ប៉ារីស៖ ការចេញបទប្បញ្ញត្តិថ្មីជាផ្លូវការរបស់បារាំង ដែលដាក់កម្រិតលើការនាំចូល និងលក់ផលិតផលបន្លែ និងផ្លែឈើ មានសំណល់សារធាតុថ្នាំគីមីលើសកម្រិតមួយចំនួន បានបង្កផលប៉ះពាល់ដល់ទីផ្សារ នៅក្នុងប្រទេសបារាំងនៅដើមឆ្នាំ២០២៦នេះ។
បទប្បញ្ញត្តិថ្មី ដែលបានបោះពុម្ពផ្សាយនៅក្នុងសៀវភៅរដ្ឋកិច្ចផ្លូវការរបស់រដ្ឋាភិបាលបារាំង កាលពីថ្ងៃទី៥ ខែមករា និងចូលជាធរមាននៅថ្ងៃទី៨ ខែកុម្ភៈ ឆ្នាំ២០២៦ បានកំណត់កម្រិតសំណល់អតិបរមាសម្រាប់សារធាតុថ្នាំគីមីពុល មានឈ្មោះដូច កាបង់ដាហ្សីម (Carbendazim) ត្យូផាណាត-មេទីល (Thiophanate-methyl) គ្លុយហ្វូស៊ីណាត (Glufosinate) និងសារធាតុគីមីឈ្មោះ ម៉ង់កូហ្សែប (Mancozeb) ដែលប្រើធ្វើឱ្យផ្លែឈើស្រស់ៗ និងសម្រាប់កែច្នៃបន្លែជាច្រើនប្រភេទ។
ជាការឆ្លើយតបចំពោះបទប្បញ្ញត្តិថ្មីជាផ្លូវការរបស់បារាំង ក្រុមហ៊ុននាំចូលបន្លែ និងផ្លែឈើដ៏ធំនៅអឺរ៉ុប ឈ្មោះ ម៉ុងតូសា (Montosa) បាននិយាយថា ផលិតផលរបស់ខ្លួនពិតជាបានអនុលោមតាមតម្រូវការ ដែលសហភាពអឺរ៉ុបកំណត់ឡើងនាពេលថ្មីៗនេះ។ ចំណែកសារធាតុគីមីឈ្មោះ ម៉ង់កូហ្សែប ត្រូវបានរាប់បញ្ចូលក្នុងកម្មវិធីត្រួតពិនិត្យផ្ទៃក្នុងរបស់សហភាពអឺរ៉ុបអស់រយៈពេលជាច្រើនឆ្នាំកន្លងមកហើយ។
នាយកផ្នែកគ្រប់គ្រងគុណភាពរបស់ក្រុមហ៊ុនម៉ុងតូសា បាននិយាយថា កាលពីក្នុងឆ្នាំ២០១៧ មន្ទីរពិសោធន៍មីក្រូជីវសាស្រ្តបានអនុញ្ញាតឱ្យប្រើលើផលិតផលបន្លែ និងផ្លែឈើរបស់ខ្លួន ហើយត្រូវបានអនុញ្ញាតឱ្យប្រើ ដើម្បីអនុវត្តការវិភាគសំណល់សារធាតុគីមីផងដែរ។
លោកស្រីបាននិយាយថា សារធាតុគីមីឈ្មោះ ម៉ង់កូហ្សែប គឺស្ថិតក្នុងចំណោមសារធាតុសកម្ម ដែលត្រូវបានវិភាគជាផ្នែកមួយនៃផែនការត្រួតពិនិត្យរបស់ក្រុមហ៊ុន ហើយផលិតផលបន្លែ និងផ្លែឈើរបស់ក្រុមហ៊ុនមិនមានសំណល់នៃសារធាតុនេះទេ។
