អន្តរជាតិ៖ កាលពីថ្ងៃទី៣១ ខែមីនា ឆ្នាំ២០២៥ ក្រុមហ៊ុនកែច្នៃ និងវេចខ្ចប់ផលិតផលចំណីអាហារដ៏ធំរបស់ប្រទេសប្រេស៊ីល បានប្រកាសពីផែនការវិនិយោគក្នុងទំហំទឹកប្រាក់ចំនួន១០០លានដុល្លារ ដើម្បីសាងសង់រោងចក្រចំនួនពីរកន្លែងនៅក្នុងប្រទេសវៀតណាម ក្នុងគោលបំណងពង្រីកវត្តមានរបស់ខ្លួននៅក្នុងតំបន់ និងពង្រឹងជំហររបស់ខ្លួននៅក្នុងទីផ្សារពិភពលោក។
ក្រុមហ៊ុន ចេប៊ីអេស (JBS) មានប្រតិបត្តិការជាង៦០០ នៅក្នុងទ្វីបអាមេរិក អាស៊ី អឺរ៉ុប អាហ្វ្រិក និងទ្វីបអូសេអានី។ នៅសហរដ្ឋអាមេរិកក្រុមហ៊ុននេះមានបុគ្គលិកជាង៧០ ០០០នាក់។ រោងចក្រសាងសង់ថ្មីនៅក្នុងប្រទេសវៀតណាមនឹងផលិតសាច់គោ សាច់ជ្រូក ដែលភាគច្រើនជាសត្វនៅរស់នាំចូលពីប្រទេសប្រេស៊ីល ដើម្បីផ្គត់ផ្គង់ទីផ្សារវៀតណាម និងនៅទីផ្សារបណ្តាប្រទេសអាស៊ីអាគ្នេយ៍ផ្សេងទៀត។
គម្រោងនេះត្រូវបានបង្កើតឡើងជាផ្លូវការតាមរយៈអនុស្សរណៈនៃការយោគយល់គ្នាជាមួយរដ្ឋាភិបាលវៀតណាម ដែលតំណាងដោយមជ្ឈមណ្ឌលជំរុញការវិនិយោគ ព័ត៌មាន ដែលជាអ្នកគ្រប់គ្រងតំបន់ឧស្សាហកម្មពិសេស នៅក្នុងខេត្តហៃហ្វុងរបស់វៀតណាម ។ គំនិតផ្តួចផ្តើមដាក់ទុនវិនិយោគនេះ ធ្វើឡើងស្របតាមគោលដៅអភិវឌ្ឍន៍សេដ្ឋកិច្ចសង្គមរបស់ប្រទេសវៀតណាម ដើម្បីបង្កើនផលិតកម្មក្នុងស្រុក និងពង្រីកតួនាទីរបស់ខ្លួន ក្នុងពាណិជ្ជកម្មសាច់នៅលើឆាកអន្តរជាតិ។
ប្រធានក្រុមហ៊ុនបុត្រសម្ព័ន្ធរបស់ ចេប៊ីអស បានកត់សម្គាល់ពីការប្តេជ្ញាចិត្តរបស់ក្រុមហ៊ុនចំពោះកំណើនប្រកបដោយនិរន្តរភាពនៅក្នុងតំបន់។ លោកបានមានប្រសាសន៍ថា “រោងចក្រថ្មីនៅក្នុងប្រទេសវៀតណាមនឹងមិនត្រឹមតែពង្រីកសមត្ថភាពផលិតកម្មរបស់យើងប៉ុណ្ណោះទេ ប៉ុន្តែតំណាងឱ្យការវិនិយោគមួយ ដែលមានគោលបំណង៖ បង្កើតតម្លៃសម្រាប់សេដ្ឋកិច្ចក្នុងស្រុក បង្កើតការងារជំនាញ និងរួមចំណែកដល់សន្តិសុខស្បៀងនៅទូទាំងអាស៊ីអាគ្នេយ៍។ យើងកំពុងវិនិយោគនាពេលអនាគត ដោយផ្តោតលើការច្នៃប្រឌិត និរន្តរភាព និងការអភិវឌ្ឍន៍”។
ដំណាក់កាលដំបូងរបស់គម្រោងវិនិយោគនេះ នឹងចាប់ផ្តើមដំណាក់កាលទី១ នៅសួនឧស្សាហកម្ម ណាមឌិញវូ (Nam Dinh Vu) ដើម្បីដំណើរការពន្លះសាច់ និងវេចខ្ចប់។ ចំណែកដំណាក់កាលទី២ ដែលគ្រោងនឹងចាប់ផ្តើមពីរឆ្នាំបន្ទាប់ មានទីតាំងនៅភាគខាងត្បូងប្រទេសវៀតណាម និងរួមបញ្ចូលហេដ្ឋារចនាសម្ព័ន្ធស្រដៀងគ្នា ដែលមានមជ្ឈមណ្ឌលដឹកជញ្ជូន និងរោងចក្រកែច្នៃ។ រោងចក្រកែច្នៃវេចខ្ចប់ទាំងពីរកន្លែងនេះ អាចបង្កើតការងារបានប្រមាណ៥០០កន្លែង សម្រាប់ប្រជាវៀតណាម៕
