ភ្នំពេញ៖ នៅប៉ុន្មានឆ្នាំចុងក្រោយនេះ គេសង្កេតឃើញថាប្រជាពលរដ្ឋក្នុងស្រុកបាន ងាកមកចាប់អារម្មណ៍ប្រកបមុខរបរចិញ្ចឹមត្រីបែបលក្ខណៈគ្រួសារច្រើនគួរឱ្យកត់សម្គាល់ ហើយផលិតផលកែច្នៃក្នុងវិស័យនេះទៀតសោធក៏បាននិងកំពុងទទួលបានគាំទ្រពីបរិភោគផងដែរនៅលើទីផ្សារក្នុងពេលបច្ចុប្បន្ន។
ផ្អែកលើបច្ចេកទេសនៃការចិញ្ចឹមត្រីមានការរីកចម្រើន, អ្នកជំនាញនៅក្នុងសមាគមវារីវប្បករកម្ពុជា លើកទឹកចិត្តដល់អ្នកដែលមានថវិកាគ្រប់គ្រាន់អាចបណ្តាក់ទុនវិនិយោគក្នុងវិស័យវារីវប្បកម្មបានដោយសារទីផ្សារក្នុងវិស័យមួយនេះនៅមានទំហំ ជួយឱ្យអ្នកវិនិយោគមានឱកាសបានប្រាក់ចំណេញច្រើន។
លោក ឡែមផូរ វរិទ្ធិ ប្រធានគណៈកម្មការប្រតិបត្តិសមាគមវារីវប្បករកម្ពុជា ក្រៅពីបានលើកទឹកចិត្តដល់ពលរដ្ឋ រួមគ្នាគាំទ្រផលិតផលក្នុងវិស័យវារីវប្បកម្ម មិនថាផលិតផលកែច្នៃ និងផលិតផលស្រស់នោះទេ។ លោក ឡែមផូរ វរិទ្ធិ បានបញ្ជាក់ថា “ទីផ្សារវារីវប្បកម្មកម្ពុជាមានទំហំធំ ហើយឱកាសទទួលបានអត្ថប្រយោជន៍នៅមានច្រើន។ ដូចនេះប្រសិនជាបងប្អូនដែលមានថវិកាគ្រប់គ្រាន់ចង់ចូលរួមវិនិយោគនៅក្នុងវិស័យនេះ សូមអញ្ចើញចូលរួម ព្រោះបច្ចុប្បន្ននេះ ការរីកចម្រើនផ្នែកបច្ចេកទេសអាចធ្វើឱ្យយើងមានប្រាក់ចំណេញច្រើនទៅលើការចិញ្ចឹម កាត់បន្ថយថ្លៃដើម ហើយការចំណេញពីអាជីវកម្មក្នុងវិស័យវារីវប្បកម្មមានភាពល្អឡើងពីមួយថ្ងៃទៅមួយថ្ងៃ”។
គួររម្លឹកផងដែរថា នៅក្នុងវិស័យវារីវប្បកម្មនាប៉ុន្មានឆ្នាំកន្លងមកនេះពិតជាបានផ្តល់ឱកាសដល់ប្រជាពលរដ្ឋក្នុងស្រុកបង្កើតជាមុខរបរចិញ្ចឹមត្រី និងកែច្នៃត្រីងៀត ដើម្បីរកប្រាក់ចំណូលផ្គត់ផ្គង់ក្រុមជីវភាពគ្រួសារ។ ជាក់ស្តែង គ្រួសារ អ្នកស្រី សុខ ឃីម ម្ចាស់សិប្បកម្ម កែច្នៃ ហេង ហ៊ត់ មានទីតាំងនៅភូមិខ្នារ សង្កាត់ជ្រាវ ខេត្តសៀមរាប បន្ទាប់ពីចាប់ផ្តើមមុខរបរនៅក្នុងវិបត្តិជំងឺកូវីដ១៩ រហូតមកដល់សព្វថ្ងៃនេះ ការផលិតត្រីងៀតមានការកើនឡើងជាបន្តបន្ទាប់។
អ្នកស្រី សុខ ឃីម បានបញ្ជាក់ថា “បច្ចុប្បន្នប្រជាពលរដ្ឋក្នុងស្រុក មានការគាំទ្រផលិតផលកែច្នៃត្រីងៀតច្រើន ពេលដែលពួកគាត់មានការយល់ដឹងទាក់ទងនិងសុខភាព ខុសប្លែកពីមុនពួកគាត់យល់ថា ការប្រើប្រាស់ត្រីស្រស់ឬផលិតផលកែច្នៃពីត្រីចិញ្ចឹមក្នុងស្រុក អាចនាំឱ្យប៉ះពាល់ដល់សុខភាព។ ប៉ុន្តែសព្វថ្ងៃនេះក្រៅពីទទួលបានសន្ទុះគាំទ្រមានការកើនឡើង ពួកគាត់កមិនសូវរអ៊ូរទាំនិងតម្លៃផលិតផលនៅលើទីផ្សារផងដែរ”។
អ្នកស្រីបន្តថា ក្នុងមួយថ្ងៃសិប្បកម្មធ្វើការកែច្នៃត្រីស្រស់ចន្លោះពី១២០គីឡូទៅ១៨០គីឡូក្រាម ហើយត្រីងៀតដែលកែច្នៃបានភាគច្រើនសិប្បកម្មផ្គត់ផ្គង់មកក្រុងភ្នំពេញ ស្របពេលបច្ចុប្បន្នសិប្បកម្មបាននិងកំពុងបង្កើនសមត្ថភាពផលិតត្រីងៀតបន្ថែម ឱ្យបានពី៣០០ទៅ៥០០គីឡូក្រាមក្នុងមួយថ្ងៃផងដែរ។
ស្រដៀងគ្នានេះដែរ, អ្នកស្រី ផៃ គឹមសុង ម្ចាស់សិប្បកម្មកែច្នៃត្រី នីតាត្រីងៀតសៀមរាប បានទទួលស្គាល់ថា ក្នុងរយៈពេលប្រកបមុខរបរកែច្នៃត្រីងៀតអស់រយៈពេល៤ឆ្នាំមកនេះ ផលិតផលរបស់អ្នកស្រីមានការគាំទ្រច្រើនពីប្រជាពលរដ្ឋ ហើយមុខរបរមួយនេះ វាបានចូលរួមចំណែកលើកស្ទួយជីវភាពគ្រួសារបានច្រើននិងបានផ្តល់ការងារដល់ប្រជាជនមួយចំនួននៅក្នុងតំបន់ នៅពេលតម្រូវការត្រីងៀតមានការកំម្ម៉ង់កើនឡើង៕
