ភ្នំពេញ៖ យោងតាមសហគមន៍កសិកម្មទំនើបប្រាសាទសំបូររុងរឿងបានឲ្យដឹងថា សហគមន៍កសិកម្មទំនើបប្រាសាទសំបូររុងរឿង គឺផ្តោតការដាំដុះលើដំណាំស្វាយចន្ទី ដែលមានសមាជិកចំនួន ១៥២ គ្រួសារនិងមានផ្ទៃដីដាំដុះចំនួន ៦២៣ហិកតា ព្រមទាំងទទួលការជួយគាំទ្រពីក្រសួងកសិកម្ម ក្នុងការរៀបចំផែនការអាជីវកម្ម ការជ្រើសរើសបុគ្គលិក និងការសិក្សាពីហេដ្ឋារចនាសម្ព័ន្ធផលិតកម្មស្វាយចន្ទី។
ការលើកឡើងដូច្នោះធ្វើឡើងកាលពីសៀលថ្ងៃទី២៨ ខែវិច្ឆិកា ឆ្នាំ២០២៤កន្លងទៅ ខណៈដែល ឯកឧត្តម ឌិត ទីណា បានអញ្ជើញជួបសំណេះសំណាលជាមួយសមាជិកសហគមន៍កសិកម្មទំនើបប្រាសាទសំបូររុងរឿង នៅស្រុកប្រាសាទសំបូរ ខេត្តកំពង់ធំ ។
យោងតាមសហគមន៍ខាងលើបញ្ជាក់ថា គោលបំណងនៃការចុះទស្សនកិច្ចពីដំណើរការដាំដុះដំណាំស្វាយចន្ទី ការដាក់ជីបំប៉ន ដើម្បីស្វែងយល់ពីខ្សែច្រវ៉ាក់ផលិតកម្មនៃដំណាំស្វាយចន្ទី និងជំរុញទៅកាន់ទីផ្សារប្រកបដោយគុណភាព និងប្រសិទ្ធភាព។ 
ដោយឡែក ចំពោះការរៀបចំនូវផែនការសហគមន៍បានល្អ មានយុទ្ធសាស្រ្តក្នុងការលក់គ្រាប់ស្វាយចន្ទីសើម៥០%និងគ្រាប់ស្វាយចន្ទីស្ងួត ៥០%ដែលអាចធានាតម្លៃទីផ្សារស្វាយចន្ទីបានល្អ។ លើសពីនេះ ឯកឧត្តមរដ្ឋមន្រ្តី ឌិត ទីណា បានលើកទឹកចិត្តដល់សមាជិកទាំងអស់ត្រូវចេះធ្វើការរួមគ្នា មានទំនើបកម្មទាំងសហគមន៍ និងធនធានមនុស្ស មានការគ្រប់គ្រងល្អ ត្រួតពិនិត្យស្តង់ដាការងារត្រឹមត្រូវ ជាពិសេសត្រូវមានភាពស្មោះត្រង់ជាមួយគ្នា ដោយពង្រឹងការដាំដុះឱ្យមានគុណភាពល្អ និងលក់បានថ្លៃ។
នាឱកាសនេះ ឯកឧត្តមរដ្ឋមន្រ្តីក៏បានទទួលនូវសំណូមពររបស់សហគមន៍ និងស្វែងរកដៃគូ និងគម្រោងនានាជួយគាំទ្រនូវសហគមន៍កសិកម្មទំនើបនេះ ហើយក្រសួងកសិកម្មនឹងជួយជាជំនួយបច្ចេកទេស ការគ្រប់គ្រងសត្វល្អិត ប្រកបដោយប្រសិទ្ធភាព និងប្រសិទ្ធផលខ្ពស់។
ទន្ទឹមនិងគ្នានោះ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងក្រុមអឺរ៉ុប កាលពីថ្ងៃទី២៨ ខែវិច្ឆិកា ឆ្នាំ២០២៤ ដដែឡនោះ ក៏បានអញ្ជើញចុះត្រួតពិនិត្យក្រុមហ៊ុនមីរ៉ាត់ អាហ្គ្រីថេក ឯ.ក របស់ជប៉ុនលើការកែច្នៃគ្រាប់ស្វាយចន្ទី នៅស្រុកកំពង់ស្វាយ ខេត្តកំពង់ធំ ក្នុងនោះបានចុះត្រួតពិនិត្យនីតិវិធីការផលិតគ្រាប់ស្វាយចន្ទី ការលាងសម្អាត ការកែច្នៃ រហូតដល់ការវេចខ្ចប់នាំចេញទៅទីផ្សារ ដែលប្រកបទៅដោយអនាម័យខ្ពស់ រសជាតិឆ្ងាញ់ មានគ្រាប់ធំ និងមានគុណភាពល្អ។
កម្ពុជាមានផ្ទៃដីស្វាយចន្ទីប្រមាណ ៥៨០ ១១៧ហិកតា និងទទួលបានបរិមាណផលក្នុងមួយឆ្នាំ សរុបចំនួន ៨៧០ ១៧៦តោន។ ក្នុងរយៈពេល១០ខែឆ្នាំ២០២៤នេះ ការនាំចេញគ្រាប់ស្វាយចន្ទីឆៅទៅទីផ្សារអន្តជាតិ សម្រេចបានចំនួនប្រមាណ ៥៧៧ ១០១តោន ទៅកាន់ប្រទេស ចិន ជប៉ុន បង់ក្លាដែស ឥណ្ឌា វៀតណាម ថៃ និងសហរដ្ឋអាមេរិក។
ក្នុងឆ្នាំ២០២៤នេះ តម្លៃគ្រាប់ស្វាយចន្ទីឆៅ មានតម្លៃប្រមាណពី ១០០០ ទៅ ១៣០០ ដុល្លារ ក្នុងមួយតោន។ បច្ចុប្បន្ននេះ កម្ពុជាបានកែច្នៃគ្រាប់ស្វាយចន្ទីតែប្រមាណ ១០% ប៉ុណ្ណោះ ហើយគ្រាប់ស្វាយចន្ទីឆៅមួយផ្នែកធំ ត្រូវបាននាំចេញទៅប្រទេសជិតខាង។
កម្ពុជាមានក្រុមហ៊ុន សហគ្រាស និងសិប្បកម្មកែច្នៃសរុបចំនួន៤២ កំពុងដំណើរការកែច្នៃគ្រាប់ស្វាយចន្ទី និងមានទីតាំងនៅរាជធានីភ្នំពេញ ខេត្តកណ្តាល កំពង់ចាម កំពង់ធំ ត្បូងឃ្មុំ សៀមរាប ព្រះវិហារ ក្រចេះ ស្ទឹងត្រែង រតនគីរី កំពង់ស្ពឺ កំពង់ឆ្នាំង និងខេត្តតាកែវ។
បច្ចុប្បន្នេះមានសហគមន៍កសិកម្មចំនួន១៦២ កំពុងធ្វើការដាំដុះ និងធ្វើអាជីវកម្មលើដំណាំស្វាយចន្ទីលើផ្ទៃ ដីចំនួន ២២៥ ១៧០ហ.ត។ បច្ចុប្បន្ន ក្រសួងកសិកម្ម រុក្ខាប្រមាញ់ និងនេសាទ បានបង្កើតសហគមន៍ស្វាយចន្ទីទំនើបចំនួន៣កន្លែង នៅខេត្តកំពុងធំដែលគ្របដណ្តប់លើផ្ទៃដីប្រមាណ៦៥០ហិកតា នៅខេត្តកំពង់ធំ។
