ខេត្តតាកែវ៖ ពិធីបុណ្យទន្លេលើកទី៩ ដែលប្រារព្ធរៀបចំនៅខេត្តតាកែវមានរយៈពេលបីថ្ងៃ ចាប់ពីថ្ងៃទី២១ ដល់ថ្ងៃទី២៣ ខែមីនា ឆ្នាំ២០២៥ បានជួយឱ្យអាជីវករផ្តល់សេវាមុខម្ហូបអាហារ និងភេសជ្ជៈមកពីបណ្តាខេត្តនានា ដែលមានច្រើនស្តង់លក់បានប្រាក់ចំណូលលើសពីការរំពឹងទុក តាំងពីថ្ងៃដំបូងរហូតដល់ថ្ងៃចុងក្រោយ ដោយសារប្រជាពលរដ្ឋមកចូលរួមទស្សនាកម្សាន្តច្រើនកុះករ។
លោក ផល្លី ណារ៉ុង អាជីវករលក់ស៊ុបឆ្នាំងដី មកពីខេត្តព្រៃវែង បានឱ្យដឹងថា យប់ចាប់ផ្តើមថ្ងៃបុណ្យទន្លេទី១ លោករំពឹងថា អាចលក់ស៊ុប និងអាហារផ្សេងទៀតរបស់ខ្លួនបានប្រាក់ពីបួនទៅប្រាំលានរៀលប៉ុណ្ណោះ តែលទ្ធផលជាក់ស្តែងអាចលក់បានប្រាក់រហូតដល់១០លានរៀលលើសពីការរំពឹងទុក ព្រោះមានបងប្អូនប្រជាពលរដ្ឋក្នុងខេត្ត បានចូលមកដើរកម្សាន្តច្រើន ហើយសម្រាប់យប់ទី២ ផ្អែកលើប្រាក់ចំណូលថ្ងៃដំបូង លោកបានត្រៀមមុខម្ហូបអាហាររបស់ខ្លួនលក់ឱ្យបានរហូតដល់២០លានរៀល។
លោក ហ៊ាង ពេជ្រ អាជីវករលក់ស៊ុបមកពីខាងខេត្តព្រះសីហនុ បានឱ្យដឹងថា យប់ថ្ងៃទី១ លោកបានដាក់ក្តីរំពឹងថា ការលក់ម្ហូបអាហាររបស់ខ្លួន អាចរកប្រាក់តែពីពីរទៅបីលានរៀលប៉ុណ្ណោះ ព្រោះនៅពេលរសៀលឃើញប្រជាពលរដ្ឋមកដើរកម្សាន្តហាក់មានចំនួនតិចតួច ប៉ុន្តែជាក់ស្តែង នៅយប់ទី១ លោកអាចលក់ម្ហូបអាហារបានប្រាក់រហូតដល់ទៅប្រាំបីលានរៀល ហើយដល់យប់ទី២ លោកធ្វើយ៉ាងណាជំរុញការលក់របស់ខ្លួនឱ្យកើនឡើងលើសពី៨លានរៀល ឬច្រើនជាងនេះទៅតាមភាពជាក់ស្តែង។
លោក ប៊ុន ថម អាជីវករលក់ម្ហូបអាហារមកពីខេត្តបន្ទាយមានជ័យ បានឱ្យដឹងថា លក់បានប្រាក់សរុបជិតបីលានរៀល ព្រោះលោកមានស្តង់សម្រាប់លក់ម្ហូបតែមួយកន្លែង ហើយមានគ្នាតិចតួច មិនអាចផ្តល់សេវាបានគ្រប់គ្នា ហើយសម្រាប់ថ្ងៃទី២ លោកត្រៀមម្ហូបអាហារច្រើនជាងថ្ងៃទី១ ដោយរំពឹងថា អាចទទួលបានចំណូលច្រើនជាងថ្ងៃទី១។
លោក ហ៊ាង តុង លក់ដូងក្រអូបមកពីខេត្តបន្ទាយមានជ័យ បានឱ្យដឹងថា យប់ថ្ងៃទី១ នៃពិធីបុណ្យទន្លេនៅខេត្តតាកែវ ឆ្នាំនេះ លោកនិងក្រុមការងារលក់ផលិតផលកែច្នៃរបស់ខ្លួនរកប្រាក់ចំណូលបានពីបួនទៅប្រាំលានរៀល។ ចំនួននេះលោកមិននឹកស្មានថា អាចលក់បានប្រាក់ដល់ប៉ុណ្ណឹងនោះទេ ហើយនៅយប់ថ្ងៃទី២ទៀត ការលក់កំពុងមានសន្ទុះកើនឡើង ដោយរំពឹងថា អាចលក់បានប្រាក់កើនលើសប្រាំមួយលានរៀល។
