ដោយ ឡុង សារេត
ខេត្តតាកែវ៖ សិប្បកម្មដើមត្នោតអង្គរលក្ខណៈគ្រួសារមួយ មានទីតាំងនៅភូមិត្រពាំងតាសោម ឃុំត្រពាំងធំខាងត្បូង ស្រុកត្រាំកក់ ខេត្តតាកែវ មានគម្រោងបង្កើនការផលិតផលទឹកត្នោតផ្អែមធម្មជាតិសម្រាប់លក់នៅលើទីផ្សារឱ្យបានដល់៣០០ដបក្នុងមួយថ្ងៃឬបានប្រាក់ចំណូលប្រមាណ៩០ម៉ឺនរៀលក្នុងមួយថ្ងៃដើម្បីផ្គត់ផ្គង់គ្រួសារក្នុងពេលបច្ចុប្បន្ន។
លោក គួង សុធា ម្ចាស់សិប្បកម្មដើមត្នោតអង្គរបានឱ្យដឹងថា សិប្បកម្មដើមត្នោតអង្គរចាប់ផ្តើមដំណើរការលក់ទឹកត្នោតផ្អែមធម្មជាតិនៅឆ្នាំ២០១៣ តែការលក់ទឹកត្នោតផ្អែមកាលនោះ ពេលខ្លះលក់បានច្រើន តែថ្លៃខ្លះទៀតលក់បានចំនួនតិចតួច ក្នុងមួយថ្ងៃ ដោយសារប្រជាពលរដ្ឋនៅតាមតំបន់ប្រជុំជនឆ្ងាយៗ មិនទាន់មានទំនុកចិត្តលើគុណភាពទឹកផ្អែម ជាហេតុនាំឱ្យមានការបាក់ទឹកចិត្តជាច្រើនដង។ ប៉ុន្តែបន្ទាប់ពីចាប់ផ្តើមដំណើរការលក់ឡើងវិញនៅពាក់កណ្តាលឆ្នាំ២០២៤ មានទាំងមានសម្ភារៈប្រើប្រាស់ និងដើមទុនមួយចំនួនសម្រាប់ធ្វើទីផ្សារឃើញថាការគាំទ្រមានសន្ទុះកើនឡើង។
លោក គួង សុធា អះអាងថា បន្ទាប់ពីចាប់ផ្តើមឡើងវិញនៅឆ្នាំ២០២៤ រហូតមកដល់ឆ្នាំ២០២៥នេះ ផលិតផលទឹកត្នោតផ្អែមធម្មជាតិរបស់សិប្បកម្មដើមត្នោតអង្គរ ទទួលបានការគាំទ្រពីប្រជាពលរដ្ឋ អ្នកចូលចិត្តពិសារទឹកត្នោតផ្អែមច្រើនគួរសម។ តួយ៉ាងចូលមកដល់ឆ្នាំ២០២៥ មួយថ្ងៃលក់ទឹកត្នោតផ្អែមបានប្រមាណ២០០ដប ហើយក្នុងមួយដបលក់បានថ្លៃ៣០០០រៀល។
បើតាមម្ចាស់សិប្បកម្មដើមត្នោតអង្គរខាងលើ, ផ្នែកលើប្រាក់ចំណូលដែលទទួលបានពីការលក់ទឹកត្នោតផ្អែមធម្មជាតិសព្វថ្ងៃនេះ មិនទាន់អាចទទួលយកបាននោះទេ ក្រោយពីកាត់ចំណាយហើយ។ដូចនេះ ទាមទារឱ្យមានការពង្រឹងការផលិតទឹកត្នោតកើនដល់៣០០ដប ទើបឆ្លើយតបទៅនិងការចង់បាននាពេលសព្វថ្ងៃ។
លោកលើកឡើងងថា “កាលពីដើមការលក់ទឹកត្នោតផ្អែមយើងមានការពិបាក ទាមទារជំរុញឱ្យការលក់ខ្លាំងជាងការផលិត។ ប៉ុន្តែបច្ចុប្បន្នមានបងប្អូនខ្មែរជួយគាំទ្រច្រើន ការលក់មានភាពងាយស្រួល តម្រូវឱ្យយើងងាកមកជំរុញការផលិតឱ្យបាន ច្រើន ហើយធ្វើបែបនេះវានឹងជួយឱ្យយើងបានប្រាក់ចំណូលច្រើនជាង៦០ម៉ឺនរៀលក្នុងមួយថ្ងៃ។ ជារួមត្រូវធ្វើយ៉ាងណា បង្កើនការផលិតទឹកត្នោតផ្អែមធម្មជាតិថ្មីៗ ឱ្យកើនដល់៣០០ដបឬបានប្រាក់ចំណូលសរុប៩០ម៉ឺនរៀលក្នុងមួយថ្ងៃ ដើម្បីបានចំណូលបន្ថែមសម្រាប់ផ្គត់ផ្គង់គ្រួសារ និងទុកផ្តល់ឱ្យកូនរៀនសូត្រ ”។
សូមជម្រាបជូនផងដែរថា មុខរបរផលិតទឹកត្នោតផ្អែមធម្មជាតិ បែបប្រពៃណីតពីដូនតារបស់លោក គួង សុធា ជាទូទៅគេដឹងថាមានហានិភ័យគ្រប់ពេល តែទោះជាបែបនេះក្តីលោកមិនដែលមានគំនិតចង់បោះបង់ការងារឡើងត្នោតរបស់ខ្លួនម្តងណាឡើយ ផ្ទុយទៅវិញ លោកបានគិតគូ និងរៀបចំធ្វើយ៉ាងណាឱ្យការផលិតទឹកត្នោតផ្អែមកាត់បន្ថយបានពីហានិភ័យដែលកើតឡើងដោយ យថាហេតុតាមរយៈការកែច្នៃដែក ធ្វើជាបង្អោងសម្រាប់ឡើងផលិតទឹកត្នោត ជំនួសឱ្យបង្អោងដើមឬស្សី៕
