វៀងច័ន្ទ៖ ក្រសួងកសិកម្ម និងរុក្ខាប្រមាញ់ ប្រទេសឡាវ បានឱ្យមន្រ្តីរបស់ខ្លួនមានការប្រុងប្រយ័ត្នខ្ពស់ និង មានការយល់ដឹងអំពីគ្រោះថ្នាក់នៃរោគជំងឺ អង់ត្រាក់ (Anthrax) បន្ទាប់ពីមានការផ្ទុះឡើងនៅក្នុងខេត្តមុដាហាន និងបានឆ្លងពីសត្វទៅមនុស្សយ៉ាងហោចណាស់៣នាក់ហើយ ដែលកំពុងសម្រាកព្យាបាលនៅក្នុងមន្ទីរពេទ្យ ក្នុងខេត្តមុដាហាន ប្រទេសថៃ។
ទីភ្នាក់ងារព័ត៌មានស៊ីនហួរ របស់ចិន បានរាយការណ៍ពីទីក្រុងវៀងច័ន្ទ ប្រទេសឡាវ នៅថ្ងៃទី៦ ខែឧសភា ឆ្នាំ២០២៥ថា ក្រសួងកសិកម្ម និងរុក្ខាប្រមាញ់ឡាវ បានចេញមកព្រមាន និងបានជំរុញឱ្យគ្រប់វិស័យពាក់ព័ន្ធ រួមទាំងប្រជាពលរដ្ឋ និងអាជីវកម្មសាច់ផ្អាកការនាំចូល និងដឹកជញ្ជូនសត្វពាហនៈ ដែលរួមមាន គោ ក្របី ចៀម ពពែ ជ្រូក សេះ និងផលិតផលសត្វ មកពីប្រទេសថៃ ដើម្បីទប់ស្កាត់ការរីករាលដាលនៃជំងឺអាង់ត្រាក់នេះ។
ព្រមជាមួយគ្នានេះដែរ មន្ត្រីមូលដ្ឋាន ជាពិសេសមន្ត្រីឈរជើងតាមតំបន់ព្រំដែនត្រូវតែអនុវត្តវិធានការទប់ស្កាត់ជំងឺយ៉ាងតឹងរ៉ឹង ក្នុងនេះមានទាំងការត្រួតពិនិត្យលម្អិត ហាមនាំចូលសត្វពីប្រទេសថៃ និងបាញ់ថ្នាំសម្លាប់មេរោគលើយានយន្តទាំងអស់ ដែលធ្វើដំណើរពីប្រទេសថៃ ចូលមកកាន់ប្រទេសឡាវ។
ក្រៅពីនេះម្ចាស់បសុសត្វគួរតែតាមដានយ៉ាងដិតដល់នូវសុខភាពសត្វរបស់ខ្លួន ហើយត្រូវរាយការណ៍ពីរោគសញ្ញាគួរឲ្យសង្ស័យប្រាប់មកស្ថាប័នពាក់ព័ន្ធរបស់រដ្ឋាភិបាលជាបន្ទាន់។ ចំណែកសាធារណជនគួរតែតាមដានព័ត៌មានពីហានិភ័យនៃជំងឺ អង់ត្រាក់ ដោយត្រូវត្រៀមខ្លួនជាស្រេចក្នុងការពន្លឿនគម្រោងចាក់វ៉ាក់សាំងការពារ ជាពិសេសសម្រាប់ប្រជាជននៅតំបន់ដែលមានហានិភ័យខ្ពស់។
ជំងឺអង់ត្រាក់បង្កឡើងដោយបាក់តេរីម្យ៉ាងឈ្មោះ បាស៊ីលុស អង់ត្រាស៊ីស (Bacllus Anthracis) គឺជាភា្នក់ងារបង្កើតឱ្យមានជំងឺអង់ត្រាក់ ដែលជាជំងឺដ៏កាចសាហាវកើតឡើងចំពោះសត្វចិញ្ចឹម និងជួនកាលឆ្លងទៅមនុស្សផងដែរ។ បាក់តេរីនេះត្រូវបានរកឃើញដោយគ្រូពេទ្យអាល្លឺម៉ង់ ឈ្មោះ រ៉ូបើត គុច (Robert Koch) នៅក្នុងឆ្នាំ១៨៧៦ ហើយបានក្លាយជាបាក់តេរីដំបូងគេ ដែលត្រូវបានបង្ហាញដោយពិសោធន៍ថា ជាមេរោគភាគច្រើនតាមរយៈការប៉ះពាល់សត្វពាហនៈ។ មនុស្សអាចឆ្លងមេរោគ និងវិវត្តន៍ទៅជាជំងឺទៀតផង ប្រសិនបើអ្នកប៉ះពាល់សត្វ ដែលមានមេរោគ ឬផលិតផលសត្វ ដែលមានមេរោគប្រភេទនេះ។
គួរបញ្ជាក់ថានៅ ខេត្តមុដាហាន ប្រទេសថៃ ត្រូវបានគេរាយការណ៍ឱ្យដឹងថា បានរកឃើញករណីឆ្លងមេរោគ អង់ត្រាក់មួយករណីទៀត សរុបមានអ្នកជំងឺទាំងអស់៣នាក់ហើយ ដែលបានឆ្លងរោគជំងឺកាចសាហាវមួយនេះ។ ក្រៅពីនេះ មន្ត្រីបានចាក់ថ្នាំអង់ទីប៊ីយោទិច ទៅដល់គោ ក្របី ដែលមានហានិភ័យចំនួន១២៤ក្បាល ហើយកំពុងបង្ខំបន្ទាន់ក្នុងការចាក់វ៉ាក់សាំងគោ ក្របីចំនួន ១.២២២ ក្បាលក្នុងរង្វង់ ៥ គីឡូម៉ែត្រ នៅទីកន្លែងកើតហេតុនេះ។
គិតរហូតមកដល់ពេលនេះដែរនៅខេត្តមុនដាហានរបស់ថៃមានសត្វគោ ៣ ក្បាលត្រូវបានគេប្រទះឃើញងាប់ ដែលគេសង្ស័យថា ងាប់ដោយសារជំងឺអង់ត្រាក់៕
