រដ្ឋាភិបាលប្រទេសអាឡឺម៉ង់ និងនីហ្សេរីយ៉ា សហការជាមួយសហភាពអឺរ៉ុប បានចាប់ផ្តើមគម្រោងផ្លាស់ប្តូរប្រព័ន្ធកសិកម្មសម្រាប់ការអភិវឌ្ឍន៍សេដ្ឋកិច្ចជនបទ ដោយគ្រោងចំណាយថវិកាអស់ចំនួន១៩,៧លានដុល្លារ សម្រាប់បង្កើតខ្សែសង្វាក់តម្លៃប៉េងប៉ោះ និងខ្ញី នៅក្នុងប្រទេសនីហ្សេរីយ៉ា។
យោងតាមគេហទំព័របន្លែផ្លែឈើ បានឱ្យដឹងថា កម្មវិធីនេះនឹងត្រូវបានអនុវត្តក្រោមកម្មវិធីសហប្រតិបត្តិការអន្តរជាតិរបស់អាឡឺម៉ង់ ដោយសហការជាមួយស្ថាប័នជាតិធំៗពីររបស់នីហ្សេរីយ៉ា គឺក្រសួងថវិកា និងផែនការជាតិ រួមជាមួយក្រសួងកសិកម្ម និងសន្តិសុខស្បៀង ដោយគ្រោង ចាប់ផ្តើមចាប់ពីខែតុលា ឆ្នាំ២០២៤ ដល់ខែកញ្ញា ឆ្នាំ២០២៨។
តំណាងកម្មវិធីសហប្រតិបត្តិការអន្តរជាតិរបស់អាឡឺម៉ង់ បាននិយាយថា គំនិតផ្តួចផ្តើមនេះ មានគោលបំណងបង្កើត ឬបង្កើនការងារថ្មីចំនួន១០ ០០០កន្លែង និងផ្តល់ប្រាក់ហិរញ្ញប្បទានចំនួន២,១៥លានដុល្លារ។
លោកស្រីតំណាងបានមានប្រសាសន៍ដូច្នេះថា «យើងមានបំណងធ្វើការជាមួយអ្នកទទួលផលប្រយោជន៍ចំនួន២៥ ០០០នាក់ ភាគច្រើនជាស្ត្រី និងយុវជន។ យើងនឹងធ្វើការជាមួយអ្នកពាក់ព័ន្ធខ្សែសង្វាក់តម្លៃសំខាន់ៗផ្សេងទៀត ដើម្បីធានាថា ពួកគេយល់ច្បាស់អំពីគោលការណ៍នៃការលើកកម្ពស់ខ្សែសង្វាក់តម្លៃ»។
គម្រោងនេះកំណត់គោលដៅកាត់បន្ថយ១៥ភាគរយនៃការខាតបង់ ក្រោយការប្រមូលផល នៅទូទាំងខ្សែសង្វាក់តម្លៃ ដែលបានជ្រើសរើស។ គម្រោងនេះក៏ប្រឹងបង្កើនប្រាក់ចំណូលដល់កសិករ និងប្រាក់ចំណូលអាជីវកម្មចំនួន១៥ភាគរយផងដែរ។
លោកស្រីបានបន្ថែមទៀតថា គម្រោងនេះនឹងលើកសំណើវិនិយោគយ៉ាងហោចណាស់ ២៥គម្រោង ដោយ១៥គម្រោងនឹងទទួលបានការគាំទ្រ និងសម្រាប់អ្នកទទួលផលចំនួន១៥ ០០០នាក់ ដើម្បីទទួលយកគម្រោងទៅអនុវត្តប្រកបដោយភាពឆ្លាតវៃ ឬបរិយាបន្ន។
ចំណែកអនុប្រធានគម្រោងប្រចាំប្រទេសនីហ្សេរីយ៉ា និងសហគមន៍សេដ្ឋកិច្ចនៃរដ្ឋអាហ្រ្វិកខាងលិច បាននិយាយថា កម្មវិធីនេះត្រូវអនុវត្តវិធីសាស្រ្តខ្សែសង្វាក់តម្លៃប្រកបដោយបរិយាបន្ន ដើម្បីដោះស្រាយបញ្ហាប្រឈមមួយចំនួន ដូចជាការប្រែប្រួលអាកាសធាតុ ក្របខណ្ឌកែច្នៃកសិផលខ្សោយ ការរិចរិលបរិស្ថាន និងអសន្តិសុខ។
ឯកអគ្គរដ្ឋទូតសហភាពអឺរ៉ុបប្រចាំប្រទេសនីហ្សេរីយ៉ា បាននិយាយថា កសិកម្មនៅតែជាការងារសំខាន់នៃការអភិវឌ្ឍន៍សេដ្ឋកិច្ចរបស់ប្រទេសនីហ្សេរីយ៉ា ដោយសារវិស័យកសិកម្មរបស់ប្រទេសនីហ្សេរីយ៉ាសម្បូរទៅដោយសក្តានុពល ហើយប្រឈមមុខនឹងបញ្ហាប្រឈមជាបន្តបន្ទាប់ដូចជា ឱនភាពហេដ្ឋារចនាសម្ព័ន្ធ ខ្វះសមត្ថភាពស្តុកទុក និងខ្វះសមត្ថភាពកែច្នៃ ព្រមទាំងខ្វះទទួលបានហិរញ្ញវត្ថុ។ ដំណោះស្រាយទាំងនេះមិនត្រឹមតែមានសារៈសំខាន់សម្រាប់តែសន្តិសុខស្បៀងប៉ុណ្ណោះទេ ប៉ុន្តែមានសារៈសំខាន់សម្រាប់សន្តិសុខទាំងមូលតែម្តង។
អនុប្រធានបេសកកម្មប្រចាំស្ថានទូតអាល្លឺម៉ង់ នៅក្នុងប្រទេសនីហ្សរីយ៉ា បានពណ៌នាគំនិតផ្តួចផ្តើមនេះជាផ្នែកមួយនៃកិច្ចសហប្រតិបត្តិការយូរអង្វែងរវាងប្រទេសអាល្លឺម៉ង់ សហភាពអឺរ៉ុប និងប្រទេសនីហ្សេរីយ៉ា។
រដ្ឋមន្ត្រីក្រសួងកសិកម្មរបស់ប្រទេសនីហ្សេរីយ៉ា បានថ្លែងអំណរគុណដល់សហភាពអឺរ៉ុបសម្រាប់ការផ្តល់មូលនិធិ និងកម្មវិធីសហប្រតិបត្តិការអន្តរជាតិរបស់អាឡឺម៉ង់ សម្រាប់ការគាំទ្រផ្នែកបច្ចេកទេស ដោយកត់សម្គាល់ថា កសិកម្មនៅតែបន្តផ្តល់ការងារដល់ជនជាតិនីហ្សេរីយ៉ា រាប់លាននាក់នៅទូទាំងសហគមន៍ជនបទ និងទីក្រុង៕