ស្ត្រីតំណាងក្រុមហ៊ុន បានបង្ហាញទៀតថា ការអនុលោមតាមច្បាប់គួរតែផ្សារភ្ជាប់ទៅនឹងប្រព័ន្ធត្រួតពិនិត្យគុណភាព និងតម្រូវការអ្នកផ្គត់ផ្គង់។ ដូច្នេះ អ្នកលក់រាយនៅអឺរ៉ុបបានអនុវត្តតាមលក្ខណៈបច្ចេកទេស ដែលអាចប្រើសារធាតុគីមីនេះលើសពីកម្រិតច្បាប់អនុញ្ញាត ហើយអ្នកនាំចេញត្រូវធ្វើទាំងក្នុងដែនកំណត់របស់ច្បាប់ និងតម្រូវការរបស់អតិថិជន។
យោងតាមក្រុមហ៊ុននាំចូលបន្លែ និងផ្លែឈើ បានឱ្យដឹងទៀតថា ការត្រួតពិនិត្យគុណភាពត្រូវបានអនុវត្តទាំងនៅក្នុងខ្សែសង្វាក់ផលិតផលស្រស់ៗ និងខ្សែសង្វាក់វេចខ្ចប់កែច្នៃ។ ក្រុមហ៊ុនបានអះអាងដូច្នេះ គឺសំដៅទៅលើបណ្តាញផ្គត់ផ្គង់របស់ខ្លួន ដែលរួមមានអ្នកដាំដុះជាង៣ ០០០នាក់នៅប្រទេសអេស្ប៉ាញ និងនៅក្នុងបណ្តាប្រទេសក្នុងតំបន់អាម៉េរិកឡាទីន។
ក្រុមហ៊ុននាំចូលបន្លែ និងផ្លែឈើ ម៉ុងតូសា បាននិយាយទៀតថា ការប្រាស្រ័យទាក់ទងជាមួយអ្នកដាំដុះត្រូវបានពង្រឹង បន្ទាប់ពីការបោះពុម្ពផ្សាយបទប្បញ្ញត្តិថ្មីរបស់បារាំង នៅក្នុងសៀវភៅរដ្ឋកិច្ច ដើម្បីធានាថា រាល់ការដាំដុះ និងការដែទាំដំណាំ ត្រូវតែស្របតាមច្បាប់កំណត់អំពីសំណល់សារធាតុគីមី។
ចំណែកលោកស្រីនាយកគ្រប់គ្រងគុណភាពរបស់ក្រុមហ៊ុន នាងបាននិយាយអះអាងថា «យើងបានដឹងរួចហើយថា បន្លែ និងផ្លែឈើ ដែលយើងនាំចូលពិតជាមិនមានសំណល់សារធាតុគីមី ម៉ង់កូហ្សែបទេ»។
បទប្បញ្ញត្តិថ្មីរបស់បារាំង ធ្វើឡើងដើម្បីឆ្លើយតបទៅនឹងការព្រួយបារម្ភអំពីបញ្ហាសុខភាពសាធារណៈ និងផលប៉ះពាល់នៃការនាំចូលកសិផលពីបរទេសមកលើផលិតផល និងទីផ្សារកសិផលក្នុងប្រទេសបារាំង។ ក្រោយពេលច្បាប់ថ្មីនេះចូលជាធរមាន អ្នកនាំចូល និងអ្នកចែកចាយបន្លែ និងផ្លែឈើ នៅក្នុងប្រទេសបារាំង ត្រូវឱ្យបង្ហាញពីការអនុលោមភាពតាមកម្រិតសំណល់សារធាតុគីមី ដែលច្បាប់អនុញ្ញាត។
ពាក់ព័ន្ធនឹងសំណល់សារធាតុគីមីនៅលើផលិតផលបន្លែ និងផ្លែឈើនេះ ប្រទេសបារាំងបានប្រកាសពីផែនការផ្អាកការនាំចូលផ្លែឈើស្រស់ៗមួយចំនួន ដែលត្រូវបានរកឃើញថា មានសំណល់ថ្នាំគីមីសម្លាប់សត្វល្អិតលើសកម្រិត ហើយត្រូវបានហាមឃាត់ដាច់ខាតនៅក្នុងបណ្តាប្រទេសជាសមាជិកសហភាពអឺរ៉ុប។
