អន្តរជាតិ៖ រដ្ឋាភិបាលប្រទេសហ្វីលីពីន កំពុងតែពិចារណាដាក់ចេញគោលនយោបាយថ្មីមួយ ដែលអាចរក្សាទុកប្រេងដូងរបស់ខ្លួនខ្លះ សម្រាប់តម្រូវការក្នុងស្រុកដើម្បីធានាបាននូវការផ្គត់ផ្គង់ និងទប់ស្កាត់ការឡើងថ្លៃបន្ថែមទៀត ខណៈការដឹកជញ្ជូនចេញទៅកាន់ទីផ្សារក្រៅប្រទេសនៅតែបន្តជាធម្មតា។
យោងតាមការចេញផ្សាយលើសារព័ត៌មាន PhilStar Global របស់ហ្វីលីពីន បានឱ្យដឹងថា គោលនយោបាយថ្មីនេះ គឺសម្រាប់រក្សាទុកផលិតផលប្រេងដូងខ្លះ ដើម្បីបំពេញតម្រូវការក្នុងស្រុក ដែលរួមមានតម្រូវការលាយជាជីវៈប្រេងឥន្ធនៈ ឱ្យបានគ្រប់គ្រាន់សិន ទើបអនុញ្ញាតឱ្យចេញនូវអតិរេកប្រេងដូង។
លោក លូស ប្រេនដា បាលីប្រៀ (Luz Brenda Balibrea) ប្រធានផ្នែកទំនាក់ទំនងពាណិជ្ជកម្ម និងព័ត៌មានរបស់អាជ្ញាធរប្រេងដូងហ្វីលីពីន បាននិយាយថា «គម្រោងដែលបានស្នើឡើងនេះ មានគោលបំណងធានាឲ្យបាននូវការផ្គត់ផ្គង់ក្នុងស្រុក និងរក្សាបាននូវស្ថិរភាពតម្លៃដោយមិនរំខានដល់ការប្តេជ្ញាចិត្តនាំចេញរបស់យើងឡើយ»។
លោក បាលីប្រៀ បានបន្ថែមថា នាពេលបច្ចុប្បន្ននេះ អាជ្ញាធរដូងហ្វីលីពីន កំពុងតែសិក្សាលទ្ធភាពជោគជ័យនៃគោលនយោបាយនេះ និងផលប៉ះពាល់ផ្នែកសេដ្ឋកិច្ច។ អាជ្ញាធរដូងហ្វីលីពីន កំពុងតែពិភាក្សាជាមួយភាគីពាក់ព័ន្ធនានាក្នុងឧស្សាហកម្មប្រេងដូង និងទីភ្នាក់ងាររដ្ឋាភិបាលរួចហើយ ទាក់ទងនឹងសំណើនេះ។
គោលនយោបាយរក្សាទុកប្រេងដូងនេះ កើតចេញពីអនុសាសន៍លើកឡើងជូនថ្នាក់ដឹកនាំអាជ្ញាធរដូង ដើម្បីដោះស្រាយបញ្ហាឡើងថ្លៃចំពោះសាច់ដូង និងប្រេងឆា។
ចំណែកប្រទេសថៃ វៀតណាម និងប្រទេសឥណ្ឌូនេស៊ី បានអនុវត្តគោលនយោបាយរឹតបន្តឹងការនាំចេញនេះរួចមកហើយ ដើម្បីដោះស្រាយកង្វះខាតការផ្គត់ផ្គង់ និងការកើនឡើងនៃតម្លៃប្រេងឆាក្នុងប្រទេស។
តម្លៃប្រេងឆានៅលើសកលលោក បានឡើងថ្លៃដោយសារតែមានឧបសគ្គក្នុងការផ្គត់ផ្គង់ពីប្រទេសអ្នកផលិតផ្សេងៗរួមទាំងហ្វីលីពីនផងដែរ។
