ខេបថោន៖ បិរមាណការនាំចេញកសិផលស្រស់របស់ប្រទេសអាហ្រ្វិកខាងត្បូង ឈានដល់ 3.71 ពាន់លានដុល្លារក្នុងឆមាសទី១ នៃឆ្នាំ២០២៥ បានកើនឡើងចំនួន១០ភាគរយ បើធៀបនឹងរយៈពេលដូចគ្នាកាលពីឆ្នាំ២០២៤មុន ដែលឆ្លុះបញ្ចាំងពីបរិមាណកាន់តែខ្ពស់នៃការនាំចេញផលិតផលកសិកម្មផ្សេងៗ និងតម្លៃទំនិញកាន់តែរឹងមាំ។
យោងតាមគេហទំព័របន្លែផ្លែឈើ បានឱ្យដឹងថា ផលិតផលកសិកម្មស្រស់ៗ ដែលប្រទេសអាហ្វ្រិកខាងត្បូងនាំចេញច្រើនជាងគេ រួមមាន ផ្លែក្រូច ផ្លែប៉ោម ផ្លែសារី ផ្លែប៊ើរ ផ្លែទំពាំងបាយជូរ ផ្លែម្នាស់ ផ្លែស្វាយ ផ្លែត្របែក និងផ្លែប៊ើរី។ ចំណែកសមត្ថភាពកំពង់ផែវញ ទាមទារឱ្យមានការអភិវឌ្ឍបន្ថែមទៀត បើទោះបីជាប្រតិបត្តិការនៅក្នុងឆមាសទី១ ឆ្នាំ២០២៥នេះ ជួបប្រទះការរំខានតិចតួច បើប្រៀបធៀបទៅនឹងប៉ុន្មានឆ្នាំកន្លងមកថ្មីៗនេះ។
បណ្តាប្រទេសជាច្រើននៅក្នុងទ្វីបអាហ្រ្វិក នៅតែជាទីផ្សារដ៏ធំបំផុតសម្រាប់ផលិតផលអាហ្វ្រិកខាងត្បូង ដែលស្រូបយកចំនួន៤០ភាគរយនៃតម្លៃនាំចេញ។ ផ្លែប៉ោម ផ្លែសារី ផ្លែក្រូចឆ្មារ និងទឹកផ្លែឈើ គឺជាផលិតផលចម្បងសម្រាប់តម្រូវការក្នុងទ្វីបនេះ។
ចំណែកទីផ្សារនៅសហភាពអឺរ៉ុប គឺជាគោលដៅធំទីពីរ ដែលបានស្រូបយកប្រមាណ២២ភាគរយនៃការនាំចេញកសិផល។ ផ្លែក្រូច ផ្លែប៉ោម ផ្លែសារី ផ្លែប៊ើរ ផ្លែទំពាំងបាយជូរ ផ្លែលម៉ើ ផ្លែម្នាស់ ផ្លែស្វាយ ផ្លែត្របែក និងគ្រាប់ដំណាប់ បានក្លាយជាទំនិញភាគច្រើនត្រូវនាំចេញទៅកាន់ទីផ្សារក្នុងសហភាពអឺរ៉ុប។
បណ្តាប្រទេសក្នុងទ្វីបអាស៊ី និងមជ្ឈិមបូព៌ា គឺជាទីផ្សារធំទី៣ ដែលបានស្រូបយកចំនួន២១ភាគរយនៃការនាំចេញផលិតផលកសិកម្មរបស់ប្រទេសអាហ្វ្រិក។ ខណៈតម្រូវការក្នុងតំបន់នេះភាគច្រើនផ្តោតលើផ្លែក្រូច ផ្លែប៉ោម ផ្លែសារី គ្រាប់ដំណាប់ ផ្លែទំពាំងបាយជូរ ផ្លែប៊ើរី និងទឹកផ្លែឈើ។
