ប៉េកាំង៖ វាលស្រូវសាលីទំហំជាង១៧៣ហិកតា ត្រូវបានចាប់ផ្តើមប្រមូលផលជាលើកដំបូងនៅចុងតំបន់វាលខ្សាច់ដ៏ធំបំផុតរបស់ប្រទេសចិន ដែលត្រូវបានដាំតាមបច្ចេកទេសកសិកម្មច្នៃប្រឌិតថ្មី ធ្វើដំណាំស្រូវសាលីធន់នឹងគ្រោះរាំងស្ងួតហួតហែង។
ស្រូវសាលីទាំងនេះ ត្រូវបានដាំតាមបច្ចេកទេសដ៏អស្ចារ្យ នៅលើមហាវាលខ្សាច់ឈ្មោះ តាក់ឡាម៉ាកាន់ (Taklamakan) ដ៏ធំល្វឹងល្វើយរបស់ប្រទេសចិន ដែលត្រូវបានគេស្គាល់ជាទូទៅថា ជា «សមុទ្រមរណៈ»។
យោងតាមទីភ្នាក់ងារព័ត៌មាន ស៊ីនហួ របស់ចិនចេញផ្សាយកាលពីថ្ងៃទី១៩ ខែកក្កដា ឆ្នាំ២០២៥ បានឱ្យដឹងថា រដូវប្រមូលផលស្រូវសាលីដាំលើសមុទ្រខ្សាច់នេះ កសិករ ចិនបានចាប់ផ្តើមប្រើគ្រឿងចក្រច្រូតកាត់លើផ្ទៃទំហំជាង១៧៣ហិកតា ប៉ុន្តែមិនទាន់មានរបាយការណ៍បញ្ជាក់ពីទិន្នផលនៅឡើយទេ ដោយសារស្ថិតក្នុងដំណាក់កាលទើបចាប់ផ្តើម។
ប៉ុន្តែយោងតាមការប៉ាន់ស្មានរបស់អ្នកជំនាញកសិកម្មចិន បានឱ្យដឹងថា ស្រូវសាលីដាំលើវាលខ្សាច់នៅក្នុងឆ្នាំ២០២៥នេះ អាចផ្តល់ទិន្នផលខ្ពស់ជាងឆ្នាំមុន ដែលជាឆ្នាំចាប់ផ្តើមដាំសាកល្បងដំណាំកសិអាហារមួយនេះ។
កាលពីចុងខែមិថុនា ឆ្នាំ២០២៤ វាលស្រូវសាលីដ៏ធំល្វឹងល្វើយ ត្រូវបានកសិករចិនសាកល្បងដាំដោយជោគជ័យ នៅចុងឆ្នេរខ្សាច់នៅភាគនិរតីនៃសមុទ្រខ្សាច់ ស្ថិតនៅក្នុងតំបន់ស្វយ័ត ស៊ីនជាំង អ៊ុយហ្គួរ (Xinjiang Uygur) ដោយដាំនៅឆ្នាំ២០២៤នោះ មានទំហំផ្ទៃដីជាង៤០០ហិកតា ដែលធ្វើឱ្យវាលខ្សាច់ក្លាយជាវាលស្រែដ៏ធំបំផុតរបស់ប្រទេសចិន និងត្រូវបានកត់សម្គាល់ជាកសិកម្មច្នៃប្រឌិតថ្មីនេះ គឺជាវិធីសាស្ត្រប្រយុទ្ធប្រឆាំងនឹងការរីករាលដាលរបស់វាលខ្សាច់ តាមរយៈកសិកម្មប្រកបដោយនិរន្តរភាព។
លោក វ៉ាង ជៀនជុន (Wang Jianjun) អគ្គនាយករងនៃក្រុមហ៊ុនធ្វើអាជីវកម្មផ្នែកកសិកម្មនៅតំបន់ ស៊ីនជាំង ធ្លាប់បាននិយាយថា ដំណាំស្រូវសាលីដាំនៅលើវាលខ្សាច់ កាលពីឆ្នាំ២០២៤ បានទិន្នផលជាមធ្យមទម្ងន់៤,៤តោនក្នុងមួយហិកតា គឺជាបរិមាណខ្ពស់ជាងការរំពឹងទុក។
