ភ្នំពេញ៖ លោកបណ្ឌិត កៅ ថាច ប្រធានសមាគមបណ្តាញកសិករតេជោ បានដឹកកិច្ចប្រជុំសមាជិកសមាគមបណ្តាញកសិករតេជោ ផ្នែកបន្លែ ផ្លែឈើ និងសត្វក្នុងកសិដ្ឋាន ថ្ងៃទី២៦ ខែធ្នូ ឆ្នាំ២០២៥។
កិច្ចប្រជុំនេះ មានគោលបំណងដើម្បីពិភាក្សា និងរៀបចំយុទ្ធសាស្ត្រក្នុងការចូលរួមចំណែកអភិវឌ្ឍន៍ចំពោះវិស័យបន្លែ ផ្លែឈើ និងសត្វក្នុងកសិដ្ឋាន ក្នុងប្រទេសកម្ពុជា។
នៅក្នុងកិច្ចប្រជុំនេះក៏មានការអញ្ជើញចូលរួមពីលោក ណុប នុន អនុប្រធានសមាគមបណ្តាញកសិករតេជោទទួលបន្ទុកផ្នែកបន្លែ ផ្លែឈើ និងជាប្រធានក្រុមការងារចំពោះកិច្ចក្នុងវិស័យបន្លែ ផ្លែឈើ និងសត្វក្នុងវិស័យកសិកម្ម ព្រមទាំងសមាជិកសមាជិកា សរុបប្រមាណ៣០នាក់។
ថ្លែងក្នុងកិច្ចប្រជុំនេះ លោកបណ្ឌិត កៅ ថាច ប្រធានសមាគមបណ្តាញកសិករតេជោ បានសម្តែងការពេញចិត្តចំពោះការបង្កើតក្រុមការងារចំពោះកិច្ចក្នុងវិស័យបន្លែ ផ្លែឈើ និងសត្វក្នុងកសិដ្ឋានរបស់សមាគមបណ្តាញកសិករតេជោ។
ក្រុមការងារចំពោះកិច្ចនេះ នឹងក្លាយជាកម្លាំងចលករដ៏សំខាន់របស់សមាគមបណ្តាញកសិករតេជោក្នុងការជួយគាំទ្រដល់បងប្អូនប្រជាកសិករ និងជំរុញវិស័យបន្លែ ផ្លែឈើ និងការចិញ្ចឹមសត្វឱ្យបានកាន់រីកចម្រើន។ ជាពិសេស ការបង្កើតកសិដ្ឋានគំរូ (ម៉ូដែល ១ហិកតា) របស់ក្រុមការងារ បានហុចផលវិជ្ជមានដល់វិស័យដាំដុះបន្លែ ផ្លែឈើ នាពេលកន្លងមក។
លោកបណ្ឌិតប្រធានសមាគម បានជំរុញឱ្យបង្កើតកសិដ្ឋានគំរូនេះនៅតាមបណ្តាខេត្តនានា និងធ្វើជាមជ្ឈមណ្ឌលគំរូសម្រាប់ទស្សនកិច្ចសិក្សាដល់ប្រជាកសិករដើម្បីជំរុញសម្ទុះការដាំដុះបន្លែ ផ្លែឈើ និងការចិញ្ចឹមសត្វក្នុងកសិដ្ឋាន ឱ្យកាន់តែខ្លាំងឡើងថែមទៀត។
លោកបណ្ឌិតប្រធានសមាគម បានផ្តល់អនុសាសន៍សំខាន់ៗ ដូចខាងក្រោម៖
ទី១-បន្តយកចិត្តទុកដាក់ក្នុងការជំរុញកសិករដាំដុះប្រកបដោយគុណភាព និងមានសុវត្ថិភាពក្នុងទទួលទាន។ ជាពិសេស ការប្រើប្រាស់ជីថ្នាំគីមីហួសប្រមាណ ដែលជាហេតុនាំឱ្យប៉ះពាល់ដល់សុខភាពប្រជាពលរដ្ឋ ជាជាដើម។
ទី២-សហការលើកកម្ពស់សមត្ថភាពផលិតតាមរយៈការកាត់បន្ថយថ្លៃដើមផលិត។
ទី៣-ការរៀបចំផែនការដាំដុះ សំដៅបង្កើនប្រសិទ្ធភាពក្នុងការផលិត និងទាញយកប្រយោជន៍ឱ្យបានជាអតិបរមានពីចរន្តនៃការដាំដុះ ដែលមានលក្ខណៈវិលជុំ ឬជាសេដ្ឋកិច្ចចក្រា។
ទី៤-ស្នើឱ្យក្រុមការងារចំពោះកិច្ចនេះ សម្រិតសម្រាំងយកអ្នកធ្វើពិតប្រាកដ (កសិករ) ដែលមានចំណេះជំនាញ ដើម្បីបង្កើត និងជួយគាំទ្រដល់បងប្អូនប្រជាកសិករនៅតាមតំបន់ផ្សេងៗឱ្យមានលក្ខណៈជាប្រព័ន្ធ និងនិរន្តភាព។
ជាចុងបញ្ចប់នៃកិច្ចប្រជុំ អង្គប្រជុំបានសម្តែងក្តីសង្ឃឹមយ៉ាងមុតមាំថា តាមរយៈបេសកកម្ម និងសកម្មភាពនានារបស់សមាគមបណ្តាញកសិករតេជោ នឹងជួយចូលរួមចំណែកយ៉ាងសកម្មដល់ការអភិវឌ្ឍកសិកម្ម និងលើកកម្ពស់ជីវភាពរបស់ប្រជាកសិករ៕