សហរដ្ឋអាម៉រិកមានបានស្រូបយកប្រាំពីរភាគរយនៃការនាំចេញផលិតផលកសិកម្មរបស់ប្រទេសអាហ្វ្រិក មានដូចជាផ្លែក្រូច ផ្លែទំពាំងបាយជូរ ផ្លែប៉ោម ផ្លែសារី និងទឹកផ្លែឈើ គឺជាផលិតផលនាំមុខគេ។ ការនាំចេញទៅកាន់សហរដ្ឋអាម៉េរិក បានកើនឡើងចំនួន២៦ភាគរយពីមួយឆ្នាំទៅមួយឆ្នាំ ក្នុងឆមាសទី១ ក្នុងទំហំទឹកប្រាក់ឡើងដល់ចំនួន១៦១លានដុល្លារ។
ប្រភេទផលិតផលនៅតែមិនមានការប្រែប្រួល ដែលភាគច្រើនមានដូចជា ផ្លែក្រូច ផ្លែទំពាំងបាយជូរ ស្រា ទឹកផ្លែឈើ និងគ្រាប់ដំណាប់។ ការប្រមូលផលផ្លែឈើដ៏ធំរបស់អាហ្រ្វិកខាងត្បូងក៏មានបរិមាណកាន់តែច្រើនផងដែរ។ ទីផ្សារក្នុងសហរដ្ឋអាម៉ររិក មានចំនួនបួនភាគរយនៃការនាំចេញផលិតផលកសិកម្មសរុបរបស់ប្រទេសអាហ្វ្រិកខាងត្បូង។ ចំណែកទីផ្សារក្នុងប្រទេសអង់គ្លេសបានស្រូបយក១០ភាគរយនៃការនាំចេញផលិតផលផ្លែឈើរបស់ប្រទេសអាហ្វ្រិកខាងត្បូង។
រីឯខាងផ្នែកនាំចូលវិញ ប្រទេសអាហ្រ្វិកខាងត្បូងបានទិញទំនិញកសិផលក្នុងតម្លៃទឹកប្រាក់ចំនួន១,៨១ពាន់លានដុល្លារ ក្នុងឆមាសទី១ ឆ្នាំ២០២៥ ដោយធ្លាក់ចុះប្រមាណប្រាំភាគរយបើប្រៀបធៀបនឹងឆ្នាំ២០២៥។ អតិរេកពាណិជ្ជកម្មសម្រាប់វិស័យកសិកម្មមានទឺកប្រាក់ចំនួន១,៩០ពាន់លានដុល្លារអាម៉េរិក ដែលកើនឡើង២៩ភាគរយខ្ពស់ជាង បើប្រៀបធៀបក្នុងរយៈពេលដូចគ្នា ឆ្នាំ២០២៤។
ការពិភាក្សាអំពីគោលនយោបាយរបស់ប្រទេសអាហ្វ្រិកខាងត្បូង បានគូសបញ្ជាក់ពីតម្រូវការរបស់ខ្លួន ដើម្បីបង្កើនប្រសិទ្ធភាពដឹកជញ្ជូន តាមរយៈការវិនិយោគលើកំពង់ផែ ផ្លូវដែក និងហេដ្ឋារចនាសម្ព័ន្ធផ្លូវថ្នល់។ ការរក្សាទីផ្សារបច្ចុប្បន្ននៅអាហ្រ្វិក សហភាពអឺរ៉ុប អាស៊ី មជ្ឈិមបូព៌ា និងសហរដ្ឋអាម៉េរិក នៅតែជាទីផ្សារជាអាទិភាពមួយ ខណៈពេលការពង្រីកការនាំចូលទៅកាន់បណ្តាប្រទេសជាសមាជិក ប្រីក (BRICS) ដូចជាប្រទេសចិន ឥណ្ឌា អារ៉ាប៊ីសាអូឌីត និងអេហ្ស៊ីប ក៏ស្ថិតក្នុងគោលដៅយកំពុតពិចារណាផងដែរ៕
