ភ្នំពេញ៖ ក្រុមហ៊ុនក្នុងស្រុកមួយគ្រោងកែច្នៃខ្លឹមចន្ទន៍ក្រស្នា ជាវត្ថុអនុស្សាវរីយ៍ដ៏ប្រណីតសម្រាប់ទាក់ទាញភ្ញៀវទេសចរមូស្លីម ស្របពេលរាជរដ្ឋាភិបាលកម្ពុជាកំពុងខិតខំប្រឹងប្រែង ដើម្បីប្បង្កើតគោលដៅទេសចរណ៍សម្រាប់ជនមូស្លីម។
ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ នៅថ្ងៃទី១៩ ខែមីនា ឆ្នាំ២០២៦ បានអនុញ្ញាតឱ្យ ឧកញ៉ាបណ្ឌិត ណាង សុធី ប្រធានក្រុមប្រឹក្សាក្រុមហ៊ុន ធី ហូលឌីង (THY HOLDING CO., LTD) ចូលជួពិភាក្សាលើគម្រោងរៀបចំវត្ថុអនុស្សាវរីយ៍ប្រណិតដែលកែច្នៃឡើងពីខ្លឹមចន្ទន៍ក្រស្នា ដើម្បីធ្វើជាគ្រឿងក្រអូប គ្រឿងកែសម្ផស្ស សម្រាប់លក់ជូនភ្ញៀវទេសចរអារ៉ាប់ ។
ក្នុងឱកាសនោះ ឧកញ៉ាបណ្ឌិត បានលើកឡើងពីផែនការរបស់ក្រុមហ៊ុនដោយក្រុមហ៊ុនគ្រោងនឹងរៀបចំកែច្នៃខ្លឹមចន្ទន៍ក្រស្នាឱ្យទៅជាវត្ថុអនុស្សាវរីយ៍ដ៏ប្រណិតសម្រាប់ភ្ញៀវទេសចរ និងគ្រោងបើកជាហាងលក់វត្ថុអនុស្សាវរីយ៍ប្រណិតដែលកែច្នៃពីខ្លឹមចន្ទន៍ក្រស្នា នៅក្នុងប្រទេសកម្ពុជា ព្រមទាំងគ្រោងរៀបចំទៅជាកសិទេសចរណ៍ នាពេលខាងមុខ។
ជាការឆ្លើយតប ឯកឧត្តមរដ្ឋមន្រ្តី បានលើកឡើងថា ដើម្បីទាក់ទាញនូវភ្ញៀវទេសចរអារ៉ាប់មកទស្សនាកម្ពុជាឱ្យកាន់តែច្រើន ក្រសួងទេសចរណ៍ បាននិងកំពុងអនុវត្តផែនការទេសចរណ៍មូស្លីម ២០២៣-២០២៧ ក៏ដូចជាសហការជាមួយក្រសួង ស្ថាប័នពាក់ព័ន្ធក្នុងការជំរុញម្ហូបអាហារហាលឡាល់ និងស្តង់ដា Cambodia Muslim Friendly ។
ក្នុងន័យនេះ ឯកឧត្តមរដ្ឋមន្ត្រី ថ្លែងនូវការកោតសរសើរនិងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមហ៊ុននាពេលកន្លងមក និងគម្រោងវិនិយោគរបស់ក្រុមហ៊ុន ដែលនឹងជាតម្លៃបន្ថែមខ្ពស់ក្នុងវិស័យទេសចរណ៍ ជាពិសេសនឹងចូលរួមជួយជំរុញទេសចរណ៍មូស្លីម និងទាក់ទាញភ្ញៀវទេសចរមូស្លីម។
ជាមួយគ្នានេះ ឯកឧត្តមរដ្ឋមន្ត្រី ក៏បានផ្តល់អនុសាសន៍ដល់ក្រុមហ៊ុនស្វែងរកការប្រឹក្សាផ្លូវច្បាប់ដើម្បីដំណើរការគម្រោងខាងលើស្របតាមច្បាប់និងលិខិតបទដ្ឋានគតិយុត្តជាធរមាន។
កម្ពុជា បានដាក់ផែនការអភិវឌ្ឍទេសចរណ៍មូស្លីម រយៈពេលប្រាំឆ្នាំ ចាប់ពីឆ្នាំ២០២៣ ដល់២០២៧ ដែលមានចក្ខុវិស័យប្រែក្លាយកម្ពុជា ទៅជាគោលដៅទេសចរណ៍ទាក់ទាញ និងផ្ដល់ភាពកក់ក្ដៅសម្រាប់ទេសចរមូស្លីម។
នៅក្នុងឱកាសបើកវេទិកា និងពិព័រណ៍ទេសចរណ៍មូស្លីម នៅថ្ងៃទី៩ ខែតុលា ឆ្នាំ២០២៥ លោក កាទើ មហាំម៉ាត់ ណើសស្រ៉ី រដ្ឋលេខាធិការក្រសួងទេសចរណ៍ បានឲ្យដឹងថា ភ្ញៀវទេសចរមូស្លីម បានមកលេងកម្សាន្ត ប្រទេសកម្ពុជាមានការកើនឡើងពីមួយឆ្នាំទៅមួយឆ្នាំ ពោលគឺឆ្នាំ២០២៤ កម្ពុជាទទួលបានជាង៤០ម៉ឺននាក់ បើធៀបនឹងឆ្នាំមុន មានជាង៣០ម៉ឺននាក់៕
