ក្រុងប្រ៊ុចសែល៖ ចាប់ពីសមរភូមិមុខ នៅក្នុងប្រទេសអ៊ុយក្រែន រហូតដល់តំបន់ដីសើមរបស់ប្រទេសបែលហ្ស៊ិក គឺគ្មានភ្លៀងធ្លាក់ទេនៅក្នុងខែមីនា កន្លងមកនេះ ដូច្នេះ វាបានធ្វើឱ្យបណ្តាប្រទេសក្នុងទ្វីបអឺរ៉ុបភាគច្រើន ជួបប្រទះគ្រោះរាំងស្ងួតហួតហែង នៅពាក់កណ្តាលរដូវរំហើយ ក្នុងខែមេសា ដែលអាចធ្វើឱ្យមានបញ្ហាដល់ខ្សែសង្វាក់ផ្គត់ផ្គង់ និងបង្កការលំបាកដល់កសិករ។
គ្រោះរាំងស្ងួតដំបូងបង្កបញ្ហាដល់ខ្សែសង្វាក់ផ្គត់ផ្គង់ស្បៀងអាហារ និងបង្កការលំបាក់ដល់កសិករ។ លើសពីនេះ វាកំពុងបង្កផលប៉ះពាល់ដល់សក្តានុពលសម្រាប់ឧស្សាហកម្ម ពាណិជ្ជកម្ម និងសន្តិសុខស្បៀងសកល ហើយកំពុងបង្កភាពវឹកវរទៅលើភាពចលាចលសេដ្ឋកិច្ច ដែលបង្កឡើងដោយការដំឡើងពន្ធរបស់ប្រធានាធិបតីអាម៉េរិក លោក ដូណាល់ ត្រាំ។
តាមរយៈការធ្វើបច្ចុប្បន្នភាពថ្មីៗបំផុតរបស់ក្រុមឃ្លាំមើលភាពរាំងស្ងួតនៅអឺរ៉ុប បានឱ្យដឹងថា ចាប់ពីពាក់កណ្តាលខែមីនា ឆ្នាំ២០២៥នេះ ផ្នែកខ្លះនៃប្រទេសប៉ូឡូញ អ៊ុយក្រែន ក្រិក បាល់កង់ ស៊ុយអែត អៀរឡង់ និងអាល្លឺម៉ង់ ព្រមទាំងតាមតំបន់ជាច្រើនទៀត ត្រូវបានក្រុមអ្នកឃ្លាំមើលចាត់ចូលក្នុងសញ្ញាព្រមាន ដោយដាក់ពណ៌ទឹកក្រូច ឬពណ៌ក្រហម ស្របពេលតំបន់ឆ្នេរសមុទ្រភាគអាគ្នេយ៍នៃប្រទេសអេស្ប៉ាញ ត្រូវបានប្រកាសអាសន្ន ដោយដាក់ពណ៌ក្រហមរួចហើយ ដើម្បីបញ្ជាក់ពីភាពរាំងស្ងួត។
ព្រមជាមួយគ្នានេះដែរ អ្នកវិទ្យាសាស្ត្របាននិយាយថា ការគ្រប់គ្រងទឹកមិនបានល្អ ក៏ជាចំណែកបង្កឱ្យមានភាពរាំងស្ងួត គួបផ្សំនឹងការប្រែប្រួលអាកាសធាតុ ដែលបង្កើតឡើងដោយកត្តាមនុស្ស បង្កឱ្យមានការធ្លាក់ភ្លៀងមិនទៀងទាត់ និងធ្វើឱ្យសីតុណ្ហភាពក្តៅកាន់តែខ្លាំង ដែលនាំទៅបង្កភាពរាំងស្ងួតកាន់តែធ្ងន់ធ្ងរ និងញឹកញាប់ជាងពេលកន្លងមក។
លោក អេន្ទ្រា តូរ៉េទី (Andrea Toreti) អ្នកស្រាវជ្រាវនៃក្រុមឃ្លាំមើលភាពរាំងស្ងួត បាននិយាយថា កង្វះទឹកភ្លៀងរួមបញ្ចូលគ្នាជាមួយនឹងអាកាសធាតុក្តៅខុសធម្មតា នៅទ្វីបអឺរ៉ុប នៅក្នុងខែមីនា ឆ្នាំ២០២៥នេះ គឺជាមូលហេតុនាំឱ្យមានគ្រោះរាំងស្ងួត។
លោកបានមានប្រសាសន៍ទៀតថា «ស្ថានភាពដែលយើងសង្កេតឃើញ គឺកំពុងតែធ្វើឲ្យមានការព្រួយបារម្ភថែមទៀត ជាពិសេសនៅអឺរ៉ុបកណ្តាល និងអឺរ៉ុបខាងកើត។ នៅទីនោះ បរិមាណទឹកភ្លៀងបាននិងកំពុងថយចុះ ហើយវាកំពុងតែថយចុះកាន់តែតិចទៅៗ។ យើងកំពុងតាមដានរឿងនេះយ៉ាងដិតដល់ ព្រោះវាមានការវិវត្តន៍លឿនណាស់»។
ក្រុមអ្នកវិទ្យាសាស្ត្រដដែល បាននិយាយព្រមានថា ឥទ្ធិពលនៃការប្រែប្រួលអាកាសធាតុ ដែលបង្កើតឡើងដោយកត្តាមនុស្សនឹងនាំឱ្យមានគ្រោះរាំងស្ងួតកាន់តែធ្ងន់ធ្ងរ និងញឹកញាប់ជាងមុន នៅក្នុងទ្វីបអឺរ៉ុប។