តំបន់ដាំស្រូវសាលីត្រូវបានហ៊ុំព័ទ្ធដោយខ្សាច់បីផ្នែក ហើយវាលខ្សាច់មានចំនួន៩០ភាគរយនៃផ្ទៃដីសរុបរបស់តំបន់នេះ។ នៅក្នុងតំបន់នេះមានផ្ទៃដីសរុបជាង៣៦ ០០០ហិកតា គឺជាប្រភេទដីមានសារធាតុអំបិល អាល់កាឡាំងស្រាល ក្នុងនោះមានផ្ទៃដីទំហំ១៣ ០០០ហិកតា ជាប្រភេទដីមានសារធាតុអំបិលធ្ងន់ធ្ងរ ដែលបង្កើតជាប្រភពគ្រប់គ្រង់វាលខ្សាច់ និងកាតបន្ថយគ្រោះមហន្តរាយជាបន្ទាន់។
នៅក្នុងឆ្នាំ២០២៤ ដើម្បីរកបានគំរូសម្រាប់កែលម្អគុណភាពដីវាលខ្សាច់ ដែលមានសារធាតុអំបិល-អាល់កាឡាំង អាជ្ញាធរខេត្ត សានទុង (Shandong) បានសហការជាមួយអាជ្ញាធរតំបន់ស្វយ័ត ស៊ីនជាំង តាមរយៈការបណ្តាក់ទុនវិនិយោគរួមគ្នា ក្នុងទំហំទឹកប្រាក់ចំនួន៣០លានយន់ ឬស្មើនឹង៤,១លានដុល្លារ ដើម្បីគាំទ្រគម្រោងដាំស្រូវសាលី ក្នុងភូមិសាស្ត្រ ស៊ីនជាំង អ៊ូឆេង (Xinjiang Wuzheng) ដោយសហការគ្នាខិតខំដាំស្រូវសាលី នៅលើដីវាលខ្សាច់ទំហំ១ ៣៣៣ហិកតា។
ចំណែកប្រធានកម្មវិធីដាំស្រូវសាលីជាមូលដ្ឋានរបស់ក្រុមហ៊ុន បានមានប្រសាសន៍ថា ការគ្រប់គ្រងវាលខ្សាច់ និងការស្ដារផ្ទៃដីដាំដុះឡើងវិញ ពិតជាមានសារៈសំខាន់សម្រាប់ការធានានូវសន្តិសុខស្បៀង ការកែលម្អប្រព័ន្ធអេកូឡូស៊ីបរិស្ថាន ការបង្កើនប្រាក់ចំណូលក្នុងតំបន់ និងការលើកកម្ពស់ការអភិវឌ្ឍកសិកម្មប្រកបដោយនិរន្តរភាព និងបច្ចេកវិទ្យានវានុវត្តន៍។
លោកបានបញ្ជាក់ថា ឧបសគ្គដ៏ធំបំផុតក្នុងការដាំស្រូវសាលី នៅលើវាលខ្សាច់ក្នុងតំបន់ តាក់ឡាម៉ាកាន់ ដែលជាវាលខ្សាច់ប្រែប្រួលឥតឈប់ឈរ។ អាស្រ័យហេតុនេះ ដីខ្សាច់ចាំបាច់ត្រូវដាំរុក្ខជាតិចម្រុះឱ្យបានឆាប់រហ័សដើម្បីជួយទប់ខ្យល់ នៅពេលកម្រិតប្រែប្រួលរបស់ដីខ្សាច់នៅថេរ។ បើមិនដូច្នេះទេ ព្យុះខ្សាច់អាចជន់លិចរុក្ខជាតិចម្រុះទាំងនោះឱ្យងាប់អស់ដូចសភាពដើមវិញ។
លោកប្រធាន បានពន្យល់ថា វិធីសាស្រ្តដាំស្រូវសាលីបែបប្រពៃណីក៏ជួបបញ្ហាប្រឈមផ្សេងទៀតផងដែរ រួមទាំងសារធាតុសរីរាង្គក្នុងដីទាប និងខ្វះសារធាតុចិញ្ចឹម កត្តាស្ងួតហួតហែងពេក ការរក្សាទឹក និងជី មិននៅបានយូរ ហើយដីមានជាតិប្រៃខ្ពស់ពេក។
លោកបាននិយាយថា ដើម្បីធានាបាននូវការដាំដុះប្រកបដោយជោគជ័យ ត្រូវប្រើវិធីសាស្រ្តបង្កើតប្រព័ន្ធធារាសាស្រ្តច្បាស់លាស់ និងបណ្តាញដំណក់ទឹក ដើម្បីផ្តល់សារធាតុចិញ្ចឹម និងប្រភពទឹកចាំបាច់ដល់ឫសស្រូវសាលី។
