ភ្នំពេញ ៖ ម្ចាស់ចំការទុរេនក្នុងស្រុកកាលពីថ្ងៃទី២៤ខែកុម្ភៈនេះបានសាទរនូវវិធានការហាមឃាត់ការនាំចូលផ្លែទុរេនស្រស់ពីប្រទេសវៀតណាមនិងថៃ ក្រោយពីថ្មីៗនេះ អាជ្ញាធរគយនៃប្រទេសចិនបានរកឃើញមានផ្ទុកសារធាតុ Basic Yellow 2 ឬ Auramine O និង Cadmium។
លោកស្រី ម៉ាន់ ថង ម្ចាស់ចំការនៅស្រុកទឹកឈូខេត្តកំពត បានមានប្រសាសន៍ថា កសិកម្មដំណាំទុរេននៅក្នុងប្រទេសកម្ពុជាសព្វថ្ងៃនេះ អាចផ្គត់ផ្គង់ដល់ប្រជាជនបរិភោគបានហើយ អាចនាំចេញទៅក្រៅប្រទេសបានថែមទៀត ហើយបើសិនជាការប្រកាសរបស់រាជរដ្ឋាភិបាលទប់ស្កាត់មិនឲ្យនាំចូលធុរេនជាប់រហូតនោះ ក្នុងនាមជាម្ចាស់ចំការមានការសប្បាយចិត្តនិងគាំទ្រ ព្រោះអ្នកបរិភោគយើងមានការគាំទ្រទុរេននៅក្នុងស្រុកភាគច្រើន។
អ្នកស្រីជាម្ចាស់ចំការបានលើកឡើងថា ទីផ្សារនាំចូលទុរេនពីប្រទេសជិតខាងតាមរយៈឈ្មួញនោះមានតម្លៃទាប គឺ ពីចន្លោះ ៥ពាន់រៀលក្នុង ១គីឡូក្រាម ដែលមានតម្លៃថោកជាងទុរេនក្នុងស្រុកយើង ហើយទុរេនប្រទេសជិតខាងគេប្រមូលផល ២ទៅ៣ដង ក្នុង១ឆ្នាំ ចំពោះទុរេនវិលជុំ ។
ម្ចាស់ចំការខាងលើបន្ថែមថា សម្រាប់កសិករយើងមិនអាចធ្វើបានដូចគេទេ ដោយសារតែមិនមានបច្ចេកទេស គឺប្រមូលផលបានត្រឹមតែ១ដងក្នុង១ឆ្នាំ ហើយតម្លៃទុរេនកម្ពុជា បើសិនជាមិនមានការប្រកួតប្រជែងជាមួយនិងទុរេននាំចូលទេនោះគឺ កសិករយើងអាចលក់បានផលចំនេញ។
សូមជម្រាប់ថា យើងតាមម្ចាស់ចំការ ទុរេនកំពតក្នុងស្រុកពេញរដូវ បើតម្លៃបោះដុំគឺ ១៥០០០រៀល ទៅ១៨០០០រៀល ក្នុង១គីឡូក្រាម និងតម្លៃលក់ចេញវិញចម្លោះពី២០០០០រៀលទៅ ២៥០០០រៀល ក្នុង១គីឡូក្រាម ពោលតម្លៃធុរេនកំពតមិនទាប់នោះទេ។
ដោយឡែករដូវកាលទុរេនកសិករមានខុសរដូវខ្លះនិងតាមរដូវកាលគឺនៅចុងខែមេសានិងដើមខែឧសភាឬនៅចុងខែមិថុនា ដែលអាស្រ័យលើអាកាសធាតុមិនអាចកំណត់បានទេ។ ចំពោះទុរេនខុសរដូវវិញគឺប្រមូលផលនៅចុងខែមីនា និងដើមខែមេសា ។
