ដោយ ឡុង សារេត
កណ្តាល៖ កសិករម្នាក់រស់នៅក្នុងស្រុកពញាឮ ខេត្តកណ្តាល បានចាប់ផ្តើមចិញ្ចឹមមាន់ស្របតាមបច្ចេកទេសច្បាស់លាស់ និងជាពេទ្យសត្វប្រចាំឃុំ ទទួលបានទុនពីគម្រោងតាមរយៈធនាគារអភិវឌ្ឍន៍ជនបទ និងកសិកម្ម (ARDB)នូវទឹកប្រាក់ប្រមាណ៥ ២០០ដុល្លារ ដើម្បីសាងសង់រោងមួយខ្នង សម្រាប់ចិញ្ចឹមមេមាន់ចំនួន១៤០ក្បាល និងយកស៊ុតភ្ញាស់កូនមាន់ពូជចែកចាយទៅលើទីផ្សារ ដោយរំពឹងថា អាចរកចំណូលបានជិតបីលានរៀលក្នុងមួយខែ។
កសិករឈ្មោះ កន ប៊ុនធឿន បានបញ្ជាក់ថា លោកបានទទួលទុនពីគម្រោង APIRE AT តាមរយៈធនាគារអភិវឌ្ឍន៍ជនបទ និងកសិកម្ម នៅខែមេសា ឆ្នាំ២០២៦ នូវទំហំទឹកប្រាក់ចំនួន៥២០០ដុល្លារ ដើម្បីចាក់ដីពង្រីករោង ឬសាងសង់រោងចិញ្ចឹមមាន់បានមួយខ្នង ដែលមានទទឹង១០ម៉ែត្រ និងបណ្តោយប្រវែង២៥ម៉ែត្រ អាចដាក់មេមាន់ពូជបានចំនួន១៤០ក្បាល។ តែកន្លងមកមិនទាន់បានយកស៊ុតមាន់ទាំងនេះមកភ្ញាស់បានកូនមាន់លក់នៅឡើយទេ តែចាប់ពីខែសីហានេះតទៅ លោលរំពឹងថា អាចភ្ញាស់បានកូនមាន់ចន្លោះពី៨០០ ទៅ១ ០០០កូនក្នុងមួយខែ និងអាចទទួលបានប្រាក់ចំណូលពីរលានប្រាំបីរសែនរៀលក្នុងមួយខែ។
ក្រោយមកលោកបានបង្ហាញបទពិសោធន៍នៃការលក់កូនមាន់ពូជដល់កសិករ ក៏ដូចជាសហគមន៍នៅតាមតំបន់ ដើម្បីបង្កើនប្រសិទ្ធភាពការចិញ្ចឹមសត្វ។ ចំពោះកូនមាន់អាយុត្រឹមបីថ្ងៃមានតម្លៃ៣ ៥០០រៀល,កូនមាន់អាយុមួយសប្តាហ៍មានតម្លៃ៤ ០០០រៀល, កូនមាន់អាយុ១៤ថ្ងៃ មានតម្លៃ៤ ៥០០រៀល និងកូនមាន់អាយុ២១ថ្ងៃ មានតម្លៃ៥ ៥០០រៀល ក្នុងមួយក្បាល។
លោក កន ប៊ុនធឿន បានសង្កត់ធ្ងន់ថា ក្រោយពីបានសហការតាមរយៈកម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (Agriculture Services Programme for an Inclusive Rural Economy and Agricultural Trade- ASPIRE-AT) លោករំពឹងថា នឹងបានកែសម្រួលជីវភាពគ្រួសារកាន់តែប្រសើរថែមទៀត តាមរយៈមុខរបរចិញ្ចឹមមាន់ និងភ្ញាស់កូនមាន់ពូជ សម្រាប់ចែកចាយទៅលើទីផ្សារ។
