ដោយ នៅ ស៊ីវុត្ថា
កំពង់ធំ៖ ខេត្តចំនួនបួនអាចប្រឈមការខ្វះទឹកស្រោចស្រព ខណៈមានបាយការណ៍ព្យាករថា ស្រុកបារាយណ៍ ខេត្តកំពង់ធំ អាចមានភ្លៀងច្រើនជាងធម្មតាខ្ពស់ជាងមធ្យមភាគ ក្នុងខែកក្កដា ហើយអាចជួយកាត់បន្ថយហានិភ័យរាំងស្ងួតក្នុងតំបន់។
លោក សុទ្ធ គឹមកុលមុន្នី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍ថា ស្ថានភាពនៅខេត្តកំពង់ធំ បានល្អប្រសើរឡើងវិញ ក្រោយពីមានភ្លៀងធ្លាក់ជាបន្តបន្ទាប់ក្នុងរយៈពេលប៉ុន្មានថ្ងៃកន្លងមកនេះ។ចំណែកអាជ្ញាធរខេត្តកំពង់ធំ បានដាក់ម៉ាស៊ីនបូមទឹកខ្មាតធំៗ ចំនួនប្រាំពីរកន្លែង ដើម្បីជួយសង្គ្រោះដំណាំស្រូវ ហើយរហូតមកដល់ពេលនេះ មិនទាន់មានការខូចខាត ឬបាត់បង់ដំណាំស្រូវនៅឡើយទេ។
លោកបានបញ្ជាក់ទៀតថា ចំពោះខេត្តបាត់ដំបង សៀមរាប និងខេត្តបន្ទាយមានជ័យ ការអន្តរាគមន៍នៅតែបន្ត ប៉ុន្តែការសង្គ្រោះជួបការលំបាកខ្លះ ដោយសារប្រភពទឹកមានកម្រិត ឬនៅឆ្ងាយពីស្រែ។ ទឹកនៅសល់ក្នុងបឹង ត្រពាំង និងស្រះ មួយចំនួន ត្រូវរក្សាទុកសម្រាប់ការប្រើប្រាស់របស់មនុស្ស និងសត្វ។ ទន្ទឹមនឹងនេះ គណៈកម្មាធិការជាតិគ្រប់គ្រងគ្រោះមហន្តរាយបានសហការជាមួយក្រសួងធនធានទឹក និងឧតុនិយម ដើម្បីស្វែងរកប្រភពទឹកបន្ថែម ខណៈក្រសួងកសិកម្ម រុក្ខាប្រមាញ់ និងនេសាទ ក៏បានត្រៀមពូជស្រូវ សម្រាប់ផ្តល់ជូនកសិករ ប្រសិនបើចាំបាច់ត្រូវដាំដុះស្តារឡើងវិញ។
ដោយឡែក ផ្ទៃដីកសិកម្មប្រមាណ៤៤ ៤៥៣ហិកតា នៅខេត្តទាំងបួនខាងលើនេះ កំពុងប្រឈមនឹងការខ្វះទឹកស្រោចស្រព ដោយសារភ្លៀងធ្លាក់មិនគ្រប់គ្រាន់ និងប្រភពទឹកធម្មជាតិមួយចំនួនរីងស្ងួត។
យោងតាមរបាយការណ៍ Agromet Monthly Bulletin ចេញផ្សាយកាលពីថ្ងៃទី៨ ខែកក្កដា ឆ្នាំ២០២៦ បានព្យាករថាគិតចាប់ពីថ្ងៃទី១៣ ខែមិថុនា ដល់ថ្ងៃទី៦ ខែកក្កដា ឆ្នាំ២០២៦ ផ្ទៃដីដាំស្រូវប្រឈមនឹងការខ្វះទឹកស្រោចស្រព មានសរុប៤៤ ៤៥៣ហិកតា។ ក្នុងនោះ ខេត្តកំពង់ធំមានផ្ទៃដីប្រឈម៧ ៧៨៨ហិកតា ខណៈផ្ទៃដីទទួលរងផលប៉ះពាល់ជាក់ស្តែងមានទំហំ១៥២ហិកតា។
