បាងកក៖ សមាគមអ្នកចិញ្ចឹមគោរបស់ថៃ រួមជាមួយនឹងអង្គការពាក់ព័ន្ធជាង៦០ បានប្រមូលផ្តុំគ្នា នៅក្រសួងកសិកម្ម និងសហករណ៍ ដើម្បីបង្ហាញពីក្តីបារម្ភចំពោះផែនការរបស់រដ្ឋាភិបាលក្នុងការអនុញ្ញាតឱ្យមានការនាំចូលសាច់គោពីសហរដ្ឋអាម៉េរិក ដើម្បីជាថ្នូរនឹងឱនភាពពាណិជ្ជកម្មមួយចំនួនបង្កឡើងដោយអាម៉េរិក។
កសិករបារម្ភថា វិធានការអនុញ្ញាតឱ្យនាំចូលបែបនេះនឹងប៉ះពាល់ដល់ទីផ្សារក្នុងស្រុក ដែលកំពុងស្ថិតក្រោមសម្ពាធរួចហើយពីការនាំចូលគោក្នុងតម្លៃទាបពីប្រទេសអូស្ត្រាលី និងប្រទេសនូវែលសេឡង់។
លោក សិទ្ធិផន បូរ៉ាណាណាត់ (Sitthiporn Boorananath) អនុប្រធានសមាគម បាននិយាយថា សមាជិកសមាគម បានដាក់ញត្តិតវ៉ាទៅនាយករដ្ឋមន្ត្រីថៃរួចហើយ។
លោកបាននិយាយថា «យើងជឿថា ការអនុញ្ញាតឱ្យមានការនាំចូលសាច់គោ និងសាច់សត្វពីសហរដ្ឋអាម៉េរិក នឹងធ្វើឱ្យការខិតខំរបស់កសិករថៃជួបបញ្ហាកាន់តែធ្ងន់ធ្ងរ។ យើងមានការលំបាករួចទៅហើយដោយឥទ្ធិពលនៃកិច្ចព្រមព្រៀងពាណិជ្ជកម្មសេរី ជាមួយអូស្ត្រាលី និងនូវែលសេឡង់»។
សមាគមបានលើកឡើងថា គោលនយោបាយនេះផ្ទុយនឹងច្បាប់របស់ប្រទេសថៃ ដែលហាមប្រាមការប្រើអ័រម៉ូនលូតលាស់ដល់បសុសត្វ ដែលនៅសហរដ្ឋអាម៉េរិក គេចាត់ទុកជារឿងធម្មតា។
លោក សិទ្ធិផន បានរិះគន់ការដោះស្រាយនាពេលថ្មីៗនេះរបស់រដ្ឋាភិបាលថៃ លើបញ្ហាស្រដៀងគ្នានេះ ដោយលោកនិយាយថា កសិករចិញ្ចឹមគោខ្នាតតូច គេមិនលើកមកនិយាយទេ។ លោកបានកត់សម្គាល់ថា «រដ្ឋាភិបាលបានផ្តល់អាទិភាពដល់អ្នកផលិតសាច់ជ្រូកធំៗ ដល់ពេលឥឡូវមានការជំរុញឱ្យនាំចូលសាច់គោ ឬគ្រឿងក្នុងសាច់គោថែមទៀត»។
លោកបានរិះគន់បន្តទៀតថា សមាគមក៏នឹងដាក់ញត្តិរបស់ខ្លួនទៅរដ្ឋមន្ត្រីក្រសួងហិរញ្ញវត្ថុ និងពាណិជ្ជកម្ម ដោយជំរុញឲ្យគិតពិចារណាលើគោលការណ៍នេះឡើងវិញ។
សមាគមអ្នកចិញ្ចឹមគោរបស់ថៃ បានអះអាងថា ការនាំចូលសាច់គោពីអាម៉េរិកនឹងបង្កផលប៉ះពាល់ដោយផ្ទាល់ដល់កសិករថៃជាង១,៤លានគ្រួសារ ដែលកំពុងជួបបញ្ហាចំពោះការធ្លាក់ចុះតម្លៃគោ។ កសិករទាំងនេះបានជួបប្រទះការលំបាកផ្នែកហិរញ្ញវត្ថុដោយសារតែការនាំចូលក្រោមកិច្ចព្រមព្រៀងពាណិជ្ជកម្មសេរីជាមួយប្រទេសអូស្ត្រាលី។
លោក សិទ្ធិផន បានបន្តថា «គោលការណ៍នេះនឹងបង្កផលប៉ះពាល់ផ្ទាល់ដល់កសិករចិញ្ចឹមគោរបស់ថៃ ដែលមានប្រមាណ១,៤លានគ្រួសារ និងគោក្របីជាង៩,៦លានក្បាល ដែលមានតម្លៃជាង៧,៧៨ពាន់លានដុល្លារ»។
កសិករចិញ្ចឹមគោម្នាក់ មកពីខេត្តផាត់ថាឡាង បាននិយាយថា ប្រសិនបើរដ្ឋាភិបាលអនុវត្តគោលការណ៍អនុញ្ញាតឱ្យមានការនាំចូលសាច់គោ និងសាច់ក្របីនោះ កសិករចិញ្ចឹមគោនៅទូទាំងប្រទេសនឹងជំទាស់។
លោកបានមានប្រសាសន៍ថា «រដ្ឋាភិបាលជឿថា គោលនយោបាយនេះ គឺជាឧបករណ៍ចរចារ ឬការផ្លាស់ប្តូរសម្រាប់ការស្នើសុំកាត់បន្ថយពន្ធនាំចូលសម្រាប់ផលិតផលថៃទៅកាន់សហរដ្ឋអាម៉េរិក។ ការនាំចូលនេះនឹងធ្វើឲ្យប៉ះពាល់ដល់កសិករចិញ្ចឹមគោក្នុងស្រុក ជាពិសេសកសិករខ្នាតតូច ដែលកំពុងរងគ្រោះដោយតម្លៃគោក្របី ហើយអ្នកខ្លះឈប់ចិញ្ចឹមគោតែម្តង»។
ក្រៅពីព្រួយបារម្ភចំពោះបញ្ហាសេដ្ឋកិច្ច សមាគមអ្នកចិញ្ចឹមគោ បានព្រមានថា ការនាំចូលសាច់គោរបស់អាម៉េរិកអាចបង្កផលប៉ះពាល់ដល់កេរ្តិ៍ឈ្មោះរបស់ប្រទេសថៃ នៅក្នុងទីផ្សារពិភពលោក។ ប្រទេសដូចជា ម៉ាឡេស៊ី វៀតណាម និងចិន ដែលមានស្តង់ដារតឹងរ៉ឹងទាក់ទងនឹងអ័រម៉ូនលូតលាស់ អាចរារាំងមិនឱ្យនាំចូលសាច់គោថៃ។
សមាគមអ្នកចិញ្ចឹមគោរបស់ថៃ បានទាមទារឱ្យរដ្ឋាភិបាលពិចារណាឡើងវិញនូវគោលនយោបាយនាំចូលបែបនេះ ដើម្បីការពារកសិករ និងធានាស្ថិរភាពសេដ្ឋកិច្ចរយៈពេលវែងរបស់ប្រទេសថៃ៕