ឯកឧត្តម វី សំណាង អភិបាលខេត្តតាកែវ មានប្រសាសន៍នៅក្នុងពិធីបើកព្រឹត្តិការណ៍បុណ្យទន្លេលើកទី៩ថា បុណ្យលើកទី៩ សម្រាប់ព្រះរាជាណាចក្រកម្ពុជា និងជាលើកទី១ ជាប្រវត្តិសាស្ត្រសម្រាប់ខេត្តតាកែវ ហើយក្នុងនាមជាម្ចាស់ផ្ទះបានរៀបចំបុណ្យទន្លេ រដ្ឋបាលខេត្តតាកែវ បានសហការរៀបចំជាមួយក្រសួង ស្ថាប័នពាក់ព័ន្ធ បានរៀបចំឱ្យមានព្រឹត្តិការណ៍នានា ដូចជាការជិះកង់ចម្ងាយ៧៥គីឡូម៉ែត្រពីរាជធានីភ្នំពេញមកកាន់ទីរួមខេត្តតាកែវ ក្រោមប្រធានបទ សេរីភាពនៃការជិះកង់ កាលពីថ្ងៃទី៨ ខែមីនា ឆ្នាំ២០២៥, ការរត់កម្សាន្តមហាជនចម្ងាយប្រាំគីឡូម៉ែត្រ, ការដាំដើមឈើរួមគ្នា, កីឡាប៉េតង់មហាជន, កីឡាអុកចត្រង្គ, កីឡារែក, កីឡាលោតមឹក, កីឡាបាល់ទះមហាជន ,បាល់ទាត់មិត្តភាព, កីឡាប៉ារ៉ាម៉ូទ័រ, ប្រដាល់គុណខ្មែរ និងការជិះទូកកាយ៉ាកជាដើម។ បន្ថែមពីនេះ មានរៀបចំពិព័រណ៍ផលិតផលពាណិជ្ជកម្មគ្រប់ប្រភេទ នៅក្នុងគោលបំណងជំរុញសកម្មភាពពាណិជ្ជកម្ម ផលិតផលក្នុងស្រុក តំបន់ទន្លេនៅតាមមូលដ្ឋានឱ្យបានទូលំទូលាយ ដើម្បីជាការចូលរួមចំណែកអភិវឌ្ឍន៍សេដ្ឋកិច្ចស្របតាមយុទ្ធសាស្ត្របច្ចុកោណដំណាក់កាលទី១ របស់រាជរដ្ឋាភិបាលនីតិកាលទី៧ផងដែរ។
នៅក្នុងឱកាសនេះផងដែរ, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជាមានប្រសាសន៍ចាត់ទុកថា ការប្រារព្ធពិធីបុណ្យទន្លេលើកទី៩ នៅខេត្តតាកែវពេលនេះមិនត្រឹមតែរួមចំណែកផ្សព្វផ្សាយពីសក្តានុពលទេសចរណ៍នៅខេត្តតាមដងទន្លេប៉ុណ្ណោះទេ ប៉ុន្តែបន្ថែមដល់ការគាំទ្រគោលនយោបាយរបស់រាជរដ្ឋាភិបាលកម្ពុជាក្នុងការយកចិត្តទុកដាក់អភិវឌ្ឍន៍ទេសចរណ៍ប្រកបដោយនិរន្តរភាព និងការទទួលខុសត្រូវ ជាពិសេសសក្តានុពលវប្បធម៌ប្រវត្តិសាស្ត្រ និងធនធានទឹកសាបកម្ពុជាមានលក្ខណៈលេចធ្លោ និងមានភាពសំបូរបែប ដែលអំណោយផលដល់ការអាស្រ័យផល និងការអភិវឌ្ឍឧស្សាហកម្មទេសចរនៅតំបន់ទាំងនោះ៕
