ដោយ នៅ ស៊ីវុត្ថា
ភ្នំពេញ៖ ស្ថាប័នអន្តរជាតិសំខាន់ៗ រួមានអង្គការកម្មសិទ្ធិបញ្ញាពិភពលោក ស្ថានទូតអូស្រ្តាលីប្រចាំព្រះកម្ពុជា និងអង្គការស្បៀង និងកសិកម្មនៃសហប្រជាជាតិប្រចាំកម្ពុជា បានប្តេជ្ញាបន្តជួយគាំទ្រ និងលើកម្ពស់កម្មសិទ្ធិបញ្ញា លើមុខទំនិញកម្ពុជាដើម្បីអាចប្រកួតប្រជែងក្នុងទីផ្សារ និងជំរុញកំណើនសេដ្ឋកិច្ចរបស់ប្រទេស។
ការប្តេជ្ញាចិត្តបែបនេះនៅក្នុងពិធីបើកទិវាកម្មសិទ្ធិបញ្ញាពិភពលោក ឆ្នាំ២០២៦ ក្រោមមូលបទ “កម្មសិទ្ធិបញ្ញា និងកីឡា ស្តីពីការត្រៀមរួចរាល់ ការកំណត់ និងច្នៃប្រឌិត” និងពិធីសម្ពោធគម្រោងកម្មសិទ្ធិបញ្ញា ព្រមទាំងពិធីតាំងពិព័រណ៍ផលិតផល ម៉ាកសម្គាល់ភូមិសាស្រ្តទំនិញ ម៉ាកសមូហភាព និងស្នាដៃចំណេះដឹងប្រពៃណី និងវិញ្ញត្តវប្បធម៌ជាប្រពៃណី នាព្រឹកថ្ងៃអង្គារ ទី២៨ ខែមេសា ឆ្នាំ២០២៦ នាទីស្តីការក្រសួងពាណិជ្ជកម្ម។
ក្នុងឱកាសនេះ លោកស្រី ប៊្រីហ្គេត ខូល្លៀ (Bridget Collier) ភារធារីស្ថានទូតអូស្រ្តាលីប្រចាំកម្ពុជា,លោកស្រី រេបេកាស បេល (Rebakah Bell) តំណាងអង្គការស្បៀង និងកសិកម្មនៃសហប្រជាជាតិប្រចាំកម្ពុជា ,លោក គុយ ប៉េសាច (Guy Pessach) ប្រធាននាយកដ្ឋានកម្មសិទ្ធិបញ្ញាសម្រាប់ធុរកិច្ចផ្នែកប្រព័ន្ធអេកូឡូស៊ីនវានុវត្តន៍កម្មសិទ្ធិបញ្ញានៃអង្គការកម្មសិទ្ធិបញ្ញាពិភពលោក បានលើកឡើងព្រមគ្នាក្នុងជួយគំាទ្រលើការលើកម្ពស់កម្មសិទ្ធិបញ្ញាលើមុខទំនិញកម្ពុជា ដើម្បីធានាបាននូវប្រសិទ្ធិភាព និងការប្រកួតប្រជែងជាពិសេស រក្សាបាននូវគុណតម្លៃ និងអត្ថប្រយោជន៍ផ្សេងទៀតរបស់កសិករ។
សូមគូសបញ្ជាក់ផងដែរថា ក្នុងរយៈពេលបួនខែក្នុងឆ្នាំ២០២៦នេះ ក្រសួងពាណិជ្ជកម្មបានចុះបញ្ជីម៉ាកសម្គាល់ភូមិសាស្ត្រទំនិញចំនួនបួនបន្ថែមដល់តំណាងសមាគមទាំងបួន រួមមាន៖ ១)-សូត្រមាសភ្នំស្រុក, ២)- ក្តាមថ្មកោះកុង, ៣)-ស្វាយឧត្តរមានជ័យ, ៤)-ស្វាយចន្ទីកំពង់ធំ និងម៉ាកសមូហភាពឃ្មុំព្រៃព្រះវិហារ។ ដែលការណ៍នេះ ធ្វើឱ្យម៉ាកសម្គាល់ភូមិសាស្ត្រទំនិញកម្ពុជា (Geographical Indications (GI) មានការកើនឡើងដល់ចំនួន១២ ដែលក្នុងនោះមាន៖ ១)-ម្រេចកំពត, ២)- ស្ករត្នោតកំពង់ស្ពឺ, ៣)-ឃ្មុំព្រៃមណ្ឌលគិរី, ៤)-ក្រូចថ្លុងកោះទ្រុង, ៥)-ទឹកត្រីកំពតកែប, ៦)-អំបិលកំពតកែប, ៧)-បង្កងតាកែវ, ៨)-ប្រហុកសៀមរាប, ៩)-ស្វាយចន្ទីកំពង់ធំ, ១០)-ស្វាយឧត្តរមានជ័យ, ១១)-ក្តាមថ្មកោះកុង និង ១២)-សូត្រមាសភ្នំស្រុក៕
