អន្តរជាតិ៖ មន្ត្រីជាន់ខ្ពស់របស់ប្រទេសម៉ាឡេស៊ី កាលពីថ្ងៃទី១១ ខែមេសា ឆ្នាំ២០២៥ បានអំពាវនាវដល់កសិករ ឬសហគ្រឹន នៅក្នុងរដ្ឋសារ៉ាវ៉ាក់ (Sarawak) គួរតែផ្តល់អាទិភាពដល់ការផលិតស្បៀង ដើម្បីរក្សាការផ្គត់ផ្គង់ផលិតផលប្រកបដោយស្ថិរភាពសម្រាប់ទីផ្សារនាំចេញ។
លោកបណ្ឌិត ស្តេហ្វិន រុនឌី អ៊ូទុម (Stephen Rundi Utom) រដ្ឋមន្ត្រីក្រសួងឧស្សាហកម្ម ស្បៀងអាហារ ទំនិញ និងអភិវឌ្ឍន៍តំបន់ បានចង្អុលបង្ហាញថា ខណៈពេលផលិតផលរបស់រដ្ឋសារ៉ាវ៉ាក់ មានតម្រូវការខ្ពស់នៅបរទេស វិស័យកសិកម្មរបស់រដ្ឋនៅតែបន្តប្រឈមមុខនឹងបញ្ហាដោយសារផលិតកម្មក្នុងស្រុកមិនស៊ីសង្វាក់គ្នា ដែលជាកត្តារារាំងដល់ការរីកចម្រើនផ្នែកឧស្សាហកម្មនេះ មិនឱ្យឈានដល់ទីផ្សារអន្តរជាតិទាំងមូល។
លោកបានជំរុញឱ្យមន្ទីរកសិកម្មបង្កើនកិច្ចខិតខំប្រឹងប្រែងរបស់ខ្លួនក្នុងការណែនាំកសិករឱ្យដាំដំណាំណា ដែលមានតម្រូវការខ្ពស់នៅលើទីផ្សារ និងបានអំពាវនាវឱ្យមានការរៀបចំសិក្ខាសាលាអប់រំដល់អ្នកអ្នកផលិត ឱ្យយល់ពីរបៀបថែរក្សាទិន្នផលឱ្យជាប់លាប់។
លោកបានមានប្រសាសន៍ថា «ដើម្បីរក្សាបាននូវការប្រកួតប្រជែងជាសកល យើងត្រូវការការផ្គត់ផ្គង់ប្រកបដោយស្ថិរភាព និងអាចទុកចិត្តបាន។ ប្រសិនបើយើងមានទីផ្សារ ប៉ុន្តែមិនមានការផ្គត់ផ្គង់ទេ យើងមិនអាចទ្រទ្រង់ឧស្សាហកម្មនេះបានទេ»។
លោករដ្ឋមន្ត្រីបានថ្លែងបែបនេះក្នុងដំណើរទស្សនកិច្ច ក្នុងពិព័រណ៍ម្ហូបអាហារ ក្នុងប្រទេសសិង្ហបុរី កាលពីថ្ងៃទី១០ ខែមេសា ឆ្នាំ២០២៥។
លោកបានមានប្រសាសន៍ទៀតថា យុទ្ធសាស្ត្រអភិវឌ្ឍន៍ ឆ្នាំ២០៣០ ក្រោយវិបត្តកូវីដ-១៩ គួរតែ
ផ្តល់សិទ្ធិអំណាចដល់កសិករឱ្យទទួលបានប្រាក់ចំណូលកាន់តែប្រសើរឡើង ជាពិសេសតាមរយៈការទទួលយកនូវបច្ចេកទេសកសិកម្មទំនើប ដើម្បីជម្នះបញ្ហាផលិតកម្មដែលមានរយៈពេលយូរ។
ជាមួយគ្នានេះ លោកបានជំរុញឱ្យកសិករផ្លាស់ប្តូរផ្នត់គំនិតរបស់ពួកគេ និងបញ្ឈប់ការចាត់ទុក
វិស័យកសិកម្ម ជាវិស័យដែលមានចំណូលទាប ដោយសង្កត់ធ្ងន់ថា ឧស្សាហកម្មនេះដើរតួនាទីយ៉ាងសំខាន់ក្នុងការធានាសន្តិសុខស្បៀងក្នុងស្រុក និងនៅលើសកលលោក។
នៅក្នុងពិព័រណ៍ពាណិជ្ជកម្មនេះ លោករដ្ឋមន្ត្រី បានពណ៌នាថា វាជាវេទិកាដ៏ល្អសម្រាប់ផលិតផលរបស់ រដ្ឋសារ៉ាវ៉ាក់ ដើម្បីជ្រាបចូលទៅក្នុងទីផ្សារពិភពលោក។
លោកបានសង្កត់ធ្ងន់ថា «មានរឿងជាច្រើន ដែលកសិករត្រូវរៀនពីប្រទេសផ្សេងទៀត អំពីស្តង់ដារវេចខ្ចប់ រហូតដល់ការរំពឹងទុករបស់ទីផ្សារ។ វាក៏ជាឱកាសដ៏ល្អក្នុងការកសាងទំនាក់ទំនងអន្តរជាតិផង
ដែរ។ ទោះជាយ៉ាងណា មុននឹងធ្វើដូច្នេះ យើងត្រូវតែធានាថា មានការផ្គត់ផ្គង់បន្ត»។
ក្នុងពិព័រណ៍ម្ហូបអាហារ ក្នុងប្រទេសសិង្ហបុរី ឆ្នាំ២០២៥ ត្រូវបានគេលើកឡើងថា ជាពិព័រណ៍ពាណិជ្ជកម្មអាហារ និងភេសជ្ជៈធំបំផុតរបស់អាស៊ី ដោយបានដំណើរការពីថ្ងៃទី៨ ដល់ថ្ងៃទី១១ ខែមេសា ហើយមានចំនួន៨០សាលធំៗ មានអ្នកតាំងពិព័រណ៍ចំនួន១ ៥០០មកពីជាង៥០ប្រទេស និងតំបន់៕
