ភ្នំពេញ៖ នៅតាមបណ្តារោងចក្រម៉ាស៊ីនក្នុងស្រុកមួយចំនួន បាននិងកំពុងតែបង្កើនលទ្ធផលភាពប្រមូលទិញស្រូវពីកសិករ ក្នុងរដូវច្រូតកាត់ចុងឆ្នាំ២០២៥ និងដើមឆ្នាំ២០២៦នេះឱ្យបានច្រើនបំផុត ដើម្បីដោះស្រាយបញ្ហាទីផ្សារកកស្ទះស្រូវរបស់ប្រជាកសិករ ខណៈតម្លៃស្រូវប្រភេទខ្លះបានងើបឡើងវិញ។
ជាក់ស្តែងនៅរោងម៉ាស៊ីនកិនស្រូវ ឡាយសែ របស់ក្រុមហ៊ុន ស៊ីធី រ៉ាយស៍កាលពីថ្ងៃទី១៣ ខែវិច្ឆិកា ឆ្នាំ២០២៥នេះ បានប្រកាសប្រមូលទិញស្រូវរំដួលពីកសិករយ៉ាងសកម្ម និងទិញឱ្យបានច្រើនបំផុត ដើម្បីជួយសម្រួលដល់កសិករមិនឲ្យប្រឈមនឹងបញ្ហាក្នុងការរកទីផ្សារលក់ស្រូវ។
ទាក់ទងនិងបញ្ហានេះ ឧកញ៉ា ឡាយ ឈុនហួ ប្រធានសហព័ន្ធស្រូវអង្ករកម្ពុជា និងជាម្ចាស់ក្រុមហ៊ុន ស៊ីធី រ៉ាយស៍ បានមានប្រសាសន៍ថា ក្រុមហ៊ុន ក្រុមហ៊ុន ស៊ីធី រ៉ាយស៍បានចាប់ផ្តើមប្រមូលទិញស្រូវរំដួលពីកសិករ ចាប់តាំងពីថ្ងៃទី១ ខែវិច្ឆិកា ឆ្នាំ២០២៥ មក ដែលមកទល់ពេលនេះ ប្រមូលទិញបានប្រមាណ២ម៉ឺន៥ពាន់តោន។
ឧកញ៉ា ឡាយ ឈុនហួ លើកឡើងថា សម្រាប់បច្ចុប្បន្ននេះ ក្រុមហ៊ុនកំពុងតែផ្តោតតែលើការប្រមូលទិញស្រូវរំដួលប៉ុណ្ណោះ ដោយសារវាជាប្រភេទពូជស្រូវយុទ្ធសាស្រ្តរបស់កម្ពុជា និងដើម្បីរក្សាតម្លៃពូជស្រូវប្រភេទនេះ ឱ្យមានតម្លៃល្អ ចៀសវាងកុំឱ្យមានការធ្លាក់ចុះដូចប្រភេទស្រូវផ្សេងទៀត ដោយសម្រាប់រដូវច្រូតកាត់ឆ្នាំនេះ ក្រុមហ៊ុនមានផែនការប្រមូលទិញស្រូវផ្ការំដួល (សើម) ពី៦ម៉ឺនតោន ទៅ៧ម៉ឺនតោន។
ឧកញ៉ាបានបន្ថែមថា បច្ចុប្បន្ននេះតម្លៃស្រូវផ្ការំដួលល្អប្រសើរជាងមុន ដោយកាលពីដើមរដូវមានតម្លៃក្នុងរង្វង់៩៥០ដល់៩៧០រៀល ក្នុងមួយគីឡូក្រាម (តម្លៃនៅវាលស្រែ) ប៉ុន្តែបច្ចុប្បន្ននេះ បានកើនឡើងដល់ពី៩៩០រៀលដល់ ១០០០រៀលក្នុងមួយគីឡូក្រាម។
យោងតាមផែនការទិញស្រូវរបស់ក្រុមហ៊ុន ស៊ីធី រ៉ាយស៍ មួយថ្ងៃមានចំនួន២ពាន់តោន។ តែយ៉ាងណានៅ នៅថ្ងៃទី១៣ ខែវិច្ឆិកា ឆ្នាំ២០២៥ ក្រុមហ៊ុនបានទទួលទិញស្រូវរហូតប្រហែល ២,៥០០ តោនលើសផែនការ។
ក្រុមហ៊ុន ស៊ីធី រ៉ាយស៍ បានប្តេជ្ញាថា នឹងប្រឹងប្រែងប្រើប្រាស់សមត្ថភាពពេញលេញ ដើម្បីស្រូបទាញស្រូវពីកសិករឲ្យបានច្រើនបំផុត ដើម្បីជួយសម្រួលដល់កសិករមិនឲ្យប្រឈមនឹងបញ្ហាក្នុងការរកទីផ្សារលក់ស្រូវ។ ក្រុមហ៊ុន City Rice នឹងបន្តអនុវត្តការទិញស្រូវផ្ការំដូលជាបន្តបន្ទាប់ ដោយស្មារតីទំនួលខុសត្រូវ និងគោរពតាមគោលនយោបាយរបស់រាជរដ្ឋាភិបាល ដើម្បីរក្សាពូជស្រូវមរតកជាតិខ្មែរមួយនេះ។
ដោយឡែក រោងម៉ាស៊ីនផ្សេងទៀតមានសកម្មក្នុងការប្រមូលទិញស្រូវដែរដូចជា ក្រុមហ៊ុន Amru Rice, រោងម៉ាស៊ីន យិន ម៉ាន់ ស្ថិតនៅស្រុកបវិល ខេត្តបាត់ដំបង, រោងម៉ាស៊ីន ហ្វាង លី ស្រុកមង្គលបូរី ខេត្តបន្ទាយមានជ័យ, រោងម៉ាស៊ីន កិនស្រូវ ងួន ហុង ស្រុក ស្ទោង ខេត្តកំពង់ធំ រួមនឹងរោងម៉ាស៊ីនផ្សេងទៀត។
យោងតាមរបាយការណ៍ពីក្រសួងកសិកម្ម រុក្ខាប្រមាញ់ និងនេសាទបង្ហាញថា បរិមាណស្រូវប្រមូលទិញប្រចាំថ្ងៃកើនឡើងជាងបន្តបន្ទាប់។ ជាក់ស្តែង នៅថ្ងៃទី១២ ខែវិច្ឆិកា ឆ្នាំ២០២៥ រោងម៉ាស៊ីនចំនួន៣៣ ដែលជាដៃគូសហការជាមួយក្រសួងកសិកម្ម ប្រមូលទិញស្រូវបាន ១៦០០០តោន ដែលធ្វើឲ្យបរិមាណប្រមូលទិញស្រូវកើនជាងថ្ងៃទី១១ ខែវិច្ឆិកា ដែលមានបរិមាណតែ១៥ ០០០ តោន៕
