ហ្សាការតា៖ ប្រទេសសិង្ហបុរី និងប្រទេសឥណ្ឌូណេស៊ី បានចុះហត្ថលេខាលើកិច្ចព្រមព្រៀងថ្មីមួយ ស្តីពីឥណទានកាបូន ដើម្បីពង្រឹងកិច្ចសហប្រតិបត្តិការលើហិរញ្ញប្បទានអាកាសធាតុឱ្យកាន់តែស៊ីជម្រៅ ស្របពេល បរិយាកាសពិភពលោកប្រែប្រួលកាន់តែមិនច្បាស់លាស់។
ប្រទេសទាំងពីរនឹងសហការគ្នាលើឥណទានកាបូន ក្រោមអនុស្សរណៈនៃការយោគយល់គ្នា ដែលត្រូវបានចុះហត្ថលេខា កាលពីថ្ងៃទី៦ ខែកក្កដា ឆ្នាំ២០២៦ នៅឯកិច្ចប្រជុំចង្អៀតប្រចាំឆ្នាំរវាងមេដឹកនាំសិង្ហបុរី និងឥណ្ឌូណេស៊ី ដែលត្រូវបានធ្វើឡើងនៅទីក្រុងហ្សាការតា។
ក្រសួងពាណិជ្ជកម្ម និងឧស្សាហកម្ម ឥណ្ឌូណេស៊ី បានបញ្ជាក់នៅក្នុងសេចក្តីថ្លែងការណ៍ថា អនុស្សរណៈនៃការយោគយល់គ្នានេះ គឺស្របតាមកិច្ចព្រមព្រៀងស្តីពីការប្រែប្រួលអាកាសធាតុ នៅទីក្រុងប៉ារីស ប្រទេសបារាំង។
កិច្ចព្រមព្រៀងនេះ ត្រូវបានចុះហត្ថលេខាដោយឧបនាយករដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្ម និងឧស្សាហកម្មសិង្ហបុរី លោក ហ្គាន គីមយ៉ុង (Gan Kim Yong) និងរដ្ឋមន្ត្រីក្រសួងបរិស្ថានឥណ្ឌូណេស៊ី
លោក ម៉ូហាម៉ាដ ជុមហួរ ហ៊ីដាយ៉ាត (Mohammad Jumhur Hidayat)។
ថ្លែងពីការចុះហត្ថលេខានេះ រដ្ឋមន្ត្រីក្រសួងពាណិជ្ជកម្ម និងឧស្សាហកម្ម សិង្ហបុរី បានមានប្រសាសន៍ថា ប្រទេសសិង្ហបុរី បានប្តេជ្ញាចិត្តក្នុងការកសាងទីផ្សារកាបូន ដែលមានភាពធន់ និងផ្តល់ផលប្រយោជន៍ទៅវិញទៅមក។
អនុស្សរណៈនេះ ក៏បង្ហាញពីសុឆន្ទៈរបស់ប្រទេសសិង្ហបុរី និងប្រទេសឥណ្ឌូណេស៊ី ក្នុងការបោះជំហានឆ្ពោះទៅរកការបង្កើតក្របខ័ណ្ឌសម្រាប់ការបញ្ចូលហិរញ្ញប្បទានអាកាសធាតុ ទៅក្នុងគម្រោង ដែលមានស្តង់ដារខ្ពស់ ដោយការពារព្រៃឈើ និងស្តារប្រព័ន្ធអេកូឡូស៊ីឆ្នេរសមុទ្រ ដើម្បីបង្កើតដំណោះស្រាយផ្នែកបច្ចេកវិទ្យាស្អាត កាត់បន្ថយការបំភាយឧស្ម័ន និងបង្កើតឱកាសសេដ្ឋកិច្ចថ្មីៗ។
ការពង្រីកកិច្ចសហប្រតិបត្តិការរវាងឥណ្ឌូណេស៊ី និងសិង្ហបុរីនេះនឹងជួយគាំទ្រដល់គម្រោងកាបូនមានស្តង់ដារខ្ពស់ ដែលអាចជួយកាត់បន្ថយការបំភាយឧស្ម័ន និងធ្វើឱ្យប្រសើរឡើងនូវភាពធន់ និងលើកកម្ពស់ជីវភាពរស់នៅប្រកបដោយនិរន្តរភាពសម្រាប់សហគមន៍។
កិច្ចព្រមព្រៀងឥណទានកាបូននេះ គឺជាគំនិតផ្តួចផ្តើមផ្នែកសេដ្ឋកិច្ចតែបងក្នុងចំណោមគំនិតផ្តួចផ្តើមជាច្រើន របស់លោកប្រធានាធិបតីឥណ្ឌូណេស៊ី ក្នុងមូលនិធិវិនិយោគផ្នែកសហប្រតិបត្តិការជាមួយសិង្ហបុរីលើការធ្វើពាណិជ្ជថាមពលអគ្គិសនីឆ្លងដែន។
នៅក្នុងសេចក្តីថ្លែងការណ៍រួម ប្រទេសសិង្ហបុរី និងឥណ្ឌូណេស៊ី បាននិយាយថា រដ្ឋាភិបាលទាំងពីរ កំពុងបោះជំហានឆ្ពោះទៅរកការអភិវឌ្ឍគម្រោងអគ្គិសនីឆ្លងដែនទំហំ៣,៤ជីហ្គាវ៉ាត់ ឬច្រើនជាងនេះ នៅឆ្នាំ២០៣៥ ដោយផ្អែកលើមូលដ្ឋានពាណិជ្ជកម្ម។
ចំពោះក្របខ័ណ្ឌគោលនយោបាយ និងលក្ខខណ្ឌវិនិយោគចាំបាច់សម្រាប់ពាណិជ្ជកម្មអគ្គិសនីឆ្លងដែននេះ រដ្ឋាភិបាលប្រទេសទាំងពីរ គ្រោងបង្កើតក្របខ័ណ្ឌរួមសម្រាប់ថាមពលកកើតឡើងវិញផងដែរ៕ (ផាន់ អាណា)