សម្រាប់លោកឧកញ៉ា ចាន់ ស៊ីថា ជាអ្នកវិនិយោគមួយរូបនៅខេត្តកំពត ដែលមានចំការទុរេនដែរនោះបានសម្តែងការគាំទ្រ ចំពោះវិធានការរបស់ប្រមុខរាជរដ្ឋាភិបាលកម្ពុជា ការហាមនាំចូលទុរេនពីប្រទេសថៃនិងប្រទេសវៀតណាម ហើយការធ្វើដូច្នោះគឺ ដើម្បីលើកទឹកចិត្តដល់កសិករយើងអ្នកដាំដុះ ដើម្បីការពារសុវត្ថិភាពដល់អ្នកបរិភោគ ហើយបានរួមចំណែកជាមួយរាជរដ្ឋាភិបាលក្នុងការជំរុញកំណើនសេដ្ឋកិច្ចជាតិយើង។
អ្នកវិនិយោគខាងលើមានប្រសាសន៍ថា វិធានការនេះគឺ ដើម្បីការពារសុខភាពអ្នកប្រើប្រាស់និងអ្នកបរិភោគ ក្នុងស្រុក ហើយយើងទាំងអស់គ្នាត្រូវមានការប្រុងប្រយ័ត្នទាំងអ្នកដាំដុះ ដោយឈរលើគុណភាពជូនដល់អតិថិជន ជាពិសេសអ្នកបរិភោគ គឺ លើកស្ទួយមួយជ្រុងដល់កសិករយើងអ្នកដាំដុះផង នឹងលើកស្ទួយសេដ្ឋកិច្ចជាតិយើងបន្ថែមទៀត។
យោងតាមលិខិត របស់ទីស្តីការគណៈរដ្ឋមន្រ្តី ផ្ញើទៅរដ្ឋមន្រ្តីក្រសួង ពាណិជ្ជកម្ម កាលពីថ្ងៃ១៨ កុម្ភៈបានបញ្ជាក់ថា រាជរដ្ឋាភិបាលកម្ពុជា បានហាមឃាត់ការ នាំចូលផ្លែទុរេនស្រស់ ពីប្រទេសវៀតណាម និងថៃ ក្រោយ ពីអាជ្ញាធរគយ នៃប្រទេសចិន បានរកឃើញ មានផ្ទុកសារធាតុ Basic Yellow 2 ឬ Auramine O និង Cadmium ។
លិខិតបានលើកឡើងថា ការអនុវត្តវិធានការ នៃការហាមឃាត់នាំចូលនេះ ត្រូវធ្វើឡើងនៅក្នុងរយៈពេលខ្លីខាងមុខ ព្រោះសារធាតុBasic Yellow 2 ឬ Auramine O និង Cadmiumបានធ្វើឲ្យប៉ះពាល់ សុខភាពរបស់អ្នកហូប ។
លិខិតបានគូសបញ្ជាក់ទៀតថា “សេចក្តីដូចមានចែងក្នុងកម្មវត្ថុនិងយោងខាងលើ ទីស្តីការគណៈរដ្ឋមន្ត្រី សូមជម្រាបជូនលោកជំទាវ ជ្រាបថា រាជរដ្ឋាភិបាលបានឃើញ និងសម្រេចឱ្យក្រសួងពាណិជ្ជកម្ម ត្រូវយកចិត្តទុកដាក់ទាំងការនាំចូលទុរេន និងការដាំដុះក្នុងប្រទេស និងត្រូវពន្លឿន កិច្ចការរៀបចំកសាង សមត្ថភាពមន្ទីរពិសោធន៍ លើការវិភាគរកសារធាតុ Basic Yellow 2 ឬ Auramine O និង Cadmium ដោយចាត់ទុកជាការប្រញាប់ ក្នុងរយៈពេលដ៏ខ្លីខាងមុខ” ។
ការស្នើឲ្យប្រញាប់នេះ ដើម្បីជួយគាំទ្រដល់អគ្គនាយកដ្ឋាន គយនិងរដ្ឋាករកម្ពុជា ក្នុងការវិភាគនៅតាមមាត់ច្រក នៅពេលដែលមានការនាំចូល ផ្លែទុរេនស្រស់ ដែលមិនមានវិញ្ញាបនបត្របញ្ជាក់ និងធានាមិនឱ្យមានការ ប្រើប្រាស់សារធាតុទាំងពីរនេះលើ ផលិតផលក្នុងស្រុក ដើម្បីការពារអ្នកប្រើប្រាស់ ៕
