ដោយ រស្មី
ភ្នំពេញ៖ រយៈពេលប៉ុន្មានឆ្នាំចុងក្រោយនេះតម្រូវការ កាហ្វេនៅកម្ពុជាបានកំពុងមានទីផ្សារខ្ពស់បន្តបន្ទាប់ ទាំងនៅក្នុងទីក្រុង ស្រុកឃុំ រហូតដល់ភូមិ ការនិយមផឹកកាហ្វេមាននិន្នាការកាន់តែច្រើនឡើង។ សមាគមកាហ្វេកម្ពុជា បានបង្ហាញពីតម្រូវការកាន់តែច្រើននៃទីផ្សារកាហ្វេពិសេសការដាំកាហ្វេក្នុងស្រុកគឺជាតម្រូវការចាំបាច់មួយ។
ក្រៅពីដំណាំកាហ្វេ ដែលដាំក្នុងស្រុកសម្រាប់តម្រូវការប្រើប្រាស់លើទីផ្សារហើយ កាហ្វេក្រៅប្រទេសក៏ជាតម្រូវការចាំបាច់មួយសម្រាប់ទីផ្សារក្នុងប្រទេសកម្ពុជាដែរ។ សមាគមកាហ្វេកម្ពុជាបានឱ្យដឹងផងថា កសិករដាំកាហ្វេនៅកម្ពុជានោះទំហំខ្នាតតូចដែលមានចាប់ពីមួយហិកតា ដល់ប្រាំហិកតាមានចំនួនច្រើន តែសម្រាប់ខ្នាតធំ ដែលមានទំហមចាប់ពី៥ ដល់១០ហិកតានោះមានចំនួនតិចតួចនៅឡើយ ពោលគឺមានប្រមាណប្រាំភាគរយប៉ុណ្ណោះ។
ដោយឡែកអង្គការអភិវឌ្ឍន៍សហគ្រាសអន្តរជាតិ (International Development Enterprises-IDE) កម្ពុជាវិញ បានឱ្យដឹងថា សម្រាប់កសិករខ្នាតតូចដាំកាហ្វេនៅក្នុងខេត្តមណ្ឌលគិរី បានអនុវត្តវិធីសាស្រ្តដាំដុះតាមបែបប្រពៃណីអស់រយៈពេលជាច្រើនទសវត្សរ៍មកហើយ។ សម្រាប់កសិករដាំកាហ្វេជនជាតិដើមភាគតិចព្នង ក្នុងខេត្តមណ្ឌលគិរី ក៏បានបញ្ហាប្រឈមនឹងបញ្ហាស្មុគស្មាញនាកន្លងមកច្រើន ក្នុងនោះរាប់ទាំងបំណុល ទិន្នផលថយចុះ ការប្រែប្រួលអាកាសធាតុ និងការកង្វះទំនាក់ទំនងទីផ្សារជាដើម។
ទោះបីយ៉ាងណាក្នុងរយៈពេលប៉ុន្មានឆ្នាំចុងក្រោយនេះ តាមរយៈគំនិតផ្តួចផ្តើមស្តីពីការដាំកាហ្វេតាមបែបកសិកម្មបែបថ្មីបានកកើតឡើងវិញ តាមរយៈអង្គការអភិវឌ្ឍន៍សហគ្រាសអន្តរជាតិកម្ពុជាធ្វើឱ្យកសិកម្មបែបថ្មីនេះ មិនត្រឹមតែផ្លាស់ប្តូរទម្លាប់អនុវត្តកសិកម្មប៉ុណ្ណោះទេ ប៉ុន្តែគម្រោងនេះ បានកសាងសមត្ថភាពកសិករឱ្យមានសមត្ថភាពកាន់ខ្ពស់ក្នុងការដាំដំណាំកាហ្វេបែបថ្មីនេះ។
អង្គការ អភិវឌ្ឍន៍សហគ្រាសអន្តរជាតិ កម្ពុជា មិនត្រឹមតែជួយឱ្យកសិករអនុវត្តកសិកម្មបែបកកើតឡើងវិញដោយផ្ទាល់នោះទេក្នុងនោះជាមួយដៃគូថែមទាំងបានផ្តល់នូវ ចំណេះដឹងបច្ចេកទេស ការថែទាំ និងប្រព័ន្ធស្រោចស្រពដើរដោយថាមពលពន្លឺព្រះអាទិត្យ។ក្រៅពីនេះក៏បាន កសាងតួអង្គមូលដ្ឋាន ដែលអាចពង្រីកឥទ្ធិពលទៅដល់កសិកររាប់រយនាក់ផ្សេងទៀត ដោយរក្សាបាននូវជំនាញ និងភាពជាអ្នកដឹកនាំឱ្យស្ថិតនៅក្នុងសហគមន៍ និងមានភាពជាម្ចាស់ការដោយផ្ទាល់នៅក្នុងមូលដ្ឋានទៀតផង។
