ហាណូយ៖ យោងតាមទិន្នន័យរបស់ភ្នាក់ងារគយវៀតណាម បានឱ្យដឹងថា ការនាំចេញផលិតផលបន្លែ និងផ្លែឈើរបស់ប្រទេសវៀតណាម ទទួលបានប្រាក់ចំណូលចំនួន៧៥០លានដុល្លារ នៅក្នុងខែធ្នូ និងចំនួន៧, ៧៥ពាន់លានដុល្លារ ក្នុងរយៈពេល១១ខែដំបូងនៃដំបូងនៃឆ្នាំ២០២៥ ដោយកើនឡើង១៧,៣ភាគរយ បើធៀបនឹងឆ្នាំ២០២៤។
តួលេខទាំងនេះបង្ហាញពីតម្រូវការជាសកល ប្រកបដោយចីរភាពសម្រាប់ផលិតផលផ្លែឈើ និងបន្លែវៀតណាម ដែលបង្កើតបាននូវមូលដ្ឋានរឹងមាំសម្រាប់ពាណិជ្ជកម្ម ឱ្យកើនឡើងលើសពី១០ពាន់លានដុល្លារ ក្នុងពេលឆាប់ៗនេះ។
យោងតាមការចេញរបស់សារព័ត៌មានវៀតណាម អេចប្រេស បានឱ្យដឹងថា កំណើនដ៏ល្អនេះ ដោយសារការនាំចេញផ្លែឈើសំខាន់ៗចំនួនប្រាំមួយមុខ មានដូចជា ផ្លែទុរេន ចេក ស្វាយ ខ្នុរ ដូង និងផ្លែក្រូចថ្លុង។
ផ្លែទុរេននៅតែជាផលិតផលលេចធ្លោជាងគេ ជាពិសេសនៅក្នុងទីផ្សារប្រទេសចិន ដែលតម្រូវការបានកើនឡើង។ ការនាំចេញផលិតផ្លែឈើវៀតណាម ត្រូវបានប៉ាន់ប្រមាណថា ទទួលចំណូលចំនួនជាង៤ ០០០លានដុល្លារ នៅឆ្នាំ២០២៦នេះ។
នាយកដ្ឋានផែនការ និងហិរញ្ញវត្ថុនៃក្រសួងកសិកម្ម និងបរិស្ថានវៀតណាម បានរាយការណ៍ថា តម្លៃនាំចេញជាមធ្យមសម្រាប់ផលិតផលកសិកម្មសំខាន់ៗជាច្រើន បានកើនឡើងនៅចុងឆ្នាំ២០២៥ ធ្វើប្រាក់ចំណូលនាំចេញកើនឡើងខ្ពស់។
ការនាំចេញបន្លែ និងផ្លែឈើរបស់វៀតនណាម នៅក្នុងឆ្នាំ២៩២៥ បានងើបឡើងវិញនៅក្នុងខែកញ្ញា និងខែតុលា ហើយក៏មានការកកស្ទះបង្កឱ្យប៉ះពាល់ដល់ការនាំចេញផ្លែទុរេន។
ការនាំចេញទៅកាន់ប្រទេសចិនមានតម្លៃជិត៥ ០០០លានដុល្លារ ក្នុងរយៈពេល១១ខែដំបូង នៃឆ្នាំ២០២៥ គឺខ្ពស់ជាងប្រហែល១៥ភាគ រយធៀបនឹងឆ្នាំ២០២៤ និងលើសពីកំណត់ត្រាពេញមួយឆ្នាំ ចំនួន៤ ៦៣០លានដុល្លារ ដែលបានកំណត់នៅឆ្នាំ២០២៤។ ចំណែកការនាំចេញទៅកាន់សហរដ្ឋអាមេរិក បានឈានដល់៤៩៩,២លានដុល្លារ កើនឡើង៥៦ ភាគរយ ខណៈពេលការនាំចេញទៅកាន់ប្រទេសកូរ៉េខាងត្បូង មានចំនួនសរុប២៨៤,២លានដុល្លារ។
