ដោយ ឡុង សារេត
ភ្នំពេញ៖ ក្រសួងពាណិជ្ជកម្ម នៅថ្ងៃទី២៨ ខែមេសា ឆ្នាំ២០២៦នេះ បានរៀបចំទិវាកម្មសិទ្ធិបញ្ញាពិភពលោកឆ្នាំ២០២៦ ក្រោមមូលបទ “កម្មសិទ្ធិបញ្ញា និងកីឡា” ស្តីអំពីការត្រៀមរួចរាល់ ការកំណត់ និងច្នៃប្រឌិត និងពិធីសម្ពោធគម្រោងកម្មសិទ្ធិបញ្ញា ព្រមទាំងពិធីតាំងពិព័រណ៍ផលិតផល ម៉ាកសម្គាល់ភូមិសាស្រ្តទំនិញ ម៉ាកសមូហភាព និងស្នាដៃចំណេះដឹងប្រពៃណី និងវិញ្ញត្តវប្បធម៌ជាប្រពៃណី។
ពិធីនេះមានការអញ្ជើញចូលរួមពី លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងជាប្រធានគណៈកម្មាធិការជាតិគ្រប់គ្រងកម្មសិទ្ធិបញ្ញា ,ឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ លោកជំទាវ ប្រ៊ីហ្គេត ខូល្លៀ (Bridget Collier) ភារធារីស្ថានទូតអូស្រ្តាលីប្រចាំព្រះរាជាណាចក្រកម្ពុជា លោកស្រី រេបាកាស បេល (Rebakah Bell) តំណាងអង្គការស្បៀង និងកសិកម្មនៃសហប្រជាជាតិប្រចាំកម្ពុជា លោក ហ្គុយ ប៉េសាច (Guy Pessach) ប្រធាននាយកដ្ឋានកម្មសិទ្ធិបញ្ញាសម្រាប់ធុរកិច្ចផ្នែកប្រព័ន្ធអេកូឡូស៊ីនវានុវត្តន៍កម្មសិទ្ធិបញ្ញានៃអង្គការកម្មសិទ្ធិបញ្ញាពិភពលោក។
ក្នុងឱកាសនោះដែរ ឯកឧត្តម អ៊ុក ប្រជា រដ្ឋលេខាធិការក្រសួងពាណិជ្ជកម្មបានអានសារលិខិតអបអរសាទរទិវាកម្មសិទ្ធបញ្ញាពិភពលោក ឆ្នាំ២០២៦ របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដោយលើកឡើងថា ការប្រារព្ធទិវាកម្មសិទ្ធិបញ្ញាពិភពលោក ឆ្នាំ២០២៦ ដើម្បីបញ្ជ្រាបការយល់ដឹងឱ្យបានទូលំទូលាយ សំដៅលើកកម្ពស់ការអភិវឌ្ឍកម្មសិទ្ធិបញ្ញា ការធ្វើពាណិជូបនីយកម្មទ្រព្យកម្មសិទ្ធិបញ្ញា និងកិច្ចការពារកម្មសិទ្ធិបញ្ញាឱ្យមានប្រសិទ្ធភាពខ្ពស់ ដើម្បីជំរុញនវានុវត្តន៍ និងគំនិតច្នៃប្រឌិតគ្រប់វិស័យ រួមទាំងការអភិវឌ្ឍវិស័យកីឡា។ កិច្ចការពារកម្មសិទ្ធិបញ្ញា គឺជាមូលដ្ឋានគ្រឹះនៃ ប្រតិបត្តិការ និងការអភិវឌ្ឍធុរកិច្ច ដើម្បីចូលរួមជំរុញការអភិវឌ្ឍសេដ្ឋកិច្ច រួមបញ្ចូលវិស័យកីឡាផងដែរ។
