បើពុំមានការប្រែប្រួលនោះទេ ក្រុមហ៊ុន Floresta របស់ប្រទេសអ៊ីស្រាអែលនឹងចាប់ផ្តើមសាកលល្បងប្រមូលទិញគ្រាប់ស្វាយចន្ទីស្ងួតរបស់កម្ពុជាចំនួន១០០តោន នៅចុងខែមីនា ឬនៅដើមខែមេសាខាងមុន ដើម្បីនាំចេញទៅប្រទេសជប៉ុន ហើយបើគម្រោងទីមួយនេះ ទទួលបានជោគជ័យ ក្រុមហ៊ុននឹងបង្កើនការប្រមូលទិញកើនដល់១ម៉ឺនតោននៅក្នុងឆ្នំា នៅពេលបន្ទាប់។
ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ មានប្រសាសន៍ ប្រាប់ARDB TV Online ថាគម្រោងប្រមូលទិញស្វាយចន្ទី១០០តោននៅពេលខាងមុខនេះមានឈ្មោះថា CashewNotes សហការជាមួយនឹងក្រសួងកសិកម្ម រុក្ខាប្រមាញ់ និងនេសាទដើម្បីស្វែងរកសហគមន៍កសិកម្មណាមួយផ្គត់ផ្គង់គ្រាប់ស្វាយចន្ទីស្ងួតចំនួន១០០តោនដើម្បីនាំចេញសាកល្បងទៅកាន់ទីផ្សារប្រទេសជប៉ុន ។
ឯកឧត្តម ឃឹម ហ្វីណង់ គូសបញ្ជាក់ថា បើគម្រោងសាកល្បងប្រមូលទិញគ្រាប់ស្វាយចន្ទីស្ងួតចំនួន១០០តោនរបស់ក្រុមហ៊ុនប្រទេសអ៊ីស្រាអែល នាំចេញទទួលបានជោគជ័យ និងមានការទទួលស្គាល់មានលក្ខណៈទូលំទូលាយ ក្រុមហ៊ុនមានគម្រោងពង្រីកការប្រមូលទិញគ្រាប់ស្វាយចន្ទីស្ងួតរហូតដល់១ម៉ឺនក្នុងមួយឆ្នំាំនៅពេលបន្ទាប់។
បើយោងតាមមន្ត្រីនាំពាក្យក្រសួងកសិកម្ម ក្រុមហ៊ុនប្រទេសអ៊ីស្រាអែលដែលត្រៀមប្រមូលទិញគ្រាប់ស្វាយចន្ទីស្ងួត១០០តោន ហ៊ានទិញគ្រាប់ស្វាយចន្ទីរបស់កសិករក្នុងតម្លៃ៦ពាន់រៀលក្នុងមួយគីឡូក្រាម ពោលគឺមានតម្លៃលើសតម្លៃគ្រាប់ស្វាយចន្ទីនៅលើទីផ្សារបច្ចុប្បន្នប្រមាណ២០% តែទាមទាគ្រាប់ស្វាយចន្ទីមានស្តង់ដារ និងមានគុណភាពល្អដូចដែលបានកំណត់នៅក្នុងកិច្ចសន្យារវាងសហគម និងក្រុមហ៊ុន។
ឯកឧត្តម ឃឹម ហ្វីណង់ មានប្រសាសន៍ថា «បច្ចុប្បន្នគម្រោង CashewNotes បានសាកល្បងធ្វើការជាមួយសហគមន៍កសិកម្មសាលាវិស័យស្ថិតនៅក្នុងខេត្តកំពង់ ហើយនេះគឺជាឧទាហរណ៍មួយដ៏ល្អក្នុងការបង្ហាញទៅកសិករក៏ដូចជាវិស័យស្វាយចន្ទីឱ្យឃើញ នៅពេលយើងដំាស្វាយចន្ទីមានគុណភាព មានតម្លៃដើមប្រកួតប្រជែង។ ប៉ុន្តែនៅពេលយើងធ្វើមិនបានតាមស្តង់ដារ ថ្លៃដើមខ្ពស់ តែគុណភាពទាប វាពិបាកក្នុងការធ្វើការជាមួយក្រុមហ៊ុស្តង់ដារ ហើយកសិករខ្នាតតូចពិបាកបំពេញលក្ខខណ្ឌកិច្ចសន្យាកសិកម្មឱ្យដូចសហគមន៍កសិកម្មខ្នាតធំ»។
ឯកឧត្តមបន្តថា ការប្រមូលទិញគ្រាប់ស្វាយចន្ទីស្ងួត របស់ក្រុមហ៊ុន អ៊ីស្រាអែលមួយនេះនឹងចាប់ផ្តើមនៅចុងខែមីនា ឬនៅដើមខែមេសាខាងមុខ ដោយសារ ក្រុមហ៊ុនបានយកគំរូគ្រាប់ស្វាយចន្ទីស្ងួតរបស់សហគមកសិកម្មសាលាវិស័យទៅធ្វើតេស្តរួចហើយ បើសិនជាប់នឹងអាចវេចខ្ចប់អាចធ្វើការនាំចេញបានទៅដោយរលូន។
លោក អួន ស៊ីឡុត ប្រធានសមាគមស្វាយចន្ទីកម្ពុជា យល់ឃើញថា គម្រោងសាកល្បងប្រមូលទិញគ្រាប់ស្វាយស្ងួតចំនួន១០០តោន របស់ក្រុមហ៊ុនប្រទេសអ៊ីស្រាអែលនេះជាជំហ៊ានមួយដ៏ល្អ ហើយក្នុងនាមសមាគមសស្វាគមន៍ក្នុងការវិនិយោគរបស់ក្រុមហ៊ុនអ៊ីស្រាអែល។
លោកបន្តថា «កន្លងមកខ្ញុំធ្លាប់លើកឡើងហើយថា ក្រុមហ៊ុនអ៊ីស្រាអែល និងក្រុមហ៊ុនជប៉ុនគឺជាក្រុមហ៊ុនមានស្តង់ដារ បើចូលទៅវិនិយោគនៅប្រទេសណាមួយហើយ បង្ហាញឱ្យឃើញថាប្រព័ន្ធច្បាប់ និងបរិយាកាសវិនិយោគនៅក្នុងប្រទំាងនោះគឺមានភាពល្អប្រសើរ»៕
ដោយ៖ Long Sareth
