ហ្សាការតា៖ រដ្ឋមន្ត្រីក្រសួងកសិកម្ម ឥណ្ឌូណេស៊ី នៅដើមសប្តាហ័នេះ បានពណ៌នាទង្វើក្លែងបន្លំស្តង់ដារគុណភាពអង្ករឥណ្ឌូណេស៊ី ដូចជាការអំពើក្បត់ ដែលជាឧបសគ្គចំពោះគោលដៅរបស់ប្រធានាធិបតី ក្នុងការសម្រេចបាននូវសន្តិសុខស្បៀងអាហារជាតិគ្រប់គ្រាន់ដោយខ្លួនឯង ហើយបានសន្យាថា នឹងចាត់វិធានការទប់ស្កាត់យ៉ាងម៉ឺងម៉ាត់។
ទីភ្នាក់ងារព័ត៌មានផ្លូវការរបស់ឥណ្ឌូណេស៊ី អង់តារ៉ា (Antara) បានធ្វើសេចក្តីរាយការណ៍ថា លោក អានឌី អាំរ៉ាន់ ស៊ូឡៃម៉ាន (Andi Amran Sulaiman) រដ្ឋមន្ត្រីក្រសួងកសិកម្មឥណ្ឌូណេស៊ី បានមានប្រសាសន៍បែបនេះនៅក្នុងសេចក្តីថ្លែងការណ៍ផ្លូវការមួយ ដែលចេញផ្សាយដោយក្រសួងកសិកម្ម កាលពីថ្ងៃទី១៥ ខែកក្កដា ឆ្នាំ២០២៥នេះ ដោយលើកឡើងថា «យើងនឹងចាត់វិធានការយ៉ាងម៉ឺងម៉ាត់ប្រឆាំងនឹងទង្វើបែបនេះ។ នេះគឺអំពើក្បត់ចំពោះកសិករ ចំពោះអ្នកបរិភោគ និងបំផ្លាញស្មារតីនៃគោលនយោបាយផលិតស្បៀងអាហារឱ្យបានគ្រប់គ្រាន់ដោយខ្លួនឯង»។
លោករដ្ឋមន្ត្រី បានបញ្ជាក់ថា បច្ចុប្បន្ននេះ កម្លាំងនគរបាលជំនាញផ្នែកត្រួតបិនិត្យចំណីអាហាររបស់អគ្គស្នងការនគរបាលជាតិឥណ្ឌូណេស៊ី កំពុងស៊ើបអង្កេតក្រុមហ៊ុនធំៗមួយចំនួន២១២ក្រុមហ៊ុន ជុំវិញការក្លែងបន្លំលក់ចែកចាយអង្ករ ដែលមានម៉ាកយីហោត្រឹមត្រូវ។
លោក អានឌី អាំរ៉ាន់ ស៊ូឡៃម៉ាន បានបញ្ជាក់ទៀតថា លោកបានប្រាប់ទៅអគ្គស្នងការនគរបាលជាតិ និងការិយាល័យអគ្គព្រះរាជអាជ្ញា ឱ្យរាយការណ៍ពីសកម្មភាពក្លែងបន្លំ និងបញ្ជូនបញ្ជីឈ្មោះក្រុមហ៊ុនក្លែងបន្លំម៉ាកអង្ករទាំង២១២ក្រុមហ៊ុន ដែលសង្ស័យថា បានរំលោភលើបទប្បញ្ញត្តិពាណិជ្ជកម្ម។
ក្នុងចំណោមម៉ាកអង្ករចំនួន២៦៨ ដែលត្រូវបានត្រួតពិនិត្យដោយបុគ្គលិករបស់ក្រសួងកសិកម្ម សហការជាមួយក្រុមការងារផ្នែកត្រួតពិនិត្យចំណីអាហាររបស់អគ្គស្នងការនគរបាលជាតិឥណ្ឌូណេស៊ី ទីភ្នាក់ងារអាហារជាតិ និងការិយាល័យអគ្គព្រះរាជងអាជ្ញា ត្រូវបានរកឃើញថា ក្រុមហ៊ុនទាំង២១២មិនមានអនុលោមតាមស្តង់ដារគុណភាព ទម្ងន់ និងតម្លៃលក់រាយខ្ពស់ជាងតម្លែកំណត់របស់រដ្ឋាភិបាល។
គំរូអង្ករសម្រាប់ការស៊ើបអង្កេត ត្រូវបានប្រមូលយកនៅចន្លោះថ្ងៃទី៦ និង២៣ ខែមិថុនា ឆ្នាំ២០២៥ ពីទីតាំងក្រុមហ៊ុនជាច្រើនកន្លែង ស្ថិតនៅក្នុងខេត្តចំនួន១០ រួមមាន ទីក្រុងហ្សាកាតា ខេត្តកោះជ្វាខាងលិច កោះជ្វាកណ្តាល កោះជ្វាខាងកើត ស៊ូម៉ាត្រាខាងជើង ស៊ូឡាវ៉េស៊ី ឡាំពុង អាចេស កាលីម៉ាន់តាន់ និងខេត្តយូកយ៉ាកាតា។
តាមការប៉ាន់ស្មានរបស់ក្រសួងកសិកម្ម បានឱ្យដឹងថា ការខាតបង់របស់អ្នកបរិភោគដោយសារទង្វើក្លែងបន្លំបែបនេះ ដែលទាក់ទងនឹងគុណភាព និងការគ្រប់គ្រងតម្លៃនៅទីតាំងចែកចាយអង្ករ មានចំនួនទឹកប្រាក់ប្រហែលជិត៦ ១៤៦ពាន់លានដុល្លារ ក្នុងមួយឆ្នាំ។ ដើម្បីទប់ស្កាត់ទង្វើក្លែងបន្លំបែបនេះ ក្រុមការងារត្រួតពិនិត្យចំណីអាហារ បានបញ្ជាក់ថា ក្រុមការងាររបស់ខ្លួនបានសាកសួរអ្នកផលិតអង្ករម្តងទៀត ដែលសង្ស័យថា បានប្រព្រឹត្តអំពើរំលោភលើស្តង់ដារគុណភាព និងទម្ងន់របស់អង្ករឥណ្ឌូណេស៊ី។
កាលពីថ្ងៃទី១០ ខែកក្កដា ឆ្នាំ២០២៥ ក្រុមការងារត្រួតពិនិត្យចំណីអាហារឥណ្ឌូណេស៊ី ក៏បានសាកសួរអ្នកផលិតអង្ករបួននាក់ ដែលជាប់សង្ស័យថា បាននិងកំពុងបន្តក្លែងបន្លំស្តង់ដារគុណភាព និងទម្ងន់របស់អង្ករ ប៉ុន្តែមិនបានបញ្ជាក់ឈ្មោះជនសង្ស័យទាំងនេះឱ្យបានច្បាស់ឡើយ ដោយសារស្ថិតក្នុងដំណាក់កាលកំពុងស៊ើបអង្កេត៕
