(ភ្នំពេញ)៖ឯកឧត្តម ងិន ឆាយ ប្រតិភូរាជរដ្ឋាភិបាល ទទួល បន្ទុកជា អគ្គនាយក នៃ អគ្គនាយកដ្ឋាន កសិកម្ម បានថ្លែងថា ក្នុងរយៈពេល៩ខែដើមឆ្នាំ២០២៤នេះ ផលិតផលដំណាំកសិកម្មកម្ពុជាបាននិងកំពុង ដំណើរការល្អ ពោលទាំងការដាំដុះ ដំណាំស្រូវ ដំណាំសាកវប្បកម្ម និងដំណាំឧស្សាហកម្មគឺកម្ពុជាទទួលបានលើសផែនការ។
ការលើកឡើងរបស់ឯកឧត្តម ងិន ឆាយ គឺ ក្រោយបញ្ចប់ពិធីប្រកាសដាក់ឱ្យប្រើប្រាស់នូវឯកសារស្តីពី តំបន់ ដាំដុះដំណាំស្វាយចន្ទីនៅកម្ពុជាកាលពីថ្ងៃទី២៥ខែតុលាឆ្នាំ២០២៤នេះ។ ឯកឧត្តមបានមានប្រសាសន៍ថា ដោយសារ កត្តាអាកាសធាតុអំណោយផលមានភ្លៀងធ្លាក់គ្រប់គ្រាន់ ឃើញថាដំណាំស្រូវឆ្នាំនេះទទួលបានលទ្ធផលល្អ និងក្រៅពីនេះដំណាំជាផលិតផលកសិករដទៃទៀតក៏ទទួលបានទិន្នផលល្អដូចគ្នា”។
ឯកឧត្តម បញ្ជាក់បន្ថែមថា ដំឡូងមីកម្ពុជាដែលនាំចេញមាន២ប្រភេទគឺ ដំឡូងមីស្រស់ និងដំឡូងមីក្រៀម។ដំឡូងមីស្រស់ដែលនាំចេញធំជាងគេគឺទៅកាន់ទីផ្សារ ប្រទេសវៀតណាម និង ប្រទេសថៃ។ ក្រៅពីនេះកម្ពុជាក៏មានកសិផលជាច្រើនទៀត ដូចជាស្វាយកែវរមៀត មានប៉ៃលិន ចេកអំបូងពណ៌លឿងក៏កម្ពុជានាំចេញច្រើនផងដែរ។
ផលិតកម្មដំណាំស្រូវក្នុងឆ្នាំ២០២៣ កន្លងមកកម្ពុជាផលិតបានប្រមាណ១២,៥លានតោនដោយក្នុងនោះការនាំចេញអង្ករបានជាង៦៥ ម៉ឺនតោន គិតជា ទឹកប្រាក់ ជាង៤៦៦លានដុល្លារ និងស្រូវប្រមាណជាង ៤លាន តោន គិតជាទឹកប្រាក់ជាង១,៣ពាន់លានដុល្លារ ។
ប្រទេសចិននិងសហភាពអឺរ៉ុបគឺជាទីផ្សារធំបំផុតរបស់ប្រទេសកម្ពុជា។ឯកឧត្តមបន្តថាសម្រាប់ដំណាំស្វាយចន្ទីវិញ ក៏ផលិតលើសផែនការផងដែរដោយផលិតបានប្រមាណជាង ៨០ ម៉ឺនតោន ហើយបាននាំចេញស្ទើរទាំងអស់។សម្រាប់គ្រាប់ស្វាយចន្ទីភាគច្រើនកម្ពុជានាំចេញគ្រាប់ឆៅ ឯការនាំចេញគ្រាប់ចន្ទីកែច្នៃបានប្រមាណជា១០ភាគរយប៉ុណ្ណោះ។
ដោយឡែកសម្រាប់ដំឡូងមីវិញកម្ពុជាផលិតបានប្រមាណ១៤លានតោន ហើយដំឡូងមីរបស់កម្ពុជាក៏បាននាំចេញស្ទើរតែទាំងអស់ដូចគ្នា។សំរាប់ប្រភេទដំណាំកសិកម្មនាំចូល ដូចជាបន្លែស្រស់មួយចំនួន ពិសេសប្រភេទបន្លែដែលពិបាកដាំនៅកម្ពុជាដូចជាដំឡូងបារាំង ការ៉ុត ប្រភេទដំណាំនេះការដាំត្រូវការអាកាសធាតុត្រជាក់ឬក៏តំបន់ខ្ពស់ ហេតុនេះលក្ខណៈភូមិសាស្រ្តបែបនេះកម្ពុជាពុំសូវអំណោយផលទេ។
សម្រាប់ពពួកបន្លែស្លឹកដូចជាបន្លែស្ពៃ សាលាដ និងស្ពៃផ្សេងៗយើងអាចផលិតបានគ្រប់គ្រាន់។ចំពោះការនាំចូលបន្លែទាំងនេះសម្រាប់ ផ្គត់ផ្គង់ ទីផ្សារក្នុងស្រុកតិច ឬ ច្រើនពោលគឺ ទៅតាមរដូវកាលរដូវក្តៅខ្លាំង និងរដូវភ្លៀងខ្លាំង។ ដោយឡែកសម្រាប់បន្លែប្រភេទស្ពៃក្តោបយើងដាំពុំសូវបានទេដោយសារតែអាកាសធាតុក្តៅពេក ហេតុនេះយើងត្រូវការនាំចូល។ដូច្នេះកម្ពុជាគឺអាចផ្គត់ផ្គង់បន្លែបានប្រមាណ៧៥ទៅ៨០ភាគរយពោលគឺអាស្រ័យទៅតាមរដូវ។
នៅកម្ពុជារដូវខ្លះទៀតដូចជា រដូវ រំហើយ ការដាំដុះបានផលល្អ ធ្វើឱ្យការផលិតលើសនាំឱ្យធ្លាក់ថ្លៃ និងពេលខ្លះគ្មានអ្នកទិញទៅវិញ”។ផលិតផលកសិកម្មដែលនាំចេញទៅកាន់ទីផ្សារប្រទេសចិនបច្ចុប្បន្នមានសរុបប្រមាណជាង ៣០មុខ ដោយក្នុងនេះមានទាំងផលិតផលស្រស់ និងផលិតផលកែច្នៃ ។
ផលិតផលធំៗដែលកម្ពុជាបានចុះបញ្ជីក្នុងការនាំចេញទៅកាន់ប្រទេសចិនរួចហើយនោះរួមមាន៖ អង្ករ ដំឡូងមី ពោត ស្វាយកែវរមៀត ចេកអំបូងលឿង មានបៃលិន ដូងក្រអូបនិងស្វាយចន្ទី៕
