ខេត្តបាក់និញ៖ ខេត្តបាក់និញស្ថិតនៅភាគខាងជើងវៀតណាមកំពុងបង្កើនកិច្ចខិតខំប្រឹងប្រែងដើម្បីពង្រីកតំបន់ដាំដុះដំណាំរបស់ខ្លួន ដោយផ្តល់អាទិភាពដល់ពូជផ្លែឈើ និងបន្លែសំខាន់ៗដែលផលិតតាមស្តង់ដារសុវត្ថិភាព និងមានគុណភាពខ្ពស់សម្រាប់ទាំងទីផ្សារក្នុងស្រុក និងការនាំចេញ។
យោងតាមនាយកមន្ទីរកសិកម្ម និងបរិស្ថាន នៃខេត្តបាក់និញ របស់វៀតណាម បានឱ្យដឹងថា ខេត្តកំពុងពង្រីកតំបន់ផលិតកម្មសម្រាប់ដំណាំផ្លែឈើហូបផ្លែ សំខាន់ៗដូចជា ផ្លែគូលេន ផ្លែមៀន ក្រូចឃ្វិច ក្រូចថ្លុង ផ្លែប៉ោម និងផ្លែត្របែក ដែលដាំដុះក្រោមស្តង់ដារសុវត្ថិភាព រួមទាំងការអនុវត្តកសិកម្មល្អរបស់វៀតណាម និងការអនុវត្តកសិកម្មល្អរបស់សកលលោក ព្រមទាំងមានវិញ្ញាបនបត្របញ្ជាក់ដំណាំសរីរាង្គផងដែឬ។
កិច្ចខិតខំប្រឹងប្រែងទាំងនេះ ដោយមានគោលបំណងបង្កើតខ្សែសង្វាក់តម្លៃ ដែលផ្សារភ្ជាប់ទៅនឹងការតាមដានផលិតផល និងការធានាលក្ខខណ្ឌផលិតកម្ម សម្រាប់បំពេញតាមតម្រូវការទីផ្សារក្នុងស្រុក និងនាំចេញទៅក្រៅប្រទេស។
មន្ត្រីកសិកម្មវៀតណាម បានបញ្ជាក់ថា នៅឆ្នាំ២០២៦ខាងមុខនេះ ខេត្តបាក់និញ ដែលមានចម្ងាយប្រមាណ៣០គីឡូម៉ែត្រភាគខាងជើងទីក្រុងហាណូយ មានគោលដៅពង្រីកផ្ទៃដីដាំដុះចម្ការផ្លែគូលេន រហូតដល់ទំហំ២៩,៨០០ហិកតា ដោយរំពឹងទទួលបានទិន្នផលចំនួន១៦០,០០០តោន។ ក្នុងចំណោមនេះ ផ្ទៃដីទំហំ១៧,៥០០ហិកតា នឹងត្រូវដាំដុះតាមស្តង់ដារកសិកម្មល្អរបស់វៀតណាម ដោយរំពឹងទទួលបានទិន្នផលចំនួន១២៥,០០០តោន។ ចំណែកតំបន់ផ្លែគូលេន ដែលមានវិញ្ញាបនបត្របញ្ជាក់កសិកម្មល្អរបស់សកលលោក នឹងមានផ្ទៃដីទំហំ២៣៥ហិកតា និងតំបន់ដាំគូលេនសរីរាង្គនៅទំហំ១០ហិកតា។
អាជ្ញាធរខេត្តបាក់និញក៏កំពុងលើកកម្ពស់ពូជផ្លែឈើ ដែលមានតម្លៃខ្ពស់ ដូចជាទំពាំងបាយជូរព៌ណខ្មៅ និងទំពាំងបាយជូរព៌ណប្រផេះ ព្រមទាំងកំពុងពន្លឿនការអនុវត្តបច្ចេកវិទ្យាឌីជីថល សម្រាប់ជួយដល់កសិករផ្នែកការផលិត ការតាមដាន ការគ្រប់គ្រងលេខកូដចម្ការ កន្លែងវេចខ្ចប់ ការព្យាករណ៍សត្វល្អិត និងជំងឺ ការព្យាករណ៍អាកាសធាតុ ការជូនដំណឹងអំពីគ្រោះមហន្តរាយធម្មជាតិ និងការវិភាគតម្រូវការទីផ្សារ។
មន្ត្រីកសិកម្មខេត្ត បានណែនាំកសិករដាំដុះគូលេនឱ្យគោរពតាមស្តង់ដារផលិតកម្ម ដែលមានសុវត្ថិភាព ដោយអនុវត្តកសិកម្មល្អរបស់វៀតណាម ការអនុវត្តកសិកម្មល្អរបស់សកល ព្រមទាំងណែនាំអំពីការដាំដុះ ការគ្រប់គ្រងសត្វល្អិត និងការគ្រប់គ្រងសំណល់ថ្នាំពុល ដើម្បីធានាបាននូវផលិតភាព និងគុណភាពខ្ពស់បំផុត។ លើសពីនេះ អាជ្ញាធរខេត្តបាក់និញ បន្តពង្រឹងការគ្រប់គ្រងលេខកូដចម្ការគូលេន ដែលមាន។
