ទីក្រុងប៉េកាំង៖ រដ្ឋាភិបាលចិននៅក្នុងសប្តាហ៍នេះ បានព្យួរអាជ្ញាប័ណ្ណនាំចូលផលិតផលកសិកម្មរបស់ក្រុមហ៊ុនធំៗចំនួនបី របស់សហរដ្ឋអាម៉េរិក និងបញ្ឈប់ទាំងស្រុងនូវការនាំចូលផលិតផលឈើពីសហរដ្ឋអាម៉េរិក ដើម្បីជាការសងសឹកបន្ទាប់ពីរដ្ឋាភិបាលលោក ដូណាល់ ត្រាំ បានបន្ថែមពន្ធនាំចូលលើទំនិញរបស់ចិន។
យោងតាមការផ្សាយរបស់ភ្នាក់ងារព័ត៌មាន រ៉យទ័រ បានឲ្យដឹងថា ព្រមជាមួយគ្នានេះដែរ ប្រទេសចិនក៏បានដំឡើងពន្ធលើការនាំចូលផ្នែកផលិតផលកសិកម្ម និងម្ហូបអាហាររបស់សហរដ្ឋអាម៉េរិក ដែលមានតម្លៃទឹកប្រាក់២១ពាន់លានដុល្លារ រួមមានសណ្តែកសៀង ស្រូវសាលី សាច់ និងសំឡីកប្បាស។
នាយកដ្ឋានគយរបស់ប្រទេសចិន បាននិយាយនៅក្នុងសេចក្តីថ្លែងការណ៍មួយថា ក្រុមហ៊ុនអាម៉េរិកចំនួនបីរងផលប៉ះពាល់ដោយការព្យួរអាជ្ញាប័ណ្ណនាំចូលនេះ ក្រោយពីភ្នាក់ងារគយចិន បានរកឃើញសារធាតុបាក់តេរី នៅក្នុងសណ្តែកសៀង នាំចូលពីសហរដ្ឋអាម៉េរិក ចំណែកការផ្អាកការនាំចូលឈើពីសហរដ្ឋអាម៉េរិក គឺដោយសារតែគយចិនរកឃើញដង្កូវតូចៗ និងសត្វល្អិតដទៃទៀត មាននៅក្នុងផលិតផលឈើ។
វិធានការសងសឹករបស់រដ្ឋាភិបាលចិន គឺជាឆ្លើយតបទៅនឹងការសម្រេចចិត្តរបស់ប្រធានាធិបតីអាម៉េរិក លោក ដូណាល់ ត្រាំ ដែលបានដំឡើងពន្ធនាំចូលលើផលិតផលរបស់ប្រទេសចិនរហូតដល់២០ភាគរយ ដោយយកលេសថា រដ្ឋាភិបាលចិនព្រងើយកន្តើយមិនព្រមទប់ស្កាត់ការចរចរណ៍គ្រឿងញៀនចូលក្នុងទឹកដីអាម៉េរិក។
យោងតាមការិយាល័យស្ថិតិរបស់សហរដ្ឋអាម៉េរិក បានឲ្យដឹងថា ប្រហែលពាក់កណ្តាលនៃការនាំចេញផលិតផលសណ្តែកសៀងរបស់សហរដ្ឋអាម៉េរិក គឺនាំទៅកាន់ប្រទេសចិន ដែលសរុបជាទឹកប្រាក់ជិត១២,៨ពាន់លានដុល្លារ នៅក្នុងឆ្នាំ២០២៤។
ការផ្អាកនាំឈើចូលពីសហរដ្ឋអាម៉េរិក គឺជាការឆ្លើយតបដោយផ្ទាល់ទៅនឹងបទបញ្ជាឱ្យមានការស៊ើបអង្កេតលើឈើនាំចូល បន្ទាប់ពីលោកបានប្រាប់អ្នកសារព័ត៌មានថា លោកកំពុងគិតអំពីការដំឡើងពន្ធលើការនាំចូលឈើពីប្រទេសចិនរហូតដល់២៥ភាគរយ។
