ភ្នំពេញ៖ រដ្ឋាភិបាលកម្ពុជាបានសម្រេច ផ្តល់ថ្លៃអគ្គិសនីអនុគ្រោះ ដល់អ្នកប្រើប្រាស់ប្រភេទម៉ាស៊ីនកិនស្រូវ និងឡសម្អាតស្រូវ សម្រាប់រយៈពេលបណ្តោះអាសន្ន ៤ ខែ (ខែតុលា ឆ្នាំ២០២៤ ដល់ ខែមករា ឆ្នាំ២០២៥)។
ការសម្រេចនេះគឺ យោង -លិខិតលេខ ២២៩២.រថ.អ៥.លស ចុះថ្ងៃទី២៣ ខែកញ្ញា ឆ្នាំ២០២៤ របស់ក្រសួងរ៉ែនិងថាមពល លិខិតលេខ ១៧៦ ខ៥/០២៤ សជណ ចុះថ្ងៃទី២៥ ខែកញ្ញា ឆ្នាំ២០២៤ របស់ខុទ្ទកាល័យសម្តេច មហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ចំណារដ៏ខ្ពង់ខ្ពស់បំផុតរបស់សម្តេចមហាបវរទើបតី ហ៊ុន ម៉ាណែត នាយករដ្ឋមន្ត្រី នៃព្រះរាជា ណាចក្រកម្ពុជា ចុះថ្ងៃទី២៤ ខែកញ្ញា ឆ្នាំ២០២៤។
ទីស្តីការគណៈរដ្ឋមន្ត្រីបានសម្រេចថា រាជរដ្ឋាភិបាលឯកភាពដូចខាងក្រោម៖១- ផ្តល់ការអនុគ្រោះថ្លៃ ១២ សេន/kWh (៤៨០ រៀលក្នុង១គីឡូវ៉ាត់ម៉ោង) សម្រាប់អ្នកប្រើប្រាស់ ម៉ាស៊ីនកិនស្រូវ និងឡសមូតស្រូវ ដែលមិនទាន់បានស្នើសុំប្រើប្រាស់ថ្លៃនេះ ពីម៉ោង ២១:០០ ដល់ ៧:០០។
ចំណុចទី២- ផ្តល់ការអនុគ្រោះថ្លៃ ១២ សេន/kWh (៤៨០ រៀលក្នុង១គីឡូវ៉ាត់ម៉ោង) សម្រាប់ការប្រើប្រាស់នៅ ថ្ងៃអាទិត្យ និងថ្ងៃឈប់សម្រាកបុណ្យជាតិ រយៈពេល២៤ម៉ោងពេញ។ ៣- ផ្តល់ការអនុគ្រោះថ្លៃ ១២.៥ សេន/kwh (៥០០ រៀលក្នុង១គីឡូវ៉ាត់ម៉ោង) ចំពោះបរិមាណថាមពល ដែលប្រើប្រាស់លើសពីថាមពលមធ្យមភាគប្រចាំខែជាគោល ដែលធ្លាប់បានប្រើប្រាស់កន្លងមក ពីម៉ោង ៧:០០ ដល់ ២១:០០ ថ្ងៃច័ន្ទ ដល់ថ្ងៃសៅរ៍។
សម្រាប់ លោកឧកញ៉ា សុង សារ៉ន ក្រុមប្រឹក្សាភិបាលសហព័ន្ធស្រូវអង្ករកម្ពុជាបានបង្ហាញជំហរគាំទ្រយ៉ាងពេញទំហឹងចំពោះ ការសម្រេចដ៏ខ្ពង់ខ្ពស់របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី ហ៊ុន ម៉ាណែត នាយករដ្ឋមន្រ្តី ។
លោកឧកញ៉ា សុង សារ៉ន ក្នុងនាមសហព័ន្ធស្រូវអង្ករនិងក្រុមហ៊ុនរោងម៉ាស៊ីនកិនស្រូវ សូមគោរពអគុណដល់សម្តេចបវធិបតី ហ៊ុន មាណែត ដែលតែងគិតគូរដល់ជំរុញអោយតំលៃកសិផលមានតំលៃខ្ពស់ ដោយជំរុញអោយមានភាពប្រកួតប្រជែង និង កាត់បន្ថយចំណាយផលិតកម្ម ។