ឯកឧត្តមមានប្រសាសន៍ថា រាជរដ្ឋាភិបាលកម្ពុជាក៏បានគិតគូរយ៉ាងហ្មត់ចត់នៅក្នុងការផ្តល់ការគាំពារដល់ម្ចាស់កម្មសិទ្ធិបញ្ញា ដោយបានរៀបចំបង្កើតក្របខ័ណ្ឌគតិយុត្តពាក់ព័ន្ធ ក្នុងនោះ រួមមាន : (១) ច្បាប់ស្តីពីម៉ាកពាណិជ្ជនាម និងអំពើប្រកួតប្រជែងមិនស្មោះត្រង់ (២) ច្បាប់ស្តីពីសិទ្ធិអ្នកនិពន្ធ និងសិទ្ធិប្រហាក់ប្រហែល (៣) ច្បាប់ស្តីពីប្រកាសនីយបត្រតក្កកម្ម វិញ្ញាបនបត្រម៉ូដែលមានអត្ថប្រយោជន៍ និងគំនូរឧស្សាហកម្ម (៤) ច្បាប់ស្តីពីការគ្រប់គ្រងពូជដំណាំ និងសិទ្ធិអ្នកបង្កាត់ពូជដំណាំ និង (៥) ច្បាប់ស្តីពីម៉ាកសម្គាល់ភូមិសាស្ត្រទំនិញ។ ជា
ព្រមមួយគ្នានេះដែរ ក្នុងគោលដៅពង្រឹងកិច្ចសហការលើកកម្ពស់កម្មសិទ្ធិបញ្ញានៅកម្ពុជា រាជរដ្ឋាភិបាលកម្ពុជាបានបង្កើតគណៈកម្មាធិការជាតិគ្រប់គ្រង កម្មសិទ្ធិបញ្ញា ដែលមានក្រសួងពាណិជ្ជកម្មជាប្រធាន និងសមាជិកចំនួន១៧ក្រសួង ដើម្បីដឹកនាំការងារសម្របសម្រួល ពាក់ព័ន្ធនឹងកិច្ចការកម្មសិទ្ធិបញ្ញា ដែលមានចរិតលក្ខណៈប្រទាក់ក្រឡានៅគ្រប់វិស័យ និងចូលរួមពង្រឹងនិងពង្រីកកិច្ចសហប្រតិបត្តិការអន្តរជាតិជាមួយដៃគូអភិវឌ្ឍន៍ និងអង្គការអន្តររដ្ឋាភិបាលទាំងក្នុងតំបន់ និងពិភពលោក។
បើយោងតាមសារលិខិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានគូសបញ្ជាក់ថា ទិវាកម្មសិទ្ធិបញ្ញាពិភពលោក ឆ្នាំ២០២៦ បានរំលេចពីអត្ថប្រយោជន៍នៃការលើកកម្ពស់កម្មសិទ្ធិបញ្ញា មិនត្រឹមតែនៅក្នុងវិស័យកីឡានោះទេ ប៉ុន្តែក៏បានបង្ហាញអំពីសារៈសំខាន់នៅក្នុងការជំរុញអ្នកវិនិយោគឱ្យបណ្តាក់ទុន ក្នុងផ្នែកស្រាវជ្រាវ និងអភិវឌ្ឍន៍ ដើម្បីចូលរួមធានាលើការផ្ទេរ និងការអភិវឌ្ឍបច្ចេកវិទ្យា និងផលិតផល ដែលជាកត្តាចាំបាច់សម្រាប់ការអភិវឌ្ឍវិស័យពាណិជ្ជកម្ម ឧស្សាហកម្ម កសិកម្ម វិទ្យាសាស្ត្រ បច្ចេកវិទ្យា ទេសចរណ៍ និងវប្បធម៌ ជាពិសេសជំរុញការអភិវឌ្ឍសហគ្រាសធុនតូច និងមធ្យម ដែលជាក្បាលម៉ាស៊ីននៃកំណើនសេដ្ឋកិច្ច៕
