រាជធានីភ្នំពេញ៖ ដោយទទួលបានការអនុញ្ញាតដ៏ខ្ពង់ខ្ពស់ពីឯកឧត្តបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB), តំណាងទូរទស្សន៍អនឡាញ ARDB TV បានចូល អបអរសាទរទិវាសេរីភាពសារព័ត៌មាន និងពិសារភោជនាហារសាមគ្គី រវាងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីជាមួយអ្នកសារព័ត៌មានលើកទី៧ ឆ្នាំ២០២៥ នៅមជ្ឈមណ្ឌលសន្និបាត និងពិព័រណ៌អន្តរជាតិជ្រោយចង្វារ កាលថ្ងៃទី៣ ខែឧសភា ឆ្នាំ២០២៥ ដែលមានអ្នកចូលរួមជាង៥ពាន់នាក់។
យោងតាមឯកឧត្តម នេត្រ ភក្ត្រា រដ្ឋមន្ត្រីក្រសួងព័ត៌មាន បានថ្លែងថា ជំនួបមហាគ្រួសារសារព័ត៌មាននៅថ្ងៃនេះ បានឆ្លុះបញ្ចាំងឱ្យឃើញយ៉ាងពីការយកចិត្តទុកដាក់ខ្ពស់ និងការគិតគូរអំពីសុខទុក្ខអ្នកសារព័ត៌មានទាំងអស់របស់សម្តេចនាយករដ្ឋមន្ត្រី ហ៊ុន ម៉ាណែត នាយករដ្ឋមន្ត្រី ព្រមទាំងថ្នាក់ដឹកនាំរាជរដ្ឋាភិបាលកម្ពុជា ហើយជំនួបនេះក៏បន្តរក្សាបាននូវកេរ្តិ៍តំណែលនៃភាពជាអ្នកដឹកនាំប្រកបដោយគិតបណ្ឌិតដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹត្តសភាពនៃព្រះរាជាណាចក្រកម្ពុជា និងជាប្រធានក្រុមឧត្តមប្រឹក្សាផ្ទាល់របស់ព្រះមហាក្សត្រ។
ឯកឧត្តមរដ្ឋមន្ត្រីក្រសួងព័ត៌មាន បានមានប្រសាសន៍ថា ពិធីជួបជុំប្រចាំឆ្នាំលើកទី៧នេះ ប្រព្រឹត្តិទៅក្នុងបរិយាកាស ដែលប្រទេសកម្ពុជាស្ថិតក្រោមដំបូលត្រជាក់នៃសុខសន្តិភាព ស្ថិរភាពនយោបាយ និងការរីកចម្រើនលើគ្រប់វិស័យ ក្រោមការដឹកនាំប្រកបដោយចក្ខុវិស័យវែងឆ្ងាយ និងភាពឆ្លៀសវៃរបស់សម្តេចមហាបវរធិបតី នាយករដ្ឋមន្ត្រី បន្តពីបិតាសន្តិភាពកម្ពុជា សម្តេចតេជោ ហ៊ុន សែន ដែលក្នុងនោះវិស័យសារព័ត៌មានកម្ពុជាក៏មានការរីកចម្រើន មានសណ្តាប់ធ្នាប់ និងបន្តមានសេរីភាពកាន់តែរីកធំ ប្រកបដោយការទទួលខុសត្រូវ និងគោរពក្រមសីលធម៌វិជ្ជាជីវៈ សេរីភាពសារព័ត៌មានកាន់តែមានភាពប្រសើរឡើង។
បើយោងតាមឯកឧត្តមរដ្ឋមន្ត្រីក្រសួងព័ត៌មាន, វិស័យសារព័ត៌មាន និងប្រព័ន្ធផ្សាយផ្សាយនៅកម្ពុជាមានការវិវត្តន៍គួរឱ្យកត់សម្គាល់ ជាពិសេសនៅក្នុងដំណាក់កាលនៃការរីកចម្រើននៃផ្នែកបច្ចេកវិទ្យា ដែលបាននាំមកនូវប្រព័ន្ធផ្សាយផ្សាយជំនាន់ថ្មី ដូចជាបញ្ញាសិប្បនិម្មិត និងការចាប់ផ្តើមជំនាន់ទី៥ ក្នុងដំណាក់កាលបដិវត្តន៍ឧស្សាហកម្ម០.៤ ។