នាយករដ្ឋមន្ត្រីបារាំង លោក សេបាស្ទៀន ឡឺគ័កនុយ (Sebastien Lecornu) បានមានប្រសាន៍ថា ការផ្អាកនេះនឹងអនុវត្តចំពោះផ្លែឈើណាមានសំណល់សារធាតុថ្នាំគីមីចំនួនបួនប្រភេទ ដែលត្រូវបានហាមឃាត់ដាច់ខាត នៅក្នុងសហភាពអឺរ៉ុប មានដូចជា ឈ្មោះសារធាតុគីមី ម៉ង់កូហ្សែប (Mancozeb) គ្លុយហ្វូស៊ីណាត (Glufosinate) ត្យូផាណាត-មេទីល (Thiophanate-methyl) និងសារធាតុគីមីឈ្មោះ កាបង់ដាហ្សីម (Carbendazim)។ នៅពេលក្រឹត្យនេះចូលជាធរមាន ការនាំចូលផ្លែឈើស្រស់ៗណាមានសំណល់ថ្នាំពុលទាំងនេះ នឹងមិនត្រូវបានអនុញ្ញាតឱ្យចូលប្រទេសបារាំងទៀតទេ។ វិធានការនេះផ្តោតសំខាន់លើផ្លែឈើជាច្រើនប្រភេទ ដែលត្រូវនាំចូលប្រទេសបារាំង រួមមានផ្លែបឺរ ស្វាយ ផ្លែត្របែក ផ្លែក្រូចឆ្មារ ទំពាំងបាយជូរ និងផ្លែប៉ោម។ ទំនិញទាំងនេះមានប្រភពមកពីបណ្តាប្រទេសក្នុងតំបន់អាម៉េរិកខាងត្បូង និងមកពីតំបន់ផ្សេងទៀត ដែលមិនមែនជាសមាជិកសហភាពអឺរ៉ុប។
ដើម្បីគាំទ្រដល់ការអនុវត្តច្បាប់ថ្មីនេះ អាជ្ញាធរបារាំងនឹងពង្រឹងការត្រួតពិនិត្យការនាំចូលតាមព្រំដែនឱ្យកាន់តែតឹងរ៉ឹង។ ការងារនេះនឹងត្រូវអនុវត្តដោយក្រុមអធិការកិច្ចជំនាញ ដែលមានភារកិច្ចផ្ទៀងផ្ទាត់ការអនុលោមភាពលើការនាំចេញផ្លែឈើ ដែលមានកម្រិតសំណល់ថ្នាំគីមីពុលស្របតាមស្តង់ដារបស់សហភាពអឺរ៉ុប។
ច្បាប់ថ្មីរបស់បារាំង ត្រូវបានធ្វើឡើងស្របតាមបរិបទថ្មី នៅក្នុងសហភាពអឺរ៉ុប ដែលកាន់តែរឹតបន្តឹងនូវការអនុវត្តច្បាប់ស្តីពីអនាម័យ និងភូតគាមអនាម័យ។ កសិករក្នុងប្រទេសជាសមាជិកសហភាពអឺរ៉ុប បានលើកឡើងម្តងហើយម្តងទៀតអំពីការប្រកួតប្រជែងជាមួយការនាំចូលផលិផលផ្លែឈើ ដែលដាំដុះក្រោមក្របខ័ណ្ឌបទប្បញ្ញត្តិខុសគ្នាស្រឡះពីការអនុវត្តនៅក្នុងសហភាពអឺរ៉ុប។ ការរឹតបន្តឹងនេះអាចប៉ះពាល់ដល់ខ្សែសង្វាក់ផ្គត់ផ្គង់ និងលទ្ធភាពទទួលបានទីផ្សារសម្រាប់អ្នកនាំចេញផ្លែឈើពីបណ្តាប្រទេស ដែលមិនមែនជាសមាជិកសហភាពអឺរ៉ុប ចូលទៅកាន់ប្រទេសបារាំង៕
