ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំពិនិត្យ និងពិភាក្សាសេចក្តីព្រាង “ពិធីសាររវាងអគ្គរដ្ឋបាលគយចិន ស្តីពីលក្ខខណ្ឌតម្រូវក្នុងការអធិការកិច្ច ចត្តាឡីស័ក និងអនាម័យសម្រាប់នាំចេញសំបុកត្រចៀកកាំពីកម្ពុជាទៅចិន នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
នៅក្នុងកិច្ចប្រជុំកាលពីថ្ងៃទី១៨ខែវិច្ឆិកាឆ្នាំ២០២៤, ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានផ្តល់អនុសាសន៍ណែនាំដល់ក្រុមការងារនៃរដ្ឋបាលព្រៃឈើត្រូវគ្រប់គ្រង និងចុះបញ្ជីអ្នកចិញ្ចឹមត្រចៀកកាំ ដើម្បីឱ្យអ្នកចិញ្ចឹមបានយល់ដឹងពីច្បាប់បទដ្ឋាននានា កិច្ចសន្យានៃការចិញ្ចឹមដោយមិនរំខានដល់អ្នកដទៃ តាមដានការចិញ្ចឹមឱ្យមានភាពច្បាស់លាស់ និងជំងឺឆ្លងផ្សេងៗ។
ទន្ទឹមនឹងនេះ ឯកឧត្តមរដ្ឋមន្ត្រី បានប្រគល់ភារកិច្ចជូនដល់អគ្គនាយកដ្ឋានសុខភាពសត្វ និងផលិតកម្មសត្វ ក្នុងការតាមដានយកចិត្តទុកដាក់ពិនិត្យជំងឺឆ្លងនានា នៃការចិញ្ចឹមត្រចៀកកាំនេះឱ្យបានជាប់លាប់ ដើម្បីធានាបាននូវសុវត្ថិភាពសុខភាពសាធារណៈ ផ្តល់ផលចំណេញដល់អ្នកចិញ្ចឹម ជាពិសេសជំរុញដល់ការនាំចេញកាន់តែមានប្រសិទ្ធភាព និងសុវត្ថិភាពខ្ពស់។
ឯកឧត្តម ឌិត ទីណា បានណែនាំដល់អគ្គនាយកដ្ឋានសុខភាពសត្វ និងផលិតកម្មសត្វ ត្រូវស្រាវជ្រាវ និងស្វែងយល់ពីនីតិវិធីរៀបចំបណ្តុំនៃអ្នកចិញ្ចឹមត្រចៀកកាំទៅតាមពេលនីមួយៗ ឱ្យមានភាពច្បាស់លាស់ មានភាពម្ចាស់ការ មានប្រសិទ្ធភាពក្នុងការគ្រប់គ្រង និងមានភាពងាយស្រួលក្នុងការតាមដានតាមប្រព័ន្ធ សម្រាប់បម្រើដល់ការនាំចេញ។
ពាក់ព័ន្ធនិងការនាំចេញសំបុកត្រចៀកាំទៅកាន់ប្រទេសចិននៅពេលខាងមុខនេះ, ឯកឧត្តម ងិន ឆាយ ប្រតិភូរាជរដ្ឋាភិបាលទទួលបន្ទុកជា អគ្គនាយកនៃអគ្គនាយកដ្ឋានកសិកម្ម នៃក្រសួងកសិកម្មរុក្ខាប្រមាញ់និងនេសាទ ធ្លាប់លើកឡើងថា“យើងកំពុងតែចរចារនាំចេញទៅប្រទេសចិនមួយទៀតគឺផលិតផលទឹកមាត់ត្រចៀកកាំ ហើយនៅក្នុងពេលបច្ចុប្បន្ននេះ ការចរចារជិតដល់ចំណុចក្រោយ គឺការរៀបចំពិធីសារបច្ចេកទេស។ ក្រោយពីយើងបានពិធីសារបច្ចេកទេសនេះហើយ គឺដល់ភាគីចិនចុះមកពិនិត្យទីតាំងផ្ទាល់នៅក្នុងប្រទេសកម្ពុជា ឃើញថាមានសុវត្ថិភាពនិងត្រូវទៅតាមស្តង់ដារហើយដល់ពេលនោះយើងអាចធ្វើការនាំចេញ”។