ចំណែកស្ថានភាពអាកាសធាតុ និងលក្ខខណ្ឌកសិកម្ម នៅស្រុកបារាយណ៍ ក្នុងខែមិថុនា ឆ្នាំ២០២៦ មានលក្ខណៈអំណោយផលជាទូទៅសម្រាប់ការលូតលាស់របស់ដំណាំ បើទោះបីជាបរិមាណទឹកភ្លៀងមានកម្រិតទាបជាងមធ្យមភាគរយៈពេលវែងក៏ដោយ។
រដូវវស្សាបរិមាណទឹកភ្លៀងសរុបនៅតែគ្រប់គ្រាន់សម្រាប់ការលូតលាស់របស់ដំណាំភាគច្រើន។ ទន្ទឹមនឹងនេះ ការវាយតម្លៃលើសកម្មភាពរស្មីសំយោគរបស់រុក្ខជាតិ (Photosynthetic Activity)បង្ហាញថា ស្ថានភាពដំណាំនៅស្រុកបារាយណ៍នៅតែល្អជាងមធ្យមភាគរយៈពេលវែង។
យោងតាមអ្នកជំនាញវាយតម្លៃថា ហានិភ័យនៃផលប៉ះពាល់ពីគ្រោះរាំងស្ងួតសម្រាប់តំបន់គោលដៅនៅស្រុកបារាយណ៍ ខេត្តកំពង់ធំ នៅមានកម្រិតទាប ដោយផ្អែកលើសន្ទស្សន៍ទឹកភ្លៀង សំណើមដី ស្ថានភាពរុក្ខជាតិ និងកត្តាពាក់ព័ន្ធផ្សេងៗ។
សម្រាប់ខែកក្កដា ឆ្នាំ២០២៦នេះ ស្រុកបារាយណ៍ ខេត្តកំពង់ធំ ទំនងជាទទួលបានបរិមាណទឹកភ្លៀងខ្ពស់ជាងមធ្យមភាគ ដោយអាចមានទាំងចំនួនថ្ងៃភ្លៀង និងបរិមាណភ្លៀងក្នុងមួយលើកច្រើនជាងធម្មតា បើទោះបីជានៅតែអាចមានរយៈពេលខ្លី ដែលមិនមានភ្លៀងធ្លាក់ក៏ដោយ។ សីតុណ្ហភាពមធ្យមប្រចាំខែ ក៏ត្រូវបានព្យាករថា នឹងបន្តមានកម្រិតខ្ពស់ជាងធម្មតាផងដែរ។
ដើម្បីជួយអាចកាត់បន្ថយហានិភ័យ កសិករគួរបន្តសម្អាតប្រព័ន្ធបង្ហូរទឹក ប្រើសម្ភារៈសរីរាង្គគ្របដី កាត់មែកដំណាំ ដែលងាប់ ឬមានជំងឺ បន្ថែមជីសរីរាង្គ និងតាមដានព័ត៌មានព្យាករណ៍អាកាសធាតុជាប្រចាំ ដើម្បីកែសម្រួលផែនការដាំដុះឱ្យសមស្របទៅនឹងស្ថានភាពជាក់ស្តែង។
បន្ថែមពីនេះ កសិករ និងអ្នកពាក់ព័ន្ធ គួរប្រើប្រាស់ព័ត៌មាននេះ រួមជាមួយការតាមដានស្ថានភាពអាកាសធាតុ និងលក្ខខណ្ឌក្នុងមូលដ្ឋាន ដើម្បីធ្វើការសម្រេចចិត្តលើការគ្រប់គ្រងដំណាំឱ្យបានសមស្រប៕