ឯកឧត្តមបានបញ្ជាក់ថា គិតត្រឹមត្រីមាសទី២ ដើមឆ្នាំ២០២៥នេះ អង្គភាពសារព័ត៌មានទាំងអស់ ដែលបានចុះបញ្ជីនៅក្រសួងព័ត៌មាន មានចំនួន១៦២០អង្គភាព នៅក្នុងនោះប្រព័ន្ធផ្សព្វផ្សាយបុរាណ ដែលមានវិទ្យុ ទូរទស្សន៍ កាសែត ទស្សនាវដ្តី រោងពុម្ព មានចំនួន៧៤៥អង្គភាព និងប្រព័ន្ធផ្សាយផ្សាយទំនើប រួមមាន គេហទំព័រ ទូរទស្សន៍អនឡាញ ទូរទស្សន៍ឌីជីថល និងទូរទស្សន៍ផ្កាយរណបចំនួន៨៧៥អង្គភាព។ នេះមិនទាន់រាប់បញ្ចូលគណនីហ្វេសប៊ុកចំនួន៩លានគណនី, គណនីតិកតុកចំនួន១០លានគណនី ប្រព័ន្ធតេឡេក្រាម ជាង១០លានគណនី គណនីទ្វីតធើ ឬបណ្តាញទំនាក់ទំនងសង្គម (X-អិច) មានជិតកន្លះលានគណនី និងបណ្តាញទំនាក់ទំនង ខូល អែប របស់កម្ពុជាមានប្រមាណកន្លះលានគណនី”។
យោងតាមការសិក្សាប្រជាពលរដ្ឋកម្ពុជា៧២,៤ភាគរយ ប្រើប្រាស់បណ្តាញទំនាក់ទំនងសង្គម ហើយការប្រើប្រាស់បណ្តាញទំនាក់ទំនងសង្គមទាំងនេះ ប្រព័ន្ធតេឡេក្រាម បាននិងកំពុងដើរតួសំខាន់ក្នុងការទទួលព័ត៌មាន និងបញ្ចេញព័ត៌មានរបស់ប្រជាពលរដ្ឋ។
ក្នុងឱកាសនេះផងដែរ, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីបានវាយតម្លៃខ្ពស់ចំពោះក្រសួងព័ត៌មាន ដែលបានខិតខំបំពេញតួនាទីជាសេនាធិការរបស់រាជរដ្ឋាភិបាលក្នុងការលើកកម្ពស់វិស័យសារព័ត៌មានឱ្យមានការរីកចម្រើនជាលំដាប់ ព្រមទាំងបានលើកទឹកចិត្តដល់អ្នកសារព័ត៌មានឱ្យបំពេញភារកិច្ចប្រកបដោយក្រមសីលធម៌វិជ្ជាជីវៈក្នុងការផលិតព័ត៌កាន ការចែករំលែកព័ត៌មានឱ្យបានទូលំទូលាយ និងទាន់ពេល ទាំងក្នុងក្របខណ្ឌជាតិ និងអន្តរជាតិ ។
បន្ថែមលើសពីនេះ សម្តេចមហាធិបតី ក៏បានវាយតម្លៃខ្ពស់ចំពោះអ្នកសារព័ត៌មានទាំងក្របខណ្ឌរដ្ឋ និងឯកជន ដែលបានប្រកាន់ភ្ជាប់នូវក្រមសីលធម៌វិជ្ជាជីវៈសារព័ត៌មាន ដោយបានផ្សព្វផ្សាយព័ត៌មានទាក់ទងនិងកម្មវិធីគោលនយោបាយ ក៏ដូចជាលិខិតបទដ្ឋានគតិយុត្តិ និងលទ្ធផលនានារបស់រាជរដ្ឋាភិបាល។
សម្តេចមហាធិបតី នាយករដ្ឋមន្ត្រី បានមានប្រសាសន៍ថា អ្នកសារព័ត៌មានអាជីព គឺជាកញ្ចក់ឆ្លុះបញ្ចាំងយ៉ាងមានប្រសិទ្ធភាពនៅក្នុងសង្គម ដែលជាមូលដ្ឋាននៃការកសាងប្រសិទ្ធភាពប្រវត្តិសាស្ត្រ និងជួយប្រជាជនឱ្យចៀសផុតពីការបំភាន់ ពីជនមួយចំនួន និងឈ្មួញនយោបាយព្រមទាំងជួយរាជរដ្ឋាភិបាលក្នុងការដោះស្រាយបញ្ហាបានទាន់សភាពការនិងចំគោលដៅ។
សម្តេចមហាបរវធិបតី ហ៊ុន ម៉ាណែត មានប្រសាសន៍សង្កត់ធ្ងន់ថា “គ្មានអ្នកណាស្រលាញ់អាជីពសារព័ត៌មានជាងអ្នកសារព័ត៌មាននោះទេ ហើយគ្មានអ្នកណាអាចថែរក្សា និងបង្កើនតម្លៃក្នុងអាជីពនេះជាងអ្នកសារព័ត៌មានខ្លួនឯងដែរ។ នៅក្នុងនោះប្រកាន់ភ្ជាប់នូវក្រមសីលធម៌វិជ្ជាជីវៈបានច្បាស់លាស់ ដែលផ្អែកទៅលើកត្តាមួយចំនួន ខ្ញុំលើកយកកត្តា៣ ៖ កត្តាទី១) សុក្រឹត្យភាព, កត្តាទី២) សុចរិតភាព និងកត្តាទី៣) គឺទំនួលខុសត្រូវ។ បើមានកត្តាទាំង៣នេះ គឺទទួលបានការគាំទ្រពីប្រជាពលរដ្ឋបានយូរ។ តែផ្ទុយទៅវិញបើគ្មានកត្តាទាំង៣នេះ អ្នកសារព័ត៌មានណាក៏មិនអាចរក្សាអាជីព និងតម្លៃរបស់ខ្លួនបានយូរអង្វែងដែរ ”៕