សូមជម្រាបជូនថា កម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម គឺជាកម្មវិធីរបស់រាជរដ្ឋាភិបាលនៃព្រះរាជាណាចក្រកម្ពុជា ដែលគ្រប់គ្រងការអនុវត្តដោយក្រសួងកសិកម្ម រុក្ខាប្រមាញ់ និងនេសាទ។ កម្មវិធីនេះបានទទួលហិរញ្ញប្បទានជាប្រាក់កម្ចីពីមូលនិធិអន្តរជាតិសម្រាប់អភិវឌ្ឍន៍កសិកម្ម (International Fund for Agricultural Development- IFAD)ធនាគារវិនិយោគអឺរ៉ុប (European Investment Bank), ជំនួយឥតសំណងរបស់សហភាពអឺរ៉ុប និងរាជរដ្ឋាភិបាលកម្ពុជា។
កម្មវិធីនេះមានគោលបំណងអភិវឌ្ឍវិស័យកសិកម្មប្រកបដោយបរិយាប័ន្ន និងមាននិរន្តរភាព តាមរយៈការពង្រឹងខ្សែច្រវាក់តម្លៃផលិតកម្មកសិកម្ម ការពង្រីកទីផ្សារក្នុងស្រុក, ទីផ្សារនាំចេញ និងការបង្កើនប្រាក់ចំណូលដល់ គ្រួសារកសិករក្រីក្រ សហគមន៍កសិកម្ម និងប្រជាពលរដ្ឋនៅជនបទ។
កម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម ផ្តោតសំខាន់លើការអភិវឌ្ឍខ្សែច្រវាក់តម្លៃផលិតផលកសិកម្មគោលដៅប្រាំពីរប្រភេទ រួមមាន មាន់ស្រែ បន្លែ ពោត ស្វាយចន្ទី ម្រេច ផ្លែឈើស្រស់ និងផ្លែឈើកែច្នៃ សម្រាប់នាំចេញ ដោយគ្របដណ្តប់លើខេត្តគោលដៅចំនួន២១ ក្នុងព្រះរាជាណាចក្រកម្ពុជា។
ក្នុងនាមជាដៃគូអនុវត្តគម្រោង ធនាគារ ARDB បានផ្តល់ឥណទានក្នុងអត្រាការប្រាក់ទាប និងមានលក្ខខណ្ឌសងត្រឡប់ប្រកបដោយភាពបត់បែន ស្របតាមលទ្ធភាព និងលំហូរចំណូលរបស់អតិថិជន។ ការគាំទ្រនេះមានគោលបំណងជួយពង្រឹង និងពង្រីកផលិតភាពផលិតកម្ម បង្កើតឱកាសការងារ និងបង្កើនប្រាក់ចំណូលដល់ប្រជាកសិករ។
គិតចាប់ពីចុងឆ្នាំ២០២៥ រហូតមកដល់ខែមិថុនា ឆ្នាំ២០២៦ ធនាគារអភិវឌ្ឍន៍ជនបទ និងកសិកម្ម បានផ្តល់ឥណទានដល់កសិករខ្នាតតូចចំនួន១៩៣នាក់ សរុបទឹកប្រាក់ប្រមាណជិតមួយលានដុល្លារ និងសហគមន៍កសិកម្មចំនួនប្រាំបី សរុបទឹកប្រាក់ប្រមាណជាងបួនសែនដុល្លារ។
ធនាគារអភិវឌ្ឍន៍ជនបទ និងកសិកម្ម នឹងបន្តសហការជាមួយដៃគូអភិវឌ្ឍន៍ ក្រសួង-ស្ថាប័នពាក់ព័ន្ធ ដើម្បីពង្រឹងលទ្ធភាពទទួលបានហិរញ្ញប្បទាន សម្រាប់លើកកម្ពស់ខ្សែច្រវាក់តម្លៃកសិកម្ម និងរួមចំណែកអភិវឌ្ឍវិស័យកសិកម្មកម្ពុជាឱ្យកាន់តែរឹងមាំ ប្រកបដោយបរិយាប័ន្ន និងមាននិរន្តរភាព៕
