ក្រុមកសិករចំនួន១៥រស់នៅភូមិត្នោតជុំ ឃុំអូសារាយ ស្រុកត្រាំកក់ ខេត្តតាកែវ ចាប់យកមកមុខរបរកែច្នៃស្លឹកត្នោត ស្លឹកពោត និងស្លឹកទ្រាំងធ្វើជាផ្កាលម្អ ជូនដល់ម្ចាស់អាជីវកម្មមានយីហោ “ផ្ទះផ្កាខ្មែរ” អាចរកប្រាក់ចំណូលសម្រាប់ផ្គត់ផ្គង់គ្រួសារប្រចំាថ្ងៃមានភាពប្រសើរ ហើយធ្វើឱ្យអារម្មណ៍ផ្នែកផ្លូវចិត្តមានលក្ខណៈកាន់តែល្អប្រសើរជាងពីមុនៗ។ ពោលនៅតាមក្រុមគ្រួសារមិនសូវព្រួយបារម្ភអំពីការចំណាយប្រចំាថ្ងៃ ឬខ្វះប្រាក់ថវិកាសម្រាប់ទិញសម្ភារៈបម្រើដល់សេចក្តីត្រូវការដូចពីមុនទៀតឡើយ។
បើយោងតាម លោក ហង្ស ហិរញ្ញនិយុទ្ធ ម្ចាស់អាជិវកម្មយីហោ “ផ្ទះផ្ការខ្មែរ”បានឱ្យដឹងថា បន្ទាប់ពីមុខរបរកែច្នៃស្លឹករុក្ខជាតិទំាង៣ប្រភេទនេះបង្កើតឡើងនៅឆ្នំា២០២០រហូតមកដល់សព្វថ្ងៃនេះ ក្រៅពីមើលឃើញមុខរបរលក់គំនិតច្នៃប្រឌិតតូចមួយនេះមានការរីកចម្រើន, ផ្ទះផ្កាខ្មែរជាចំណែកតូចមួយជួយដល់ក្រុមកសិករទាំង១៥គ្រួសារនៅភូមិឃុំខាងលើទោះបីមិនអាចឱ្យក្រុមកសិករដែលជាសមាជិកអាចក្លាយជាអ្នកមានបាន ប៉ុន្តែការងារនេះវាបានជួយសម្រួលជីវភាពប្រចំាថ្ងៃរបស់ពួកគាត់បានប្រើសើមួយកម្រិត។ ជាក់ស្តែងបើប្រៀបធៀបជីវភាពពួកគាត់មុនមិនទាន់ចូលជាសមាជិកអ្នកផលិតផ្កាឱ្យផ្ទះផ្កាខ្មែរ និងនៅក្រោយបានសហការ ឃើញថាស្ថានភាពគ្រួសារគឺមានភាពប្រសើរខុសប្លែងជាងពេលមុនៗ។
លោក ហង្ស ហិរញ្ញនិយុទ្ធ បានបញ្ជាក់ថា “ការបង្កើតមុខរបរធ្វើផ្កានេះបានកើតឡើងដោយរឿងចៃដន្យ ដោយយើងមានឱកាសបានស្គាល់ជាមួយមិត្តភក្ត្រ័ដែលធ្លាប់ធ្វើការនេះពីមុនមក។ដូចនេះតាមរយៈការណែនាំរបស់មិត្តភក្ត្រ័ ទើបពួកយើងសម្រេចចិត្ត ផលិតផ្កាពីសំបកពោត នៅឆ្នំា២០២០”។
បើតាមម្ចាស់អាជីវកម្មខាងលើ, ផ្ទះផ្កាខ្មែរចាប់ផ្តើមដំបូងៗជួបការខ្វះខាតនូវវត្ថុធាតុដើមសម្រាប់យកមកកែច្នៃធ្វើជាផ្កាដើម្បីផ្គត់ផ្គង់ទៅលើទីផ្សារ ប៉ុន្តែនៅមួយឆ្នំាចុងក្រោយបញ្ហាខ្វះវត្ថុធាតុដើមកែច្នៃដូចជា ស្លឹតពោត ស្លឹកត្នោត និងស្លឹកទ្រាំងលែងជាបញ្ហាចោទចំពោះអាជិវកម្មលក់គំនិតច្នៃប្រឌិតមួយនេះទៀតហើយ។
លោកបញ្ជាក់ថា “ផលិតផលផ្កាកែច្នៃចេញពីស្លឹកខាងលើ នៅរដូវវស្សាមិនសូវមានតម្រូវការទីផ្សារប៉ុន្មានទេ ប៉ុន្តែនៅរដូវប្រាំង ចាប់ពីខែ១២រហូតដល់ខែ២ តម្រូវការចាប់ផ្តើមមានច្រើន”។
បើយោងតាម អ្នកស្រី ជុំ អុន, អ្នកស្រី ភួង សាមឿន និងលោក ភិន វិសាល ដែលជាអ្នកចាប់យករបរកែច្នៃស្លឹកពោត ស្លឹកត្នោតនិងស្លឹកទ្រាំងធ្វើជាផ្ការតាំងលម្អ បានអះអាងស្រដៀងគ្នាថា ក្រោយពីក្លាយជាសមាជិកកែច្នៃផ្កាជូន ផ្ទះផ្កាខ្មែររហូតមកដល់សព្វថ្ងៃនេះក្រុមគ្រួសាររបស់ពួកគាត់មានជីវភាពល្អប្រសើរជាងពេលមុនៗ តាមរយៈប្រាក់ចំណូលដែលទទួលបានប្រចំាខែពីការងារកែច្នៃផ្កានេះ។