អ្នកវិភាគផ្នែកកសិកម្ម បាននិយាយថា ការប្រកាសរឹតបន្តឹងរបស់ចិន លើការនាំចូលឈើ និងសណ្តែកសៀង ពីសហរដ្ឋអាម៉េរិក ដែលទាក់ទងនឹងបញ្ហាអនាម័យ គឺកើតឡើងបន្ទាប់ពីមានវិធានការស្រដៀងគ្នានេះតែម្តង។
បរិមាណនាំចូលភាគច្រើន និងប្រភពដើមនៃសណ្តែកសៀង និងផលិតផលឈើ ដែលងាយនឹងមានបញ្ហាផ្នែកសុខភាពបង្កឡើងដោយបាក់តេរី និងសត្វល្អិត ត្រូវបានរដ្ឋាភិបាលចិន កំណត់ជាគោលដៅសម្រាប់សងសឹកផ្នែកពាណិជ្ជកម្មជាមួយអាម៉េរិក។
យោងតាមទិន្នន័យរបស់គយចិន បានឲ្យដឹងថា ប្រទេសចិន គឺជាប្រទេសមួយក្នុងចំណោមអ្នកនាំចូលផលិតផលឈើច្រើនជាងគេបំផុតនៅលើពិភពលោក ជាពិសេសជាអ្នកនាំចូលធំទីបីសម្រាប់ផលិតផលឈើរបស់សហរដ្ឋអាម៉េរិក ដែលនៅក្នុងឆ្នាំ២០២៤ មានតម្លៃប្រហែល៨៥០លានដុល្លារ។
ការដំឡើងពន្ធបន្ថែមរបស់ប្រទេសចិន លើផលិតផលនាំចូលពីសហរដ្ឋអាម៉េរិក រួមមានពន្ធ១៥ភាគរយលើសាច់មាន់ ស្រូវសាលី ពោត និងសំឡីកប្បាស និងពន្ធបន្ថែម១០ភាគរយលើសណ្តែកសៀង អង្ករ សាច់ជ្រូក សាច់គោ ផលិតផលមច្ឆាជាតិ ផ្លែឈើ បន្លែ និងទឹកដោះគោ។
ក្នុងរយៈពេលប៉ុន្មានឆ្នាំចុងក្រោយនេះ រដ្ឋាភិបាលចិន បានខិតខំកាត់បន្ថយយ៉ាងខ្លាំងនូវការពឹងផ្អែកលើការផ្គត់ផ្គង់របស់សហរដ្ឋអាម៉េរិក ដោយធ្វើឲ្យនៅសល់ផលប៉ះពាល់តិចតួចលើសន្តិសុខស្បៀងរបស់ខ្លួន។ ផ្ទុយទៅវិញ ការកាត់បន្ថយរបស់ចិន លើការនាំចូលផលិតផលកសិកម្មពីអាម៉េរិកលើកនេះ នឹងបង្កផលប៉ះពាល់ដល់កសិករអាម៉េរិកធ្ងន់ធ្ងរជាងសង្រ្គាមពាណិជ្ជកម្មឆ្នាំ២០១៨ ក្នុងអំឡុងពេលលោក ដូណាល់ ត្រាំ ឡើងកាន់ដំណែងលើកទី១។ ។
ដើម្បីការពារផលប៉ះពាល់ធ្ងន់ធ្ងរដោយសារសង្គ្រាមពាណិជ្ជកម្មជាមួយអាម៉េរិក ប្រទេសចិនបានងាកទៅរកអ្នកផលិតនៅក្នុងទ្វីបអាម៉េរិកខាងត្បូង តាមរយៈជំរុញកិច្ចសហប្រតិបត្តិការផ្នែកកសិកម្មជាមួយប្រទេសសម្ព័ន្ធមិត្ត និងបង្កើនផលិតកម្មក្នុងស្រុក ដោយពង្រីកការដាំដុះ និងប្រើប្រាស់បច្ចេកវិទ្យាថ្មីទំនើបៗ៕