ទាក់ទិនក្នុងការដាំកាហ្វេនៅកម្ពុជានេះដែរ លោក ឌុក ពិសិដ្ឋ ប្រធានសមាគមកាហ្វេកម្ពុជា បានបញ្ជាក់ប្រាប់ថាដោយសារតម្រូវការកាហ្វេនៅកម្ពុជាមានកំណើនកើនឡើងឥតឈប់ឈរមក ម្ល៉ោះហើយការពង្រីកការដាំដុះគឺជារឿងសំខាន់ចាំបាច់ របស់សហគមក៏ដូចជាប្រជាកសិករដើម្បីរកប្រាក់កម្រៃក្នុងការផលិតកាហ្វេឱ្យគ្រប់តាមតម្រូវការទីផ្សារ។
ប្រធានសមាគមកាហ្វេកម្ពុជាបានបញ្ជាក់ប្រាប់ដែរថាគិតមកដល់ជិតពាក់កណ្តាលឆ្នាំ២០២៦នេះទំហំផ្ទៃដីដាំកាហ្វេបានកើនឡើងដល់ជិត១ពាន់ហិកតាហើយនៅចុងឆ្នាំ២០២៦នេះ ហើយកំណើននេះអាចឈានដល់៥ទៅ៦រយហិកតាបន្ថែមទៀត។ពេលនេះមានសមាជិក នៃ សមាគម អ្នកដាំកាហ្វកាន់តែច្រើនឡើងបានកំពុងចង់ពង្រីកការដាំកាហ្វេ តាមតម្រូវការទីផ្សារ។
លោក ឌុក ពិសិដ្ឋ បញ្ជាក់ប្រាប់ដែរថាកសិករដាំហ្វេច្រើនៅខេត្តមណ្ឌលគិរី និងរតនគិរី ។ក្រៅពីនេះនៅតំបន់ផ្សេងៗទៀតដូចជាអូរសោម ខេត្តពោធិ៍សាត់ កោះកុង ប៉ៃលិន ត្បូងឃ្មុំ កំពង់ចាមក៏មានដាំដូចគ្នាតែមិនច្រើនទេ។
ប្រធានសហគមកាហ្វេកម្ពុជា ឱ្យដឹងបន្ថែមថាកាហ្វេកម្ពុជាក៏ស្ថិតនៅក្នុងចំណោមកាហ្វេដែលមានគុណភាពល្អ ឬជាកាហ្វប្រណិត ក្នុងនោះកាលពីឆ្នាំ២០២៤កន្លងមក កាហ្វេកម្ពុជាជាប់លេខ១៩លើពិភពលោកទៀតផង។
លោក ឌុក ពិសិដ្ឋ បានបញ្ជាក់ប្រាប់ថាបច្ចុប្បន្នកាហ្វេកម្ពុជាមានទីផ្សារល្អដាំបានប៉ុន្មានលក់អស់ៗ តែយ៉ាងណាក្នុងមួយឆ្នាំៗការផ្គាត់ផ្គង់កាហ្វេបានត្រឹមតែប្រមាណ១ពាន់តោន ខណៈតម្រូវការប្រើប្រាស់ពីជាង១ម៉ឺនតោនទៅ២ម៉ឺនតោន ដែលធ្វើឱ្យការប្រើប្រាស់ភាគច្រើននាំចូលមកពីខាងក្រៅប្រទេស។បើគិតពីបរិមាណវិញកាហ្វេកម្ពុជាផ្គត់ផ្គង់បានប្រមាណ៥ទៅ៨ភាគរយទេ។ហេតុនេះការបង្កើនការដាំក្នុងស្រុកជាទីល្អមួយបំផុតសម្រាប់ទីផ្សារ។
ដោយឡែកក្នុងរបាយការណ៍ប្រចាំឆ្នាំ២០២៥របស់ក្រសួងកសិកម្មរុក្ខាប្រមាញ់ និងនេសាទបានបង្ហាញថាសម្រាប់បរិមាណផលិតផលកាហ្វេនៅប្រទេសកម្ពុជាក្នុងឆ្នាំ២០២៥កន្លងមក បានសរុបជាង១៣១៤តោន ហើយទិន្នផលជាមធ្យមរបស់កាហ្វេគឺ២,៥០តោនក្នុងមួយហិកតា។
គួរបញ្ជាក់ថាបើតាមរបាយការណ៍របស់សមាគមកាហ្វេកម្ពុជាតម្លៃកាហ្វេ ពាក់កណ្តាលខែមេសា ឆ្នាំ២០២៦ នេះកាហ្វេមិនទាន់សម្អាតឬមិនទាន់កែច្នៃស្ថិតនៅក្នុងតម្លៃ ១៤០០ទៅ១៦០០០រៀលក្នុងមួយគីឡូក្រាម៕
