អន្តរជាតិ៖ ប្រជាជនថៃនៅក្នុងខេត្តចំនួន១៩ បាននាំគ្នាដឹកត្រីទីឡាព្យ៉ាថ្ពាល់ខ្មៅយកមកចាក់គរនៅខាងមុខវិមានរដ្ឋាភិបាល ដើម្បីជាការតវ៉ាទៅនឹងអ្វីដែលពួកគេនិយាយថា ជាជំហានអណ្តើករបស់រដ្ឋាភិបាលក្នុងការកម្ចាត់ពូជត្រី មានប្រភពមកពីប្រទេសក្រៅមួយប្រភេទនេះ ដែលកំពុងបំផ្លាញធនធានមច្ឆាជាតិក្នុងស្រុកយ៉ាងធ្ងន់ធ្ងរនាពេលកន្លងមក។
សារព័ត៌មានរបស់ថៃបានរាយការណ៍នាដើមសប្តាហ៍នេះថា ក្រុមប្រជាពលរដ្ឋរងគ្រោះដោយត្រីទីឡាព្យ៉ាថ្ពាល់ខ្មៅក្នុងខេត្តចំនួន១៩ បានរៀបចំប្រមូលផ្តុំនៅមុខក្រសួងកសិកម្ម និងសហករណ៍ រួចដើរទៅមុខវិមានរដ្ឋាភិបាលរបស់ថៃ ដោយនាំយកត្រីទីឡាព្យ៉ាថ្ពាល់ខ្មៅប្រមាណប្រាំតោន ទៅចាក់គរនៅមុខវិមានរដ្ឋាភិបាល ដើម្បីទាមទារឲ្យការបញ្ជាក់ពិតប្រាកដអំពីការដោះស្រាយបញ្ហា និងទាមទារចម្លើយចំនួនបួនពីលោកស្រី ផេថងថាន ស៊ីណាវ៉ាត់ នាយករដ្ឋមន្ត្រី។
ចំពោះលក្ខណខណ្ឌទាំងបួន ដែលពលរដ្ឋថៃទាំងនេះទាមទារ រួមមានដូចជា៖
១. បញ្ហាត្រីទីឡាព្យ៉ាថ្ពាល់ខ្មៅកំពុងរាតត្បាតលើសពីអ្វី ដែលប្រជាពលរដ្ឋក្នុងស្រុកអាចដោះស្រាយបានដោយខ្លួនឯង រួមទាំងផលប៉ះពាល់លើប្រព័ន្ធអេកូឡូស៊ីជាទូទៅ។
២. ប្រតិបត្តិការរបស់រដ្ឋាភិបាល ដែលត្រូវបានប្រកាសនាពេលកន្លងមកថា ជាបញ្ហារបស់ជាតិ ប៉ុន្តែមិនដែលមានសកម្មភាពកម្ចាត់ត្រីទាំងនេះទៀតឡើយ។ កាលពីពេលថ្មីៗនេះ ក្រសួងកសិកម្ម និងសហករណ៍ បានចំណាយថវិការត្រឹមតែ១២លានបាតប៉ុណ្ណោះ ដើម្បីចាប់ត្រីទីឡាយ៉ាថ្ពាល់ខ្មៅ ចេញពីប្រភពទឹកធម្មជាតិ ប៉ុន្តែនៅមានត្រីទីឡាព្យ៉ាថ្ពាល់ខ្មៅរាប់សិបលានតោន មិនត្រូវបានគេលុបបំបាត់ចោល ហើយកន្លងមកការអនុវត្តគ្រាន់តែធ្វើក្នុងលក្ខណៈភ្លើងចំបើង ហើយស្ងាត់ស្ងៀមទៅវិញតែប៉ុណ្ណោះ។
៣. ប្រជាពលរដ្ឋបានព្យាយាមដាក់ពាក្យបណ្ដឹងនៅតុលាការរដ្ឋប្បវេណី ប៉ុន្តែវាគ្រាន់តែជាបណ្តឹងចាត់ការថ្នាក់តំបន់ប៉ុណ្ណោះ។ ប្រសិនបើតុលាការដំណើរការ ត្រូវប្រើពេលយ៉ាងហោចណាស់បីទៅបួនឆ្នាំ ហើយពាក្យបណ្ដឹងនេះ គឺប្រឆាំងនឹងមនុស្សនៅខេត្តតែមួយប៉ុណ្ណោះ ហេតុនេះប្រជាពលរដ្ឋនៅខេត្ត១៨-១៩ផ្សេងទៀត ដែលទទួលរងផលប៉ះពាល់ដែរ បានយល់ឃើញថា រដ្ឋាភិបាលមិនទាន់មានវិធានការអ្វីសោះឡើយ។ បណ្តឹងទាំងនេះមិនដឹងថា តុលាការសម្រេចឱ្យក្រុមហ៊ុនឯកជនត្រូវសងសំណង ឬអត់ នេះមិនរាប់បញ្ចូលផលប៉ះពាល់លើប្រព័ន្ធអេកូឡូស៊ី និងអ្នកដទៃទៀតទេ ដែលមិនស្ថិតក្នុងវិសាលភាពនៃបណ្តឹងនេះ។
៤.តំណាងប្រជាពលរដ្ឋ ដែលរងផលប៉ះពាល់នៅក្នុងខេត្តទាំង១៩ បានធ្វើដំណើរទៅប្រមូលផ្តុំ និងដាក់លិខិតជូននាយករដ្ឋមន្រ្តីចាប់តាំងពីថ្ងៃទី១៣ ខែមករា ឆ្នាំ២០២៥ ប៉ុន្តែពុំទទួលបានការឆ្លើយតបអ្វីឡើយ។ ហេតុនេះទើបពួកគេសុំឱ្យឆ្លើយតបតាមសំណើរទាំងអស់នេះ។
ជាមួយគ្នានេះដែល ពលរដ្ឋដែលចូលមតវ៉ានេះបានអំពាវនាវដល់រដ្ឋាភិបាលចាត់វិធានការជាបន្ទាន់លើបួនចំណុចសំខាន់ៗផ្សេងទៀតដូចជា៖ ១. បង្កើតគណៈកម្មការស៊ើបអង្កេត និងស្វែងរកជនល្មើស។ ២. លុបបំបាត់ត្រីទីឡាព្យ៉ាថ្ពាល់ខ្មៅក្នុងរយៈពេលមួយឆ្នាំ។ ៣. ប្រកាសតំបន់គ្រោះមហន្តរាយ និងទី៤. ពុំធ្លាប់មានចម្លើយពីថ្នាក់ដឹកនាំរដ្ឋាភិបាលទេ ដូច្នេះពួកគេត្រូវមកទាមទារចម្លើយនាពេលនេះ៕
