ភ្នំពេញ៖ បណ្ណាល័យរបស់ធនាគារអភិវឌ្ឍន៍ជនបទ និងកសិកម្ម ដែលមានឈ្មោះថា មជ្ឈមណ្ឌលស្រាវជ្រាវ អគ្គបណ្ឌិតសភាចារ្យ អូន ព័ន្ធមុនីរ័ត្ន និង APRACA Center of Excellence នឹងដាក់សម្ពោធដាក់ឱ្យប្រើប្រាស់ជាផ្លូវការ នៅថ្ងៃទី១៨ ខែមេសា ឆ្នាំ២០២៥ ស្អែកនេះ។
ការបង្កើតបណ្ណាល័យ និងស្ថាប័នស្រាវជ្រាវទាំងពីរនេះ ក្នុងគោលបំណង លើកកម្ពស់ការស្រាវជ្រាវ និងអភិវឌ្ឍន៍ (R&D) ក៏ដូចជាប្រមូលផ្តុំ និងចងក្រងឯកសារទុកសម្រាប់កូនខ្មែរជំនាន់ក្រោយៗ ដើម្បីសិក្សាស្វែងយល់អំពីបទពិសោធន៍របស់កូនខ្មែរជំនាន់មុន។
ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលជាអគ្គនាយកធនាគារអភិវឌ្ឍន៍ជនបទ និងកសិកម្ម បានមានប្រសាសន៍ថា «ជាទស្សន:ផ្ទាល់ខ្លួន ខ្ញុំសង្កេតឃើញថា ខ្មែរយើងហាក់ដូចជាបាត់ទម្លាប់កត់ត្រាឯកសារទុក ចាប់ពីក្រោយការដួលរលំសម័យអង្គរដ៏រុងរឿងមក រហូតដល់សម័យបារាំងចូលស្រុក ឆ្នាំ១៨៦៣ បារាំងបានជួយកត់ត្រាឯកសារទុកឱ្យ ក្រៅអំពីការកត់ត្រាក្នុងស្ត្រាស្លឹករឹតបន្តិចបន្តួចប៉ុណ្ណោះ។
«ជាមួយគ្នានេះ ខ្មែរយើងជួបគ្រោះមហន្តរាយបត់បង់ឯកសារពីរលើកកធំៗ គឺ(១) សម័យលង្វែក-ប្រាក់ដួង និង(២) សម័យប៉ុលពតដ៏ខ្មៅងងឹត ដែលពួកគេកម្ទេចទាំងឯកសារមានជីវិត (គ្រូបង្រៀន គ្រូពេទ្យ វិស្វករ..) និងឯកសារផ្សេងៗ ជាពិសេស ច្បាប់ បញ្ញត្តិ វប្បធម៌ខ្មែរ សាសនា…»។
ឯកឧត្តមបណ្ឌិតប្រតិភូ បានមានប្រសាសន៍បន្តទៀតថា «ខ្ញុំសូមអំពាវនាវដល់បងប្អូនខ្មែរ ចូលរួមស្រាវជ្រាវ ចងក្រងឯកសារទុកឱ្យបានសម្បូណ៌បែប សម្រាប់អ្នកជំនាន់ក្រោយយើង អភិវឌ្ឍខ្លួន និងជាតិឱ្យថ្កុំថ្កើងងរុងរឿងតរៀងទៅ»។
បណ្ណាល័យ ARDB បើកឱ្យប្រើប្រាស់ជាសាធារណ: ជាពិសេស ប្អូននិស្សិត អាចមកចូលអាន និងស្រាវជ្រាវផ្ទាល់ គ្រប់ពេល ដោយមានភ្ជាប់ប្រព័ន្ធអ៊ីធើណែតល្បឿនលឿន៕
