ប្រេងកន្ទក់ បានចម្រាញ់ចេញពីអង្កាម ឬស្រទាប់អង្ករសំរូប។ ប្រេងនេះ មានអត្ថប្រយោជន៍ច្រើនដល់សុខភាព។ វាមានធាតុផ្សំ Y-oryzanol ដែលជាសារធាតុប្រឆាំងអុកស៊ីតកម្មដ៏មានឥទ្ធិពល និងវីតាមីនE ដែលមានសមាសធាតុគីមីសរីរាង្គផ្សេងទៀតដូចជា tocopherols និង tocotrienols។ នេះបើតាមការបញ្ជាក់របស់ម្ចាស់អាជីវកម្មប្រេងកន្ទក់សុខៈ។
ចំពោះសមត្ថភាពរបស់ប្រេងនេះ អាចជួយក្នុងការលើកកម្ពស់ការលូតលាស់សក់ និងជាតិទឹកនៃស្បែក ដែលត្រូវបានបន្ថែមទៅក្នុងផលិតផលថែរក្សាស្បែក និងសក់ធម្មជាតិ។ ថ្វីត្បិតតែត្រូវបានប្រើប្រាស់ទូទាំងពិភពលោកក៏ដោយ ក៏វាជារឿងធម្មតាជាពិសេសនៅក្នុងមុខម្ហូបរបស់ប្រទេសមួយចំនួនដូចជា ចិន ជប៉ុន និងឥណ្ឌាជាដើម។
បើតាម ឧកញ៉ា ច័ន្ទដារ៉ា ប្រេងកន្ទក់នេះ អាចធ្វើឱ្យប្រសើរឡើងនូវសុខភាពបេះដូង ព្រោះវាជួយកាត់បន្ថយសារធាតុកូលេស្តេរ៉ុលពីសារពាង្គកាយ ដែលជាសត្រូវដ៏អាក្រក់បំផុតរបស់បេះដូង។ ជួយបញ្ចុះជាតិស្ករក្នុងឈាម បានរហូតដល់ ៣០ភាគរយ។ សមាសធាតុជាច្រើននៅក្នុងប្រេង ដែលមានឥទ្ធិពលប្រឆាំងអុកស៊ីតកម្ម និងប្រឆាំងនឹងការរលាកផងដែរ។ ជាពិសេសវាកំណត់គោលដៅរលាកនៅក្នុងសរសៃឈាម និងស្រទាប់បេះដូង។ ប្រសិនបើមិនបានព្យាបាលទេ ការរលាកនេះអាចបង្កឱ្យកើតជំងឺក្រិនសរសៃឈាម។ លើសពីនេះ សារធាតុ Tocotrienols របស់ប្រេងកន្ទក់ បានជួយទប់ស្កាត់ការលូតលាស់នៃកោសិកាមហារីកផ្សេងៗ ដូចជា សុដន់ សួត អូវែ ថ្លើម ខួរក្បាល និងលំពែងជាដើម។
ប្រេងកន្ទក់ ក៏ជាជំនួយដែលធ្វើឱ្យស្បែកសម៉ត់រលោង និងកាត់បន្ថយស្នាមអុចខ្មៅ។ កាត់បន្ថយល្បឿននៃការបង្កើតស្នាមជ្រួញ និងពន្យាភាពចាស់នៃស្បែក និងជួយព្យាបាលការហើមនៅជុំវិញភ្នែកផងដែរ។ នេះបើតាមការលើកឡើងរបស់ឧកញ៉ា ច័ន្ទដារ៉ា ហើយបន្ថែមថា វាមានផ្ទុកសារធាតុ inositol ដែលជាសមាសធាតុកាបូអ៊ីដ្រាត ជួយការពារអង្គែស្បែកក្បាល និងកាត់បន្ថយការបែកចុងសក់ ព្រមទាំងមានអាស៊ីតខ្លាញ់អូមេហ្គា 3 និងអូមេហ្គា 6 ដែលជួយការពារសក់ស្កូវមុនអាយុ និងពង្រឹងសរសៃសក់ផងដែរ។
ស្រ្តីមេផ្ទះ បានប្រើប្រេងកន្ទក់ចំអិនម្ហូបអាហារ ដែលមានប្រសិទ្ធភាពពិសេសក្នុងការចម្អិនអាហារនៅសីតុណ្ហភាពខ្ពស់ ដែលមានចំណុចផ្សែងខ្ពស់។
ប្រេងកន្ទក់នេះ ក៏អាចយកទៅប្រើប្រាស់ដើម្បីធ្វើសាប៊ូផងដែរ ដោយសារវាមានសារធាតុ shea butter និង sodium hydroxide និងត្រូវបានផលិតដោយការរួមបញ្ចូលគ្នានៃប្រេងផ្សេងទៀត។
យ៉ាងណាមិញក្រៅពីផ្ដល់អត្ថប្រយោជន៍ច្រើន ប្រេងនេះក៏មានផលប៉ះពាល់ផងដែរ គឺលទ្ធផលនៃការប្រើប្រាស់ប្រេងក្នុងបរិមាណច្រើនអំឡុងពេលមានផ្ទៃពោះ និងបំបៅដោះកូនមិនទាន់ដឹងនៅឡើយ។ ដូច្នេះវាមានប្រយោជន៍ក្នុងការទទួលទានក្នុងកម្រិតមធ្យម។ ប្រសិនបើអ្នកមានដំបៅ ការរំលាយអាហារ ឬបញ្ហារំលាយអាហារផ្សេងទៀត មិនត្រូវប្រើប្រាស់ប្រេងនោះទេ។ សរសៃកន្ទក់អាចស្ទះបំពង់រំលាយអាហារ និងបង្កឱ្យមានផលពិបាក៕
ដោយ៖ Sam Oun