យោងតាមសន្ទស្សន៍តម្លៃប្រេងឆារបស់អង្គការស្បៀងអាហារ និងកសិកម្មរបស់អង្គការសហប្រជាជាតិ នៅក្នុងខែមីនា បានឱ្យដឹងថា តម្លៃប្រេងដូង បានកើនឡើងជិត២៤ភាគរយពីមួយឆ្នាំទៅមួយឆ្នាំ។
អង្គការស្បៀងអាហារ និងកសិកម្មរបស់អង្គការសហប្រជាជាតិ បានសន្មត់ថា ការឡើងថ្លៃជាសកលនឹងបន្តកើនឡើងទៀត សម្រាប់ប្រេងដូង ប្រេងសណ្តែក និងប្រេងផ្កាឈូករ័ត្ន ដោយសារការផ្គត់ផ្គង់ធ្លាក់ចុះ គួបផ្សំនឹងការកើនឡើងនៃតម្រូវការអ្នកប្រើប្រាស់។ កំណើននៃតម្រូវការប្រេងឆាក៏ត្រូវបានកើនឡើងផងដែរ ដោយការពង្រីកឧស្សាហកម្មជីវឥន្ធនៈនៅលើពិភពលោក។
យោងតាមរបាយការណ៍របស់សហរដ្ឋអាម៉េរិក បានឱ្យដឹងថា ថ្វីបើមានការកើនឡើងនៃផលិតកម្មក៏ដោយ ការនាំចេញប្រេងដូងរបស់ប្រទេសហ្វីលីពីន ត្រូវបានគេព្យាករណ៍ថា នឹងនៅថេរដដែល សម្រាប់ទីផ្សារឆ្នាំ២០២៥-២០២៦ ដោយគិតចាប់ពីខែតុលា ដល់ខែកញ្ញា មានបរិមាណជាង១,១៣លានតោន ដោយសារតម្រូវការខ្ពស់សម្រាប់លាយជាប្រេងឥន្ទនៈ។
ទោះជាយ៉ាងណាក៏ដោយ លោក បាលីប្រៀ បានចង្អុលបង្ហាញថា វិធានការនេះ គឺជាជម្រើសចុងក្រោយបំផុត ក្នុងចំណោមជម្រើសជាច្រើន ដែលត្រូវបានអាជ្ញាធរដូងហ្វីលីពីន លើកមកពិចារណា ចាប់តាំងពីតម្រូវឱ្យមានការឧបត្ថម្ភធនពីរដ្ឋាភិបាល ដើម្បីផ្សាភ្ជាប់គម្លាតរវាងតម្លៃទីផ្សារដែលកំពុងមាន និងតម្លៃដែលបានកំណត់។
ទោះជាយ៉ាងណាក៏ដោយ មន្ត្រីអាជ្ញាធរដូងហ្វីលីពីន បានកត់សម្គាល់ថា ប្រសិនបើតម្លៃប្រេងឆាក្នុងស្រុកកើនឡើងខ្លាំងពេក ដែលនឹងធ្វើឱ្យប៉ះពាល់ដល់ឧស្សាហកម្មក្នុងស្រុក ដូចជាចំណីអាហារ និងការដឹកជញ្ជូន នោះអាជ្ញាធររអាចជូបគ្នាជាមួយភ្នាក់ងារពាក់ព័ន្ធជាបន្តទៀត ដើម្បីពិភាក្សាអំពីគោលការណ៍កំណត់តម្លៃ។
ជាលទ្ធផលតម្លៃប្រេងដូង ដែលបានចម្រាញ់ បន្សុទ្ធ និងបំបាត់ក្លិនរួចហើយ អាចប្រើជាប្រេងឆាបាន ឥឡូវមានតម្លៃក្នុងរង្វង់៣,៣៦ដុល្លារ ក្នុងមួយគីឡូក្រាម មានន័យថា តម្លៃលក់រាយនៅតាមទីផ្សារស្ថិតក្នុងរង្វង់៣,២៩ដុល្លារ ក្នុងមួយលីត្រ៕