លោក អេន្ទ្រា តូរ៉េទី បាននិយាយទៀតថា លក្ខខណ្ឌធម្មជាតិនាពេលបច្ចុប្បន្ន គឺស្រដៀងគ្នាទៅនឹងគ្រោះរាំងស្ងួតដ៏ធ្ងន់ធ្រនៅក្នុងទ្វីបអឺរ៉ុប កាលពីឆ្នាំ២០១៨។ គ្រោះរាំងស្ងួតនៅឆ្នាំ២០២៥នេះ នឹងធ្ងន់ធ្ងរដល់កម្រិតណា គឺវាអាស្រ័យលើអាកាសធាតុក្នុងរយៈពេលប៉ុន្មានសប្តាហ៍ខាងមុខនេះ ហើយមើលទៅដូចជាមិនល្អសោះ។
លោកបានមានប្រសាសន៍បន្ថែមទៀតថា នៅក្នុងសប្តាហ៍ខាងមុខនេះ ស្ថានភាពរាំងស្ងួតនៅក្នុងប្រទេសអាល្លឺម៉ង់ នឹងកាន់តែធ្ងន់ធ្ងរជាងប្រទេសដទៃទៀត។ មជ្ឈមណ្ឌលឃ្លាំមើលគ្រោះរាំងស្ងួតរបស់អាឡឺម៉ង់ បានបង្ហាញសញ្ញាថា ស្ថានភាពដីកាន់តែស្ងួតហួតហែង ដែលមិនអាចឱ្យដំណាំដុះលូតលាស់បានឡើយ។
ស្របពេលជាមួយគ្នានេះដែរ ទន្លេដ៏ធំជាសរសៃឈាមសម្រាប់ដឹកជញ្ជូនទំនិញនៅអឺរ៉ុបខាងលិច កំពុងតែជួបប្រទះនឹងកម្រិតទឹកទាបខុសពីធម្មតា ធ្វើឱ្យនាវាដឹកទំនិញពិបាកឆ្លងកាត់ ដែលធ្វើឱ្យការដឹកជញ្ជូនឡើងថ្លៃ និងរាំងស្ទះដល់ខ្សែសង្វាក់ផ្គត់ផ្គង់។
ចំណែកនៅប្រទេសបែលហ្សិកវិញ ក៏កំពុងប្រឈមមុខនឹងបញ្ហាខ្វះទឹកភ្លៀងយ៉ាងខ្លាំងផងដែរ។ យោងតាមវិទ្យាស្ថានឧតុនិយមរបស់ប្រទេសបែលហ្សិក បានឱ្យដឹងថា កាលពីដើមខែមីនា ឆ្នាំ២០២៥នេះ មានភ្លៀងធ្លាក់តិចតួចបំផុត គឺគ្មានភ្លៀងអស់រយៈពេល៣៣ថ្ងៃរួចទៅហើយ ដោយមានភ្លៀងធ្លាក់ត្រឹមតែ៧,៨មីលីម៉ែត្រប៉ុណ្ណោះ ដែលជាមធ្យម ត្រូវមានកម្រិតទឹកភ្លៀងប្រហែល៥០មីលីម៉ែត្រ។
រីឯលោក ប៉ាស្កាល់ ម័រម៉ាល់ (Pascal Mormal) អ្នកជំនាញខាងអាកាសធាតុនៃវិទ្យាស្ថានឧតុនិយម បានមានប្រសាសន៍ថា «យើងមិនដែលជួបប្រទះគ្រោះរាំងស្ងួតមានរយៈពេលវែងបែបនេះទេ»។
ប៉ុន្តែ ទោះបីមានគ្រោះរាំងស្ថួតបែបនេះក៏ដោយ ប្រទេសបែលហ្ស៊ិក នៅមានដីសើមខ្លះដែរ ដោយសារកាលពីឆ្នាំ២០២៤ មានភ្លៀងធ្លាក់ច្រើន ដែលធ្វើឱ្យបរិមាណទឹកក្នុងដីនៅសេសសល់ ដូច្នេះមិនទាន់មានហានិភ័យនៃគ្រោះរាំងស្ងួតធ្ងន់ធ្ងរពេកឡើយ។
ស្ថានភាពរាំងស្ថួតកាន់តែអាក្រក់ឡើងៗ នៅអឺរ៉ុបកណ្តាល និងខាងកើត នៅក្នុងរដូវរងាឆ្នាំនេះ ដែលអាកាសធាតុស្ងួតហួតហែងខុសពីកាលឆ្នាំមុន។ ក្នុងចំណោមប្រទេស ដែលមានគ្រោះរាំងស្ងួតខ្លាំងជាងគេ គឺប្រទេសប៉ូឡូញ និងប្រទេសអ៊ុយក្រែន ដែលជាប្រទេសនាំចេញគ្រាប់ធញ្ញជាតិឈានមុខគេលើពិភពលោក។
លោក ក្លាស ណេនដែល (Claas Nendel) អ្នកស្រាវជ្រាវផ្នែកកសិកម្ម បានព្រមាន កាលពីដើមខែមេសានេះថា «ជិតចូលដល់រដូវប្រមូលផលហើយ ប៉ុន្តែមើលទៅអាចទទួលទិន្នផលទាប ដោយសារគ្រោះរាំងស្ងួតខ្លាំងពេលអាចជះឥទ្ធិពលអាក្រក់ដល់ទីផ្សារគ្រាប់ធញ្ញជាតិលើពិភពលោក»៕
គ្រោះរាំងស្ងួតនៅរដូវរំហើយ កំពុងគំរាមកំហែងដល់វិស័យកសិកម្ម នៅអឺរ៉ុប និងធ្វើឱ្យជួបវិបត្តិខ្វះស្បៀងអាហារ