យោងតាមអនុប្រធានគណៈកម្មាធិការប្រជាជន ខេត្តបាក់និញ បានឱ្យដឹងថា នឹងបន្តពង្រឹងការរៀបចំផលិតកម្ម និងការអភិវឌ្ឍផលិតផលកសិកម្ម ដែលបំពេញតាមតម្រូវការនាំចេញ។ នាយកដ្ឋានវិទ្យាសាស្ត្រ និងបច្ចេកវិទ្យាខេត្ត កំពុងស្រាវជ្រាវអំពីការកែលម្អប្រព័ន្ធតាមដាន និងរក្សាទិន្នន័យ ដើម្បីធានាបាននូវភាពប្រហាក់ប្រហែលគ្នាជាមួយវេទិកាតាមដានរបាស់ជាតិ ដែលអនុញ្ញាតឱ្យកសិករ សហករណ៍ និងពាណិជ្ជករចូលមើលព័ត៌មានបានយ៉ាងងាយស្រួល។
នាយកដ្ឋានវិទ្យាសាស្ត្រ និងបច្ចេកវិទ្យាខេត្ត ក៏កំពុងតែសិក្សា និងណែនាំដល់អាជ្ញាធរខេត្ត អំពីការបង្កើតមជ្ឈមណ្ឌលបញ្ចេញកាំរស្មី ដែលបញ្ចប់ការសាងសង់នៅឆ្នាំ២០២៦ ដើម្បីបង្កើនសមត្ថភាពបញ្ចេញកាំរស្មីស្របទៅតាមស្តង់ដារអន្តរជាតិ កាត់បន្ថយពេលវេលាដឹកជញ្ជូន និងកែលម្អប្រព័ន្ធគ្រប់គ្រងការនាំចេញផលិតផលកសិកម្មសម្រាប់សហគ្រាសនៅក្នុងខេត្តបាក់និញ និងពង្រីកទៅតំបន់ភាគខាងជើងថែមទៀត។
ចំណែកក្រសួងកសិកម្ម និងបរិស្ថានវៀតណាម នឹងសម្របសម្រួលជាមួយនាយកដ្ឋានការពាររុក្ខជាតិ និងផលិតកម្មដំណាំ ដើម្បីរៀបចំការបណ្តុះបណ្តាលលើការអនុវត្តដាំដុះជាក់ស្តែង ការអនុវត្តវឌ្ឍនភាពវិទ្យាសាស្ត្រ និងបច្ចេកវិទ្យា និងការពង្រីកតំបន់ដាំដុះប្រកបដោយសុវត្ថិភាព។ វគ្គបណ្តុះបណ្តាលនេះក៏នឹងជួយសហគ្រាសក្នុងការចុះបញ្ជីផលិតផលតាមស្តង់ដារត្រូវការ ដើម្បីសម្រួលដល់នីតិវិធីនាំចេញប្រកបដោយភាពរលូន។
ទន្ទឹមនឹងនេះដែរ ក្រសួងឧស្សាហកម្ម និងពាណិជ្ជកម្ម នឹងធ្វើការជាមួយនាយកដ្ឋានវិទ្យាសាស្ត្រ និងបច្ចេកវិទ្យា ដើម្បីពិនិត្យឡើងវិញនូវការផលិត និងការប្រើប្រាស់ផលិតផលកសិកម្មសំខាន់ៗ និងណែនាំដល់មន្ត្រីខេត្តអំពីការអភិវឌ្ឍចង្កោមឧស្សាហកម្មសម្រាប់កែច្នៃផលិតផលកសិរុក្ខាប្រមាញ់។
បច្ចុប្បន្នខេត្តបាក់និញ មានផ្ទៃដីដាំដុះផ្លែឈើប្រហែល៥៣,៩០០ ហិកតា ដែលក្នុងនោះទហំ៣៣,៤០០ហិកតា ស្ថិតនៅក្នុងតំបន់ផលិតកម្មប្រមូលផ្តុំ ដែលស្មើនឹង៦២ភាគរយនៃចំនួនសរុប។ ខេត្តបានផ្តល់លេខកូដចម្ការចំនួន៤០០ និងលេខកូដកន្លែងវេចខ្ចប់ចំនួន៤៣ សម្រាប់នាំចេញ ដោយមានតម្លៃសរុបនៃដំណាំផ្លែហូប ជាង២៨០,៥លានដុល្លារ។
នាយកដ្ឋានវិទ្យាសាស្ត្រ និងបច្ចេកវិទ្យា បានដឹកនាំភ្នាក់ងារជំនាញឱ្យបង្កើតក្រុមអធិការកិច្ចដើម្បីត្រួតពិនិត្យលេខកូដតាមចម្ការ និងកន្លែងវេចខ្ចប់ ដែលបម្រើដល់ការនាំចេញ។ ចាប់តាំងពីខែមីនា ដល់ខែកក្កដា ឆ្នាំ២០២៥ ក្រសួងឧស្សាហកម្ម និងពាណិជ្ជកម្ម បានធ្វើការត្រួតពិនិត្យ និងបានណែនាំថា នាយកដ្ឋានការពាររុក្ខជាតិ និងផលិតកម្មដំណាំ ត្រូវចរចាការអនុម័តជាមួយប្រទេសនាំចូលសម្រាប់លេខកូដកន្លែងវេចខ្ចប់ថ្មីចំនួនពីរសម្រាប់ការនាំចេញផ្លែមៀនទៅកាន់ប្រទេសចិន និងប្រទេសអូស្ត្រាលី ដើម្បីធានាបាននូវដំណើរការទាន់រដូវប្រមូលផ្លែមៀន ឆ្នាំ២០២៥៕