ឥឡូវនេះ ប្រទេសវៀតណាម គឺជាអ្នកផ្គត់ផ្គង់ផ្លែឈើ និងបន្លែស្រស់ៗ និងកែច្នៃធំជាងគេទីពីរទៅកាន់ប្រទេសចិន ដោយការដឹកជញ្ជូនបានកើនឡើង២៦,៩ភាគរយ បើធៀបនឹងឆ្នាំ២០២៤។ ទំហំចំណែកទីផ្សាររបស់វៀតណាមក៏បានកើនឡើងពីរភាគរយនៅក្នុងខែតុលា បើប្រៀបធៀបទៅនឹង១៨,៥ ភាគរយ កាលពីឆ្នាំ២០២៤។
ការនាំចេញផលិតផលកសិកម្ម បានឈានដល់ជិតទឹកប្រាក់ចំនួន៧០ពាន់លានដុល្លារ នៅឆ្នាំ២០២៥ ដែលជាចំណុចរបត់ថ្មីមួយ ស្របពេលកំណើនលែងត្រូវបានជំរុញដោយបរិមាណតែមួយមុខទៀតហើយ ប៉ុន្តែក៏ត្រូវបានជំរុញដោយគុណភាព ការកែច្នៃ និងការអភិវឌ្ឍប្រកបដោយចីរភាពផងដែរ។
សមាគមបន្លែ និងផ្លែឈើ វៀតណាមបានកត់សម្គាល់ពីកំណើនខ្លាំងនៃការនាំចេញទំនិញកែច្នៃ រួមទាំងផលិតផលកំប៉ុង និងស្ងួត។ ផ្នែកនេះបានកត់ត្រាកំណើនពីរខ្ទង់ ហើយឥឡូវនេះមានតម្លៃប្រមាណ១, ៦៥ពាន់លានដុល្លារ ដែលគាំទ្រដោយការវិនិយោគកាន់តែច្រើននៅក្នុងកន្លែងកែច្នៃ និងបង្កើតបានជាតំបន់វត្ថុធាតុដើម។
ការនាំចេញបន្លែ និងផ្លែឈើ បានកើនឡើងយ៉ាងខ្លាំងក្នុងរយៈពេលបីឆ្នាំចុងក្រោយនេះ ដោយកើនឡើងពី៣,៣៤ពាន់លានដុល្លារ ក្នុងឆ្នាំ២០២២ កើនដល់៥៦ពាន់លានដុល្លារ ក្នុងឆ្នាំ២០២៣ ដែលភាគច្រើនត្រូវបានជំរុញដោយការដឹកជញ្ជូនផ្លែទុរេនទៅកាន់ប្រទេសចិន និងដល់៧,២ពាន់លានដុល្លារ កាលពីចុងឆ្នាំ២០២៤។
ដើម្បីបំពេញតាមតម្រូវការនាំចូលកាន់តែតឹងរ៉ឹង ក្រសួងកសិកម្មវៀតណាមនឹងសាកល្បងប្រើប្រព័ន្ធតាមដានផ្លែទុរេន ចាប់ពីថ្ងៃទី១ ខែមករា ដល់ថ្ងៃទី៣០ ខែមិថុនា ឆ្នាំ២០២៦។
គម្រោងនេះនឹងបង្កើតវេទិកាតាមដានរួមមួយ ដែលគ្របដណ្តប់លើការផលិត ការទិញ ការកែច្នៃ ការវេចខ្ចប់ ការដឹកជញ្ជូន និងការចែកចាយ។ ផលិតផលនឹងមានលេខ QR កូដ ឬការផ្ទៀងផ្ទាត់ភាពត្រឹមត្រូវតាមអេឡិចត្រូនិកផ្សេងទៀត ដែលអាចតាមដានពេលវេលាជាក់ស្តែង ដើម្បីបង្កើនតម្លាភាព ការគ្រប់គ្រងគុណភាព និងសុវត្ថិភាពចំណីអាហារ៕
