឹកប្រាក់រួមគ្នាជិត៣១៨លានដុល្លារ។ កូរ៉េ បានទិញសាច់ជ្រូកក្នុងទឹកប្រាក់ចំនួន១៨៧លានដុល្លារ ជប៉ុន ចំនួន៦៩,៤លានដុល្លារ អូស្ត្រាលី ចំនួន៣២,៩លានដុល្លារ ចំណែកប្រទេសចិន បានទិញក្នុងទឹកប្រាក់ចំនួន២៨,៦លានដុល្លារ»។
ចំណែកនៅក្នុងសេចក្តីរាយការណ៍ផ្សេងទៀត បានឱ្យដឹងថា ការនាំចេញសណ្តែកសៀងរបស់អាម៉េរិក ក៏បានធ្លាក់ចុះយ៉ាងខ្លាំងពី៧២ ០០០តោន ត្រឹមថ្ងៃទី១០ ខែមេសា មកនៅត្រឹមតែ១ ៨០០តោន ត្រឹមថ្ងៃទី២៥ ខែមេសា ឆ្នាំ២០២៥នេះ។ កាលពីដើមខែមេសា ឆ្នាំ២០២៥ ប្រធានាធិបតីអាម៉េរិក លោក ដូណាល់ ត្រាំ (Donald Trump) បានដំឡើងពន្ធលើទំនិញនាំចូលពីប្រទេសចិន ដំបូងឡើយត្រឹម៨៤ភាគរយ ប៉ុន្តែក្រោយបានដំឡើងថែមដល់១៤៥ភាគរយ។ ក្រោយពេលអាម៉េរិក ដំឡើងពន្ធលឿនបែបនេះ បានបង្ខំឱ្យមានការសងសឹកតបមកវិញ ដោយប្រទេសចិន បានសម្រេចដំឡើងពន្ធលើសហរដ្ឋអាមេរិក ដល់ទៅ១២៥ភាគរយ។
អ្នកវិភាគរូបនេះ បានបន្តទៀតថា រីឯទីផ្សារផ្សេងទៀតសម្រាប់សណ្តែកសៀងរបស់រដ្ឋ ខារ៉ូឡាយណាខាងជើង មានប្រទេសវៀតណាម ម៉ាឡេស៊ី ម៉ិកស៊ិក ប្រទេសថៃ និងកោះតៃវ៉ាន់។ នៅក្នុងឆ្នាំ២០២៤ កោះតៃវ៉ាន់ គឺជាអ្នកធំជាងគេទី១ ដែលបានបញ្ជាទិញក្នុងទឹកប្រាក់ចំនួន១៩,៤ដុល្លារ ចំណែកប្រទេសចិន គឺជាអ្នកទិញធំជាងគេទី២ បានបញ្ជាទិញក្នុងទឹកប្រាកើចំនួន១៦,៩លានដុល្លារ។
ក្រោយមកប្រទេសចិន គឺជាអ្នកទិញសណ្តែកសៀងរបស់សហរដ្ឋអាម៉េរិក ច្រើនជាងគេលេខ១ ដូច្នេះការកាត់បន្ថយនេះនឹងជះឥទ្ធិពលយ៉ាងខ្លាំងដល់កសិឧស្សាហកម្មនៅក្នុងរដ្ឋ ខារ៉ូឡាយណាខាងជើង ដោយសារតែសណ្តែកសៀងស្ថិតក្នុងផលិតផលលំដាប់កំពូលទាំងប្រាំរបស់សហរដ្ឋអាម៉េរិក។
ប្រទេសចិន បានទិញចំនួន៤៨ភាគរយនៃការនាំចេញសណ្តែកសៀងរបស់សហរដ្ឋអាម៉េរិក។ បើយោងតាមការិយាល័យពាណិជ្ជកម្មអាមេរិក ក្នុងឆ្នាំ២០២២ រដ្ឋខារ៉ូឡាយណាខាងជើង បាននាំចេញសណ្តែកសៀងក្នុងទំហំទឹកប្រាក់ចំនួន៤៤៦លានដុល្លារ។ កាលពីឆ្នាំមុន ការនាំចេញសណ្តែកសៀងមានចំនួនច្រើនជាង២៧លានតោន ដែលមានតម្លៃជាទឹកប្រាក់ចំនួន១២,៨ពាន់លានដុល្លារ ហេតុដូច្នេះ កសិករដាំសណ្តែកសៀងរបស់អាម៉េរិកព្រួយបារម្ភថា តើអតិថិជនធំជាងគេរបស់ខ្លួន គឺប្រទេសចិននឹងបន្តទិញពួកគាត់ឬអត់។
យោងតាមទិន្នន័យរបស់ក្រសួងកសិកម្មសហរដ្ឋអាម៉េរិក បានឱ្យដឹងថា កាលពីឆ្នាំ២០២៤ ផ្ទៃដីសណ្តែកសៀង នៅក្នុងរដ្ឋ ខារ៉ូឡាយណាខាងជើង មានប្រមាណ១,៦១លានហិកតា ដោយធ្លាក់ចុះប្រហែល១០ ០០០ហិកតា តិចជាង២០២៣ ដែលមានផ្ទៃដីដាំដុះសរុបចំនួន១,៦២លានហិកតា។
គ្រាន់តែនៅក្នុងឆ្នាំ២០២៨ ដោយសារតែសង្រ្គាមពាណិជ្ជកម្ម លើកដំបូងរបស់លោក ដូណាល់ ត្រាំ ការនាំចេញសណ្តែកសៀងរបស់សហរដ្ឋអាមេរិកទៅកាន់ប្រទេសចិន បានធ្លាក់ចុះជាងពាក់កណ្តាល ចំណែគកសិករចិញ្ចឹមជ្រូក បានប្រឈមមុខនឹងពន្ធដ៏ច្រើនលើសលប់ ដែលធ្វើឱ្យផលិតផលរបស់ពួកគេមិនមានការប្រកួតប្រជែងនៅលើទីផ្សារអន្តរជាតិបានឡើយ។ ការដំឡើងពន្ធនេះ គឺជារឿងលំបាកសម្រាប់កសិករនៅក្នុងរដ្ឋ ខារ៉ូឡាយណាខាងជើង ដែលដើម្បីរស់ ពួកគាត់ត្រូវតែពឹងផ្អែកលើទីផ្សារនៅក្នុងប្រទេសចិន។
ចំណែកអ្នកវិភាគវិញ បានលើកឡើងថា ទោះបីជាមានការខិតខំប្រឹងប្រែង ដើម្បីរក្សាទំនាក់ទំនងពាណិជ្ជកម្មដ៏ល្អជាមួយប្រទេសចិនក៏ដោយ ក៏កសិករនៅរដ្ឋ ខារ៉ូឡាយណាខាងជើង នាពេលបច្ចុប្បន្ននេះ កំពុងមានអារម្មណ៍ថា អ្នកទទួលផលប៉ះពាល់នៃសង្គ្រាមពាណិជ្ជកម្មមុនគេ អាចជាពួកគេតែម្តង៕