ចំណែក ឯកឧត្តម កែវ រតនៈ រដ្ឋមន្ដ្រីក្រសួងរ៉ែ និងថាមពល កាលពីថ្ងៃទី០៤ ខែកញ្ញា ឆ្នាំ២០២៤នេះ បានថ្លែងបញ្ជាក់ ថា ការធ្វើមិនឱ្យថ្លៃអគ្គិសនីកើនឡើង និងបញ្ចុះតម្លៃបន្ថែម គឺជាគោលនយោបាយ របស់សម្តេចបវរធិបតី ហ៊ុន ម៉ាណែត នៅក្នុងអាណត្ដិទី៧នេះ ក្នុងគោលបំណង ដើម្បីកាត់បន្ថយការចំណាយរបស់ប្រជាពលរដ្ឋ។
ការលើកឡើងបែបនេះ ធ្វើឡើងក្នុងឱកាសដែលលោក កែវ រតនៈ អញ្ជើញបាឋកថា ស្ដីពី «គោលនយោបាយថាមពលកម្ពុជា» នៅមជ្ឈមណ្ឌលសហប្រតិបត្ដិការ កម្ពុជា-ជប៉ុន (CJCC) ក្នុងសាកលវិទ្យាល័យភូមិន្ទភ្នំពេញ នារសៀលថ្ងៃទី០៤ ខែតុលា ឆ្នាំ២០២៤។
ឯកឧត្តម កែវ រតនៈ ថ្លែងថា ការផ្តល់ការអនុគ្រោះបន្ថែមលើតម្លៃអគ្គិសនី ដល់ម៉ាស៊ីនកិនស្រូវ និងការសង្ងួតស្រូវក្នុងរដូវប្រមូលផល។ ការខិតខំមិនធ្វើឲ្យថ្លៃថាមពលអគ្គិសនីឡើងនេះ គឺជាគោលនយោបាយសំខាន់ របស់សម្ដេចបវរធិបតី ហ៊ុន ម៉ាណែត ជាការកាត់បន្ថយ ការចំណាយរបស់ប្រជាពលរដ្ឋ ហើយនឹងជួយសម្រួលផ្នែកឧស្សាហកម្ម, ពាណិជ្ជកម្ម, កសិកម្ម»។
រដ្ឋមន្ដ្រី កែវ រតនៈ បានឲ្យដឹងទៀតថា ការដែលធ្វើមិនឲ្យថ្លៃថាមពលអគ្គិសនី មានការកើនឡើងនេះ អាចធ្វើបានតាមរយៈរូបភាពពីរ៖ រូបភាពទី១ គឺកុំដំឡើងថ្លៃ ដោយលោកបានប្រាប់ថា តាំងពីសម្ដេចបវរធិបតីជាប់ឆ្នោតមក គឺមិនមានកន្លែងណាមួយ មានការឡើងថ្លៃអគ្គិសនីនោះទេ។
បើតាមលោក កែវ រតនៈ, យុទ្ធសាស្ដ្ររបស់សម្ដេចបវរធិបតី ហ៊ុន ម៉ាណែត នៅក្នុងអាណត្ដិទី៧នេះ គឺបន្ដធ្វើយ៉ាងម្ដេច ឲ្យប្រភពថាមពលរបស់កម្ពុជាកុំឲ្យខ្វះ។
រាជរដ្ឋាភិបាលអាណិត្ដនេះ នឹងបន្ដការរុញផ្គត់ផ្គង់បន្ថែម និងអភិវឌ្ឍន៍បន្ថែម ជាពិសេសផ្ដោតទៅលើថាមពលស្អាត ដូច្នេះបានជាការវិនិយោគជាបន្ដបន្ទាប់នេះ មិនមានការដាក់ពង្រាយ រោងចក្រម៉ាស៊ីនម៉ាស៊ូត ឬម៉ាស៊ីនដើរដោយប្រេងខ្មៅទៀតទេ ដោយធ្វើនៅក្នុងក្របខណ្ឌថាមពលស្អាត៕
