ភ្នំពេញ៖ លោកឧកញ៉ា ម៉ុង ឫទ្ធី ប្រធានក្រុមហ៊ុន ម៉ុង ឫទ្ធី និងជាអ្នកជំនួញកសិកម្មជើងចាស់ បានថ្លែងបញ្ជាក់ កាលពីថ្ងៃទី២ ខែកក្កដានេះថា អ្នកជំនួញក្នុងស្រុកគួររិះរកមធ្យោបាយប្រើប្រាស់វត្ថុធាតុដើមដូចជាពោត និងដំឡូងមី ដើម្បីកែច្នៃផលិតជាចំណីសត្វឱ្យបានកាន់តែច្រើន ដើម្បីជួយដោះស្រាយបញ្ហាកសិផលខ្វះទីផ្សារនៅកម្ពុជា។
ការលើកឡើងរបស់លោកឧកញ៉ា ម៉ុង ឫទ្ធី គឺនៅ ក្នុងឱកាសអញ្ជើញចូលរួមក្នុងវេទិកាធុរកិច្ច និងនវានុវត្ដន៍ ឆ្នាំ២០២៥ ក្រោមវត្ដមានអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា នៅថ្ងៃទី០២ ខែកក្កដា ឆ្នាំ២០២៥។
លោកឧកញ៉ាបានថ្លែងថា អ្នកពាក់ព័ន្ធទាំងអស់នេះ សូមមេត្ដាខិតខំរិះរកគ្រប់មធ្យោបាយ កែប្រែវត្ថុធាតុដើមផលិតចំណីសត្វ មកប្រើដំឡូងមី ពោត កន្ទក់ចុងអង្ករ ជាពិសេសអង្ករស្រូវអ៊ីអ៊ែរ យកមកធ្វើចំណីសត្វឲ្យបានកាន់តែច្រើន យ៉ាងហោចណាស់យើងជួយបានមួយផ្នែកធំ ដើម្បីកាត់បន្ថយការលំបាករបស់កសិករ។
អ្នកជំនួញខាងលើអះអាងថា ចំពោះវិបត្ដិនៅព្រំដែនកម្ពុជា-ថៃ ពោត ដំឡូងមី និងកសិផលផ្សេងៗទៀត គឺវៀតណាមទិញពីកម្ពុជាច្រើនណាស់ ដូច្នេះយើងកុំព្រួយបារម្ភខ្លាំងពេក ដោយសារតែរោងចក្រកែច្នៃចំណីសត្វ នៅក្នុងប្រទេសកម្ពុជា ក៏មានចំនួនច្រើនដែរ។
ចំណែកអ្នកឧកញ៉ា គិត ម៉េង បានផ្តល់អនុសាសន៍ផ្តាំផ្ញើដល់ធុរជន វិនិយោគិន ព្រមទាំងថ្នាក់ដឹកនាំ សមាជិក សមាជិកានៃសភាពាណិជ្ជកម្មកម្ពុជា ក៏ដូចជាសភាពាណិជ្ជកម្មរាជធានី-ខេត្ត និងអ្នកចូលរួមទាំងអស់ ដើម្បីជាផែនទីចង្អុលផ្លូវសម្រាប់រៀបចំផែនការអាជីវកម្ម និងរួមចំណែកពង្រឹងសេដ្ឋកិច្ចជាតិឱ្យឈានឡើងមួយកម្រិតទៀត ស្របតាមកម្មវិធីនយោបាយ និងយុទ្ធសាស្រ្ត របស់រាជរដ្ឋាភិបាលអាណត្តិទី៧ ដែលមានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ជាប្រមុខដឹកនាំ។
ទន្ទឹមគ្នានេះ ដើម្បីជួយដល់រាជរដ្ឋាភិបាល ក្នុងគ្រាលំបាកនេះ ក្នុងនាមវិស័យឯកជន យើងនៅតែមានសង្ឃឹមថា ថ្នាក់ដឹកនាំយើង វិស័យឯកជន និងរដ្ឋាភិបាល គឺនៅតែអាចរួបរួមគ្នា ដើម្បីដោះស្រាយបញ្ហានេះបានផងដែរ៕
