កូឡុំបូ៖ ប្រទេសស្រីលង្កាបានចាប់ផ្តើមស្តារឡើងវិញនូវកសិដ្ឋានដាំបន្លែរបស់ខ្លួន ដែលរងការខូចខាតពីព្យុះស៊ីក្លូន ដោយគ្រោងចំណាយថវិកាប្រហែល១,៤លានដុល្លារ ក្រោមការគាំទ្រពីរដ្ឋាភិបាលអូស្ត្រាលី និងអង្គការស្បៀងអាហារ និងកសិកម្មនៃអង្គការសហប្រជាជាតិ (FAO)។
ការដាក់ឱ្យអនុវត្តគម្រោងជាផ្លូវការនេះ តាមរយៈការចុះហត្ថលេខាលើកិច្ចព្រមព្រៀងផ្តល់ជំនួយរវាងតំណាងឧត្តមស្នងការអូស្ត្រាលីប្រចាំប្រទេសស្រីលង្កា និងតំណាងអង្គការស្បៀងអាហារ និងកសិកម្ម ប្រចាំប្រទេសស្រីលង្កា និងកោះម៉ាល់ឌីវ។
គំនិតផ្តួចផ្តើមស្តារកសិដ្ឋានដាំបបន្លែនេះ បន្ទាប់ពីរងការបំផ្លិចបំផ្លាញយ៉ាងធ្ងន់ធ្ងរពីព្យុះស៊ីក្លូន ឌីតវ៉ាស (Ditwah) កាលពីខែវិច្ឆិកា ឆ្នាំ២០២៥ ដែលបង្កផលប៉ះពាល់យ៉ាងខ្លាំងដល់ផលិតកម្មកសិកម្ម និងជីវភាពរស់នៅទូទាំងប្រទេសស្រីលង្កា។
តំបន់ខ្ពង់រាបរបស់ស្រីលង្កា ដែលគេស្គាល់ថា ជាទីតាំងដាំដំណាំបន្លែ ដូចជា សណ្តែក ការ៉ុត ខ្ទឹមបារាំង ស្ពៃក្តោប ប៉េងប៉ោះ និងដំឡូង បានរងផលប៉ះពាល់ខ្លាំងបំផុត ធ្វើឱ្យកសិករខ្នាតតូចរាប់ពាន់នាក់នៅក្នុងតំបន់ទាំងនេះ បានបាត់បង់ផលដំណាំ ខ្វះគ្រាប់ពូជ និងអស់ទ្រព្យសម្បត្តិជាច្រើន។
គម្រោងស្តារឡើងវិញនេះត្រូវបានរៀបចំជាកម្មវិធីអន្តរាគមន៍រយៈពេល១២ខែ ក្នុងគោលបំណងស្តារ និងពង្រឹងការធ្វើកសិកម្មដាំបន្លែ ដែលធន់នឹងអាកាសធាតុ ដោយផ្តោតជាពិសេសលើការផ្តល់សិទ្ធិអំណាចដល់កសិករស្ត្រី និងគាំទ្រជនពិការ។
កសិករខ្នាតតូចជាង២៤០០នាក់នឹងទទួលបានអត្ថប្រយោជន៍ដោយផ្ទាល់តាមរយៈការកែលម្អផលិតកម្មគ្រាប់ពូជ និងបន្តុះពូជដំណាំ ព្រមទាំងទទួលបានជំនួយជាគ្រឿងចក្រខ្នាតតូច ការបណ្តុះបណ្តាល និងការពង្រឹងការតភ្ជាប់ទីផ្សារ។
សមាសធាតុសំខាន់ៗនៃគំនិតផ្តួចផ្តើមនេះ រួមមានការស្ដារឡើងវិញ នូវប្រព័ន្ធគ្រាប់ពូជរបស់កសិករ ដូចសណ្តែក និងដំឡូងជាដើម រួមទាំងការគាំទ្រទាំងប្រព័ន្ធដាំដុះនៅទីវាល និងនៅក្នុងផ្ទះសំណាញ់ និងការបង្កើតថ្នាលសម្រាប់បណ្តុះកូនដំណាំ ។ ថ្នាលទាំងនេះនឹងដំណើរការជាសហគ្រាសកសិកម្មប្រកបដោយនិរន្តរភាព ផលិតកូនបន្លែ ដែលមានគុណភាពខ្ពស់ បង្កើតឱកាសស្វែងរកប្រាក់ចំណូលបន្ថែម និងពង្រឹងខ្សែសង្វាក់ផ្គត់ផ្គង់ធាតុចូលកសិកម្ម។
គម្រោងនេះសង្កត់ធ្ងន់លើការអនុវត្តកសិកម្មឆ្លាតវៃតាមអាកាសធាតុ (Climate-Smart Good Agricultural Practices) ការអភិវឌ្ឍថ្នាលបណ្តុះកូនឈើ ដែលដឹកនាំដោយស្ត្រី និងគ្រឿងម៉ាស៊ីន និងការគាំទ្រធាតុចូលខ្នាតតូច។ តាមរយៈការរួមបញ្ចូលគ្នានូវកិច្ចខិតខំប្រឹងប្រែងស្តារឡើងវិញភ្លាមៗជាមួយនឹងយុទ្ធសាស្ត្រភាពធន់រយៈពេលវែង គំនិតផ្តួចផ្តើមនេះមានគោលបំណងធ្វើឱ្យផលិតកម្មបន្លែមានស្ថិរភាព កែលម្អសន្តិសុខស្បៀង និងអាហារូបត្ថម្ភក្នុងគ្រួសារ និងកាត់បន្ថយការពឹងផ្អែកលើគ្រាប់ពូជនាំចូល។
ដើម្បីដោះស្រាយភាពងាយរងគ្រោះជារចនាសម្ព័ន្ធក្នុងការផ្គត់ផ្គង់គ្រាប់ពូជ ប្រព័ន្ធផលិតកម្ម និងការតភ្ជាប់ទីផ្សារ គម្រោងនេះក៏ព្យាយាមលើកកម្ពស់សមត្ថភាពរបស់កសិករ និងសេវាកម្មផ្សព្វផ្សាយកសិកម្ម ដើម្បីសម្របខ្លួនទៅនឹងហានិភ័យអាកាសធាតុនាពេលអនាគត។
យុទ្ធសាស្ត្រនេះស្របតាមអាទិភាពជាតិរបស់ប្រទេសស្រីលង្កាលើបញ្ហាសន្តិសុខស្បៀង ភាពធន់នឹងអាកាសធាតុ និងការអភិវឌ្ឍជនបទប្រកបដោយបរិយាបន្ន ហើយនឹងត្រូវអនុវត្តដោយសហការយ៉ាងជិតស្និទ្ធជាមួយមន្ទីរកសិកម្ម និងទីភ្នាក់ងារស្ថិតនៅតាមបណ្តាខេត្ត៕ (ផាន់ អាណា)