លោកប្រធានកម្មវិធី បានមានប្រសាសន៍ដូច្នេះថា «កត្តាសំខាន់សម្រាប់ការដាំសាកល្បងប្រកបដោយជោគជ័យ គឺការអភិវឌ្ឍប្រកបដោយភាពច្នៃប្រឌិតរបស់យើងលើកម្មវិធីបច្ចេកវិទ្យាគ្រប់គ្រងជាប្រព័ន្ធ ដែលស្របតាមអាកាសធាតុ និងលក្ខខណ្ឌដីតែមួយគត់របស់វាលខ្សាច់ ដោយដោះស្រាយបញ្ហាផ្សេងៗនៅគ្រប់ដំណាក់កាលដាំ»។
គម្រោងកម្មវិធីដាំស្រូវសាលីនៅភូមិសាស្ត្រ ស៊ីនជាំង អ៊ូឆេង ក៏កំពុងធ្វើការជាមួយវិទ្យាស្ថានស្រាវជ្រាវ រួមជាមួយបណ្ឌិត្យសភាវិទ្យាសាស្ត្រកសិកម្មចិន និងបណ្ឌិតសភាវិទ្យាសាស្ត្រកសិកម្មខេត្ត សានទុង និងប្រើប្រាស់បច្ចេកវិទ្យាថ្មី ដូចជាការកំណត់ទីតាំងផ្កាយរណប និងការត្រួតពិនិត្យពីចម្ងាយ។
ក្រុមហ៊ុនដាំស្រូវសាលី នៅតំបន់ស្វយ័ត ស៊ីនជាំង របស់ចិន បាននិយាយថា កិច្ចខិតខំប្រឹងប្រែងរួមគ្នារបស់ខ្លួនក្នុងការដាំដុះដំណាំ ការកែប្រែដីឱ្យមានជីជាតិ និងការគ្រប់គ្រងសត្វល្អិតបានច្បាស់លាស់ បង្កើតបាននូវបច្ចេកទេសស្តង់ដារ ដែលអាចចម្លងបាន និងអាចធ្វើមាត្រដ្ឋាន សម្រាប់ការដាំដុះស្រូវសាលីលើវាលខ្សាច់ក្តៅហួតហែង។
ចំណែកមន្ត្រីគម្រោងវិធីជំនួយភាពជាគូ នៅខេត្តសានទុង បាននិយាយថា ជំហានបន្ទាប់ គឺការពង្រីកតំបន់ដាំស្រូវសាលីនៅក្នុងរដូវរងារវិញម្តង ដើម្បីជួយពង្រឹងគុណភាពដី កុំឱ្យឆាប់រិចរឹលទៅវិញ។
លោកបាននិយាយថា «ក្នុងរយៈពេលពីបីទៅប្រាំឆ្នាំខាងមុខ គោលដៅរបស់យើង គឺដាំស្រូវសាលីនៅលើផ្ទៃដីវាលខ្សាច់ទំហំជាង៣ ៣៣៣ហិកតា ដើម្បីលើកកម្ពស់គុណភាព និងប្រសិទ្ធភាពនៃកសិកម្មក្នុងតំបន់ ក៏ដូចជាចូលរួមលើកកម្ពស់ជីវភាពរស់នៅតាមជនបទឱ្យកាន់តែល្អប្រសើរ។
កាលពីចុងខែមេសា ឆ្នាំ២០២៤ ក្រុមអ្នកស្រាវជ្រាវមកពីបណ្ឌិត្យសភាវិទ្យាសាស្ត្រកសិកម្មចិន បានទទួលជោគជ័យយ៉ាងធំធេងក្នុងការដាំស្រូវ និងប្រមូលផលស្រូវបានយ៉ាងឆាប់រហ័ស ក្នុងគម្រោងសាកល្បងដាំដំណាំស្រូវ នៅក្នុងផ្ទះសំណាញ់លើវាលខ្សាច់ ក្នុងតំបន់ស្វយ័ត ស៊ីនជាំង។
តាមរយៈការប្រមូលបានទិន្នផលស្រូវយ៉ាងឆាប់រហ័សដោយប្រើបច្ចេកទេសដាំដុះនៅក្នុងផ្ទះសំណាញ់លើវាលខ្សាច់ នឹងផ្តល់ការគាំទ្រផ្នែកបច្ចេកទេសសម្រាប់ការដាំដុះ និងប្រមូលផលដំណាំឱ្យបានគ្រប់រដូវ នៅក្នុងមួយឆ្នាំៗ នៅលើវាលខ្សាច់ភាគខាងត្បូងនៃតំបន់ស្វយ័ត ស៊ីនជាំង៕