ទន្ទឹមនឹងការចរចារ នាំចេញផលិតផលទឹកមាត់ត្រចៀកកាំកំពុងមានដំណើរការល្អ,លោកស្រី វ៉ា សុជិន ប្រធានសមាគមអ្នកផលិតនិងនាំចេញសំបុកត្រចៀកកំាកម្ពុជាបានសម្តែងការត្រៀកអរ ហើយជាព័ត៌មានមួយដែលអ្នកផលិតនិងអ្នកកែច្នៃក្នុងស្រុក ចំណាយពេលទន្ទឹងរង់ចាំអស់រយៈពេលជាច្រើនឆ្នាំ ចង់ធ្វើការនាំចេញដោយផ្ទាល់ទៅប្រទេសចិន។
លោកស្រី វ៉ា សុជិន មានប្រសាសន៍ថា “ប្រសិនក្រសួងកសិកម្មរុក្ខាប្រមាញ់និងនេសាទ អាចជួយជំរុញឱ្យផលិតផលទឹកមាត់ត្រចៀកកាំកម្ពុជានេះអាចនាំចេញទៅប្រទេសចិនបានកាន់តែលឿនគឺរឹតតែល្អ ដោយសារផលិតផលទឹកមាត់ត្រចៀកកាំរបស់កម្ពុជាមានគុណភាពល្អ ។ដូចនេះបើសិនយើងអាចនាំចេញទៅចិនបាន ពិតជាមានអ្នកគាំទ្រច្រើនពីពលរដ្ឋរបស់ប្រទេសចិន ហើយការនាំចេញផលិតផលមួយនេះ នឹងចូលរួមគាំទ្រដល់កំណើនសេដ្ឋកិច្ចជាតិបានមួយផ្នែកផងដែរ”។
លោកស្រីលើកឡើងថា បើសិនកម្ពុជាអាចនាំចេញផលិតផលកែច្នៃពីសំបុកត្រចៀកកាំទៅប្រទេសចិនបាន វានឹងធ្វើមានការសាងសង់ផ្ទះត្រចៀកកាំនៅក្នុងស្រុកកើនឡើង ហើយក៏អាចទាក់ទាញវិនិយោគិនពីខាងក្រៅប្រទេសចូលមកបោះទុនសាងសង់ផ្ទះត្រចៀកកាំថែមទៀត ចូលរួមធ្វើឱ្យកម្ពុជាមានលទ្ធភាពកាន់តែច្រើនសម្រាប់ផ្គត់ផ្គង់ទៅទីផ្សារខាងក្រៅ។
លោក ដួង វឌ្ឍនៈ អ្នកប្រកបមុខរបរផ្តល់សេវាធ្វើផ្ទះត្រចៀកកាំម្នាក់បានឱ្យដឹងថា បច្ចុប្បន្ននេះក្រុមដៃគូអាជីវកម្មរបស់លោកបានសាងសង់ផ្ទះត្រចៀកកាំផ្ទាល់ខ្លួនបានចំនួន៤ផ្ទះ ហើយនៅក្នុងមួយខែអាចប្រមូលសំបុកត្រចៀកកាំបានជាង២០គីឡូក្រាម។
បើតាមលោក ដួង វឌ្ឍនៈ ក្នុងពេលបច្ចុប្បន្ននេះ លោករួមនិងដៃគូអាជីវកម្ម បានផ្តល់សេវាសាងសង់ផ្ទះត្រចៀកកាំដល់ប្រជាពលរដ្ឋបានជាង៣០០ផ្ទះ ហើយការសាងសង់ផ្ទះត្រចៀកកាំនេះ ភាគច្រើនមាននៅតាមខេត្តជុំវិញបឹងទន្លេសាប មានដូចជានៅខេត្តកំពង់ធំ សៀមរាប បាត់ដំបង កំពង់ឆ្នាំង ពោធិ៍សាត់ ក្រចេះ រតនគិរី ជាដើម៕
