រាជធានីភ្នំពេញ៖ ក្រសួងធនធានទឹក និងឧតុនិយមម ,គណៈកម្មាធិការជាតិទន្លេមេគង្គកម្ពុជា និងអាជ្ញាធរទន្លេសាប នៅព្រឹកថ្ងៃទី២១ខែមីនាឆ្នាំ២០២៥ បានរួមគ្នារៀបចំពិធីអបអរសាទរ ទិវាទឹកនិងឧតុនិយមពិភពលោកឆ្នាំ២០២៥ ក្រោមប្រធានបទ ការការពារផ្ទាំទឹកកកនិងការបិទបញ្ចប់គម្លាតទទួលបានការប្រកាសឱ្យដឹងព័ត៌មានជាមុនរួមគ្នា។
ពិធីនេះមានការអញ្ចើញចូលរួមជាអធិបតីភាពដ៏ខ្ពង់ខ្ពស់ពី ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានគណៈកម្មាធិការជាតិទន្លេមេគង្គកម្ពុជា ។ឯកឧត្តម ថោ ជេដ្ឋា មានប្រសាសន៍ថា នេះគឺជាលើកទី១ដែលក្រសួង-ស្ថាប័នទាំងបី បានរួមគ្នារៀបចំប្រារព្ធកម្មវិធី អបអរសាទរ ទិវាទឹក និងឧតុនិយមពិភពលោកឆ្នាំ២០២៥ នៅកម្ពុជា ពេលនេះមានគោលបំណងធំៗមានដូចជា៖
១)-លើកកម្ពស់ការយល់ដឹងជាសាធារណៈអំពីបញ្ហាទឹក និងឧតុនិយម ជាពិសេសក្នុងបរិបទនៃការប្រែប្រួលអាកាសធាតុ និងភាពធន់នឹងគ្រោះមហន្តរាយ,២)-បង្ហាញពីតួនាទីរបស់ជលសាស្ត្រនិងឧតុនិយម ក្នុងការគ្រប់គ្រងទឹកប្រកបដោយចីរភាព និងការប្រកាសព័ត៌មានឱ្យដឹងមុន។
៣)-ភាពជាដៃគូក្នុងចំណោមភ្នាក់ងាររដ្ឋាភិបាល ស្ថាប័នស្រាវជ្រាវ អង្គការមិនមែនរដ្ឋាភិបាល វិស័យឯកជន និងសហគមន៍មូលដ្ឋាន,៤)-ជំរុញកិច្ចពិភាក្សាគោលនយោបាយស្តីពីសន្តិសុខទឹក ការបន្ស៊ាំនឹងការប្រែប្រួលអាកាសធាតុ និងការកាត់បន្ថយហានិភ័យគ្រោះមហន្តរាយ និង៥)-រំលេចដំណោះស្រាយប្រកបដោយនវានុវត្តន៍ និងការអនុវត្តល្អបំផុតក្នុងការគ្រប់គ្រងទឹក ការបន្ស៊ាំនឹងការប្រែប្រួលអាកាសធាតុ និងការកាត់បន្ថយហានិភ័យគ្រោះមហន្តរាយ។
បើយោងតាមរដ្ឋមន្ត្រីក្រសួងធនធានទឹក និងឧតុនិយម, ឯកឧត្តមបានប្តេជ្ញាធ្វើឱ្យប្រសើរឡើងនូវសមត្ថភាពព្យាករណ៍ បង្កើនការត្រៀមរៀបចំឆ្លើយតបគ្រោះមហន្តរាយ និងធានាថាព័ត៌មានទាន់ពេលវេលានិងគួរឱ្យទុកចិត្តបានទៅដល់ប្រជាជនដែលងាយរងគ្រោះបំផុត។
ឯកឧត្តមមានប្រសាសន៍ថា “ខ្ញុំសង្ឃឹមថាតាមរយៈការរៀបចំប្រារព្ធកម្មវិធីអបអរសាទរទិវាទឹក និងឧតុនិយមពិភព លោកឆ្នាំ២០២៥ នៅកម្ពុជានេះ នឹងក្លាយជាកម្លាំងចលករ និងជាការពញ្ញាក់ស្មារតីសម្រាប់ ក្រសួង-ស្ថាប័នពាក់ព័ន្ធ សាស្ត្រាចារ្យ និស្សិត និងអ្នកចូលរួមទាំងអស់ ក្នុងការបន្តកម្លាំងកាយចិត្ត ប្រាជ្ញា ស្មារតី ចូលរួមពង្រឹងការគ្រប់គ្រងវិស័យធនធានទឹក និងឧតុនិយមនៅកម្ពុជាឱ្យកាន់តែរីកចម្រើនទ្វេដង។លើសពីនេះ ក្រសួងធនធានទឹក និងឧតុនិយម នឹងបន្តពង្រឹងកិច្ចសហប្រតិបត្តិការបន្ថែមទៀតជាមួយក្រសួង-ស្ថាប័នពាក់ព័ន្ធទាំងអស់ ក្នុងការអនុវត្តតាមគោលនយោបាយទឹករបស់ព្រះរាជាណាចក្រកម្ពុជាឱ្យកាន់តែមានប្រសិទ្ធភាព និរន្តរភាព និងបរិយាបន្នក្រោមការដឹកនាំដ៏ឈ្លាសវៃនិងប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា”។
ទន្ទឹមនឹងនេះ, ឯកឧត្តមរដ្ឋមន្ត្រីបានធ្វើការណែនាំដល់ថ្នាក់ដឹកនាំ និងមន្ត្រីរាជការ នៃក្រសួងធនធានទឹក និងឧតុនិយម យកចិត្តទុកលើកិច្ចការមួយចំនួន៖
១-ប្រើប្រាស់ធនធានទឹកដែលមានស្រាប់ឱ្យអស់សក្តានុពល និងសន្សំសំចៃ,
២-ពង្រីកវិសាលភាពអាងស្តុកទឹកសម្រាប់បម្រើឱ្យពហុវិស័យ និងកាត់បន្ថយគ្រោះមហន្តរាយធម្មជាតិ
៣-ប្រែក្លាយប្រព័ន្ធធារាសាស្រ្តឱ្យមានលក្ខណៈពេញលេញ និងទំនើប
៤-ពង្រឹងសេវាឧតុនិយម និងប្រព័ន្ធប្រកាសអាសន្នជាមុន
៥-ពង្រឹងធនធានមនុស្សផ្នែកធារាសាស្រ្ត ឧតុនិយម និងជលសាស្រ្ត
៦-រៀបចំ និងធ្វើទំនើបកម្មមជ្ឈមណ្ឌលគ្រប់គ្រងទិន្នន័យទឹក និងឧតុនិយម
៧-ពង្រឹងការសិក្សាស្រាវជ្រាវវិស័យធនធានទឹករួមមាន ទឹកលើដី និងទឹកក្រោមដី
៨-បង្កើត និងពង្រឹងបទដ្ឋានគតិយុត្តពាក់ព័ន្ធវិស័យធនធានទឹក និងឧតុនិយម៕
