សិង្ហបុរី៖ មន្ត្រីជាន់ខ្ពស់របស់ប្រទេសសិង្ហបុរី បានមានប្រសាសន៍ថា ប្រទេសរបស់លោករៀបចំខ្លួនទប់ទល់នឹងស្ថានភាពគ្រោះអាសន្ន ដោយស្តុកស្បៀងអាហារសំខាន់ៗ ដែលត្រូវមានតុល្យភាពរវាងការធានាសន្តិសុខស្បៀង និងការរក្សាតម្លៃស្តុកទុក}្យនៅទាប។
ទេសរដ្ឋមន្ត្រីទទួលបន្ទុកក្រសួងនិរន្តរភាព និងបរិស្ថាន លោក ហ្សាគី ម៉ូហាម៉ាត់ (Zaqy Mohamad) បានបញ្ជាក់ថា បើមិនដូច្នេះទេ ការស្តុកទុកស្បៀងអាហារច្រើនពេកអាចនាំឱ្យខ្ជះខ្ជាយ ហើយការចំណាយលើការស្តុកទុកក៏អាចកើនឡើងសម្រាប់អ្នកបង់ពន្ធផងដែរ។
លោកបាននិយាយប្រាប់អ្នកសារព័ត៌មានក្នុងអំឡុងពេលពិនិត្យមើលឃ្លាំងស្តុកទំនិញ ដែលដំណើរការដោយខ្សែសង្វាក់ផ្គត់ផ្គង់សិង្ហបុរី និងក្រុមហ៊ុនដឹកជញ្ជូនរបស់សង្ហបុរី កាលពីថ្ងៃទី២២ ខែតុលា ឆ្នាំ២០២៥នេះ។
កាលពីដើមឆ្នាំ២០២៥ ប្រទេសសិង្ហបុរីបានអនុម័តច្បាប់ស្តីពីសុវត្ថិភាពចំណីអាហារ និងសុវត្ថិភាពចំណីអាហារ ដែលបានកំណត់តម្រូវការស្តុកទុកអប្បបរមាសម្រាប់អ្នកនាំចូលអង្ករ ដើម្បីស្តុកទុក។ ច្បាប់នេះក៏អនុញ្ញាតឱ្យដំណើរការស្តុកទុករបស់សិង្ហបុរី អាចស្តុកប្រភេទអាហារបន្ថែមផ្សេងទៀត ក្រៅពីអង្ករផងដែរ ព្រោះអាហារសំខាន់ៗផ្សេងទៀត ឬផលិតផលកសិ-អាហារក៏អាចស្តុកទុកបានដែរ ប្រសិនបើតម្រូវការកើតឡើងនាពេលអនាគត។
ដោយកត់សម្គាល់ថា ស្តុកជាតិរបស់សិង្ហបុរី នាពេលឥឡូវនេះ មានលើសពីអង្ករដើម្បីរួមបញ្ចូលម្ហូបអាហារសម្បូរប្រូតេអ៊ីន និងអាហារសម្បូរជាតិសរសៃ លោកទេសរដ្ឋមន្ត្រី បានមានប្រសាសន៍ថា នៅពេលនេះប្រទេសសិង្ហបុរី កំពុងតែប្រកាន់ខ្ជាប់នូវតម្រូវការស្តុកទុកសម្រាប់តែអង្ករតែប៉ុណ្ណោះ។
លោកបានលើកយកករណីតម្រូវការសាច់មាន់ធ្វើជាឧទាហរណ៍ ហើយបាននិយាយថា វាមិនថោកទេ ក្នុងការរក្សាទុកសាច់មាន់ឱ្យមានប្រូតេអ៊ីន ដោយសារត្រូវបង្កកទុក ទើបអាចរក្សាគុណភាពបានយូរ។
លោកបានបន្តទៀតថា មិនថាទេសាច់មាន់ ឬម្ហូបអាហារផ្សេងទៀតទេ ត្រូវតែរក្សាទុកឱ្យបានត្រឹមត្រូវច្បាស់លាស់ ស្របតាមការវាយតម្លៃអំពីហានិភ័យនៃតម្រូវការបច្ចុប្បន្ន។ ការស្តុកទុកកាន់តែច្រើនអាចនាំឱ្យមានការចំណាយកាន់តែច្រើន។ ប្រទេសសិង្ហបុរី បានធ្វើការយ៉ាងជិតស្និទ្ធជាមួយឧស្សាហកម្មចំណីអាហារ ដើម្បីធានាការផ្គត់ផ្គង់ឱ្យបានគ្រប់គ្រាន់ប្រកបដោតសុវត្ថិភាព និងការគ្រប់គ្រងគុណភាពទំនិញស្តុកទុក។
លោក ហ្សាគី ម៉ូហាម៉ាត់ បានមានប្រសាសន៍ថា គោលបំណងគឺកែសម្រួលយុទ្ធសាស្រ្តស្តុកទុកសម្រាប់តម្រូវការនាពេលបច្ចុប្បន្ន និងគិតដល់ការគំរាមកំហែងដែលអាចកើតមាន ឬការបំផ្លិចបំផ្លាញដែលអាចកើតមានឡើងនាពេលខាងមុខ។
លោកបានកត់សម្គាល់ពីរបៀបនៃការគំរាមកំហែងបែបនេះ គឺអាចកើតមានក្នុងទម្រង់ផ្សេងៗគ្នា ដូចជាការប្រែប្រួលអាកាសធាតុ ដែលប៉ះពាល់ដល់វិស័យកសិកម្ម ជំងឺរាតត្បាត និងបញ្ហាភូមិសាស្ត្រនយោបាយ ដែលអាចប៉ះពាល់ដល់ខ្សែសង្វាក់ផ្គត់ផ្គង់។
លោកទេសរដ្ឋមន្ត្រីទទួលបន្ទុកក្រសួងនិរន្តរភាព និងបរិស្ថាន បានបន្ថែមថា ក្រៅពីការស្តុកទុក ការរីកចម្រើនក្នុងស្រុក និងការផលិតស្បៀងអាហារនៅក្នុងប្រទេសសិង្ហបុរី ក៏ជាផ្នែកមួយនៃយុទ្ធសាស្ត្ររបស់ប្រទេសជាតិអំពីស្បៀងអាហារមានភាពធន់ផងដែរ។
ការរក្សាស្តុកនេះក៏មានសារៈសំខាន់ផងដែរ ក្នុងការធានាថាប្រទេសសិង្ហបុរីមានអ្នកផ្តល់សេវា និងអ្នកផ្គត់ផ្គង់ ដែលមានលក្ខណៈចម្រុះ និងមកពីជុំវិញពិភពលោក ទាក់ទងនឹងការចំណាយ និងការផ្គត់ផ្គង់។
កាលពីដើមខែតុលា ឆ្នាំ២០២៥នេះ ប្រទេសសិង្ហបុរី និងនូវែលសេឡង់ បានធ្វើកិច្ចព្រមព្រៀង ដើម្បីធ្វើពាណិជ្ជកម្មទំនិញសំខាន់ៗក្នុងគ្រាមានវិបត្តិ ដោយធានាឡើងវិញថា ភាគីទាំងពីរអាចបន្តទទួលបានការផ្គត់ផ្គង់សំខាន់ៗក្នុងអំឡុងពេលមានការរំខានដល់ខ្សែសង្វាក់ផ្គត់ផ្គង់៕
